بۇل تۋرالى «Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك Facebook جەلىسىندەگى ءوز پاراقشاسىندا جازدى.
«قۇرمەتتى دوستار!
«Nur Otan» پارتياسىندا 17 تامىز بەن 3 قازان ارالىعىندا پرايمەريز وتكىزۋ جوسپارلانعانى بەلگىلى. قازاقستاننىڭ پارتيالىق-ساياسي دامۋ تاريحىندا العاش رەت ول جالپىرەسپۋبليكالىق پارتياىشىلىك ماسشتابتا وتەدى. بۇل پارتيامىزدىڭ «قايتا جاڭعىرۋىنىڭ» جانە الداعى ءماجىلىس پەن ماسليحاتتارعا سايلاۋ ناۋقانىنا دايىندىعىنىڭ قورىتىندى كەزەڭدەرىنىڭ ءبىرى.
پرايمەريزدىڭ نەگىزگى ماقساتى – پارتيالىق تىزىمدەردى باسەكەلى جانە ايقىن نەگىزدە قالىپتاستىرۋ. نۇروتاندىقتار ەلىمىزدىڭ بارلىق ايماعىندا قوعامنىڭ سەنىمى مەن قولداۋىنا يە بولعان بەدەلدى پارتيا كوشباسشىلارىن وزدەرى انىقتايدى.
وكىنىشكە قاراي، كوروناۆيرۋس پاندەمياسى تىيىلار ەمەس جانە ءومىرىمىزدىڭ بارلىق سالاسىنا اسەر ەتىپ جاتىر. كارانتين جانە الەۋمەتتىك وقشاۋلانۋ جاعدايىندا ءبىز قاشىقتان جۇمىس ىستەپ، ءوزارا ارەكەت ەتۋگە ءماجبۇرمىز. مۇنداي جاعداي قازاقستاندا جانە الەمدە قاشانعا دەيىن سوزىلارىن ەشكىم دە بولجاپ ايتا المايدى.
بۇل – ىشكى ساياسي پروتسەستەردى دە وسىعان بەيىمدەۋدى تالاپ ەتەتىن جاڭا قۇبىلىس. سەبەبى بارلىعىمىز ءۇشىن نەگىزگى باسىمدىق – ازاماتتارىمىزدىڭ دەنساۋلىعى.
وسىعان بايلانىستى ءبىز پارتيا توراعاسى، ەلباسى نۇرسۇلتان ءابىشۇلى نازارباەۆتىڭ تاپسىرماسى بويىنشا پارتياىشىلىك سايلاۋدا ونلاين-فورماتتا داۋىس بەرۋ مەحانيزمىن پىسىقتادىق. ساياسي كەڭەس مۇشەلەرى پرايمەريز وتكىزۋ ەرەجەسىنە ەنگىزىلگەن ءتيىستى تولىقتىرۋدى سىرتتاي داۋىس بەرۋ ارقىلى قولدادى.
وزدەرىڭىز بىلەتىندەي، پارتيا قىزمەتىن تسيفرلاندىرۋ بويىنشا جۇيەلى جۇمىستار 2014 جىلدان-اق باستالعان بولاتىن. «Nur Otan» ەلىمىزدە العاشقى بولىپ «ەلەكتروندى پارتيا» اۋقىمدى جوباسىن ىسكە اسىرۋعا كىرىستى. پارتيانىڭ ورتالىقتاندىرىلعان دەرەكتەر بازاسى، ونلاين قوعامدىق قابىلداۋى، ۆەب-پورتالى جاسالىپ، مەسسەندجەرلەر مەن الەۋمەتتىك جەلىلەر ارقىلى جاڭا كوممۋنيكاتسيا ارنالارى ەنگىزىلدى.
جاڭا تسيفرلىق مۇمكىندىكتەردى حالىق تا قارقىندى قولدانىپ جاتىر. كارانتين ەنگىزىلگەن ساتتەن باستاپ پارتياعا ونلاين جۇگىنۋشىلەر سانى 5,3 ەسە، ونىڭ ىشىندە Facebook پەن Instagram ارقىلى – 17,5 ەسە، ال Whatsapp بويىنشا – 9,5 ەسەگە ارتتى. پارتيانىڭ قوعامدىق قابىلداۋىنا ءبىرىنشى جارتىجىلدىقتا 224,1 مىڭ ادام حابارلاستى. بۇل وتكەن جىلمەن سالىستىرعاندا 3,6 ەسەگە وسكەن. وسى ماسەلەلەردىڭ كوبى شەشىلدى جانە بىرقاتارى پارتيا باقىلاۋىندا.
«ەلەكتروندى پارتيا» جوباسى «پرايمەريز» اقپاراتتىق جۇيەسىن ازىرلەۋگە نەگىز بولدى. ول ۆەب-پورتال مەن ءموبيلدى قوسىمشادان تۇرادى. بۇل رەتتە ءبىز شەتەلدىك وزىق تاجىريبەلەردى زەرتتەپ، تيىسىنشە قولداندىق.
مۇندا ءبىز جەتى بازالىق قاعيداتتى باسشىلىققا الامىز. اتاپ ايتقاندا، ولار قولجەتىمدىلىك، اۆتونومدىلىق، ايقىندىق، سەنىمدىلىك، لەگيتيمدىلىك، كوپ فۋنكتسيونالدىق جانە قاۋىپسىزدىك قاعيداتتارىن قامتيدى. بۇلار جۇيەنى قولدانۋعا جەڭىل ەتىپ، اقپاراتتىق قاۋىپسىزدىكتى، سايلاۋشىنىڭ «تاڭداۋ قۇپياسىن»، سىرتتان ارالاسۋ مەن بۇرمالاۋ تاۋەكەلدەرىنەن قورعاۋدى قامتاماسىز ەتەدى.
«پرايمەريز» جۇيەسى تۇرعىندارمەن كەرى بايلانىستى بارىنشا كۇشەيتىپ، ساۋالنامالاردى جەدەل جۇرگىزۋگە، ءتۇرلى باستامالار مەن زاڭ جوبالارىن تالقىلاۋعا، شالعايداعى ەلدى مەكەندەردىڭ تۇرعىندارىنىڭ پىكىرلەرىن تىڭداۋعا مۇمكىندىك بەرەدى.
سوندىقتان «پرايمەريز» جۇيەسىن ازىرلەۋگە قىزۋ اتسالىسقان ءىت-ماماندار توبى مەن پارتيا مۇشەسى اسقار جۇماعاليەۆكە ەرەكشە العىس ايتقىم كەلەدى.
ونلاين-فورمات – پارتيانىڭ اشىق ءارى قولجەتىمدى بولا تۇسۋىنە جاسالعان تاعى دا ءبىر قادام. اسىرەسە، جاستار ءۇشىن جاقسى مۇمكىندىك. ەلباسىنىڭ تاپسىرماسى بويىنشا ءاربىر ءماسليحات پەن ماجىلىسكە ارنالعان پارتيالىق تىزىمدەردە كەمىندە 20% 35 جاسقا دەيىنگى جاستاردى قامتۋ جوسپارلانىپ وتىر.
ادال دا باسەكەلىك نەگىزدە پرايمەريز وتكىزۋ ءبارىمىز ءۇشىن ماڭىزدى. ساراپشىلار قوعامداستىعى اعىمداعى قوعامدىق-ساياسي ماسەلەلەردى شەشۋدە بۇدان ۇلكەن ءۇمىت كۇتىپ وتىر. مۇنى تاياۋدا وتكەن «Nur Otan» جاقتاستارى ليگاسىنىڭ ديسكۋسسياسى ناقتى كورسەتتى.
ءبىز ليگانىڭ بۇكىل ەل كولەمىندە پارتياشىشىلىك تاڭداۋدىڭ وتكىزىلۋ بارىسىنا قوعامدىق باقىلاۋ جاساۋ بويىنشا باستاماسىن قولدايمىز.
«Nur Otan» پارتياسى ەلىمىزدى سوزبەن ەمەس، ءىس جۇزىندە دامىتقىسى كەلەتىن بارشا جاندى پرايمەريزگە قىزۋ قاتىسۋعا شاقىرادى!» - دەدى باۋىرجان بايبەك.
"ادىرنا" ۇلتتىق پورتالى
