ەلىمىزدە كارانتين كەزىندە ۇيلەر مەن اۋلالارعا، كوشەلەرگە ارنايى دەزينفەكتسيا جۇمىستارى وقتىن-وقتىن جاسالعان بولاتىن. كەيىنىرەك ءساۋىر ايىنان كەيىن قولىنا شلانگى ۇستاعاندار مۇلدە كورىنبەي كەتتى. الايدا سوڭعى ۋاقىتتا دەزينفەكتسيا جاساعىشتار قايتا پايدا بولدى. ءۇيدىڭ كىرەبەرىسىنەن باستاپ، بۇكىل اينالاعا ءيىسى وتكىر تازارتقىش سۋىن شاشۋدى ۆيرۋستان قورعاۋ ەكەن دەپ ءجۇرمىز. ال بەلگىلى زاڭگەر جانگەلدى سۇلەيمەنوۆ بۇل شاشىلعان نارسەنىڭ قۇرامىنا كۇدىك كەلتىرىپ، ءتىپتى وسى دەزينفەكتسيانىڭ كەسىرىنەن اۋرۋىمىز مۇمكىن دەگەندى العا تارتادى.
«الماتى جانە بالكىم باسقا قالالاردا دا پودەزد، اۋلا، كوشەلەرگە دەزينفەكتسيا رەتىندە شاشىلىپ جاتقان سۇيىقتىق گليۋزامين جانە اكما حلور.
الايدا وسى سۇيىقتىقتى تەك جابىق جەرلەرگە عانا شاشۋ كەرەك. ويتكەنى اۋلا، كوشەگە بۇل سۇيىقتىقتى شاشسا، وكپەسىندە اقاۋى بار ادام ءۇشىن وتە قاۋىپتى. مۇنداي ۋدان ادامدار ءتىپتى ءولىپ تە كەتۋى مۇمكىن. سوندىقتان دەزينفەكتسيا جاساۋ ءۇشىن وتە قاۋىپتى سانالاتىن بۇل سۇيىقتىقتى كوشەلەر مەن اۋلالاردا شاشۋعا قارسىلىق تانىتۋىمىز كەرەك. حلور دەگەنىمىز وتە قاۋىپتى ۋلى گاز! ال مۇنى تازالىق ءۇشىن پايدالانۋعا بولمايدى. وسىعان دەيىن بۇل تۋرالى جازعانىما ينفەكتسيونيستەر «حلوردىڭ وكپەگە قاۋپى جوق» دەپ قارسى شىعىپتى.
بۇل جاي عانا حلور ەمەس، گليۋزامين مەن اكما حلوردىڭ قوسپاسى عوي!» دەپ جازادى زاڭگەر ءوز پاراقشاسىندا. سونىمەن قاتار ول دەزينفەكتسيا ماسەلەسىنە قاتىستى قۇزىرلى ورگاندارعا شاعىم دا تۇسىرگەن. بۇل از دەسەڭىز، سۇلەيمەنوۆ ءتىپتى دۇنيەجۇزىلىك دەنساۋلىق ساقتاۋ ۇيىمىنا دا شاعىم حات دايىنداپتى. زاڭگەردىڭ جازباسىنا قاتىستى پىكىر بىلدىرگەندەر وتە كوپ. سولاردىڭ ءبىرازىن قازاقشاعا اۋدارىپ، نازارلارىڭىزعا ۇسىنۋدى ءجون سانادىق.
ءبىز زەردەلىدە تۇرامىز. كەشە تۇنگى ساعات ەكىلەر شاماسىندا ءبىر كولىك كەلىپ، الدەنەنى شوپتەرگە، اعاشتارعا شاشىپ كەتتى. الگى ءيىس قولقانى قابادى. تەرەزەمىزدى جاۋىپ قويدىق. تاڭەرتەڭ دە الگى ءيىس ءوز كۇشىن جويماعانىن بايقادىق.
ال بىزدە نۇر سۇلتاندا شاشىلعان نارسەنىڭ ءيىسى قاندالانى ولتىرۋگە ارنالعان ءدارىنىڭ يىسىنە قاتتى ۇقسايدى. كوپ شاشقانى سونداي، كوزدى اشىتادى. ءيىسى دە سۇمدىق، تىنىس الۋ مۇمكىن ەمەس. كسكعا سۇراۋ سالدىم، شاشىپ جاتقان سۇيىقتىق نە دەپ. ازىرگە جاۋاپ جوق.
كوروناۆيرۋستى جوياتىن دەزينفەكتسيالىق زات ءالى ويلاپ تابىلعان جوق. دەمەك، بۇل جاي عانا اقشانى جەلگە شاشۋ دەزينفەكتسياسى دەگەن ءسوز عوي.
ەستەرىڭىزدە مە، شىمكەنتتىك ءبىر ۆراچ ايەل شىرىلداپ، ادامداردىڭ كوروناۆيرۋستان ەمەس، پنەۆمونيادان ءولىپ جاتقانىن ايتقاندا وعان ەشكىم سەنە قويماعان ەدى. كەيىن نە بولدى؟ سول دارىگەردىڭ ايتقانى ءدال كەلدى ەمەس پە؟ ادامدار وكپە قابىنۋىنان زارداپ شەكتى. بالكىم قازىر دە سولاي، زاڭگەر شىرىلداپ حالىقتىڭ اماندىعى ءۇشىن شاعىم تۇسىرۋدە. ازىرگە وعان سەنىپ وتىرعاندار از. كىم بىلەدى، ءبىراز ۋاقىتتان كەيىن بۇل دەزينفەكتسيانىڭ دا سىرى اشىلار.
P.S اۋلا، كوشە، پودەزدەرگە شاشىلىپ جۇرگەن دەزينفەكتسيا سۇيىقتىعى راسىمەن ادام دەنساۋلىعىنا قاۋىپتى مە؟ بۇل سۇراقتىڭ جاۋابىن ءتيىستى مەكەمەلەر رەسمي تۇردە بەرەدى دەپ سەنەمىز. ويتكەنى، حالىق ءۇشىن قازىر ءاربىر سۇراۋدىڭ جاۋابىن الۋ اناعۇرلىم ماڭىزدى.
مەرۋەرت حۋساينوۆا،
"ادىرنا" ۇلتتىق پورتالى.
