اقتوبە وبلىسى, ايتەكە بي اۋدانى, قارابۇتاق اۋىلىنىڭ تۇرعىنى باينيازوۆ ناۋرىزبەك 26.07.2018 كىسى قولىنان قازا تاپتى. اتا-اناسىنىڭ ادىلدىك ىزدەپ بارماعان جەرى, باسپاعان تاۋى جوق. ەكى جىلدان بەرى رەسپۋبليكالىق, وبلىستىق سوتتارعا ارىز جازىپ, ءىستىڭ اق-قاراسى اشىلۋىن سۇراسا دا، ءالى كۇنگە دەيىن قاناعاتتانارلىق جاۋاپ الا الماعان. زەرتتەۋلەر تەك بىرجاقتى جۇرگىزىلىپ, جابۋلى قازان جابۋلى كۇيىندە قالىپ كەلەدى.
2018 جىلى شىلدە ايىنىڭ 25-ىنەن 26-سىنا قاراعان ءتۇنى ساعات 01:00 شاماسىندا قارابۇتاق سەلوسى, امانگەلدى كوشەسى, №28 ءۇي ماڭىندا ناۋرىزبەك ەركەبۇلان وتاروۆ جانە نۇرگەلدىقاليەۆپەن بىرگە تۇرعان. جاندارىنان اۆتوكولىكپەن ءوتىپ بارا جاتقان اۋىل جىگىتتەرى بۇلارعك كەلىپ امانداسادى. ولاردىڭ قاتارىندا ەركىن انارباەۆ, جاسقايرات كاليموۆ, اسىلبەكوۆ ەلامان بولعان. جاسى كىشى ەركىن ناۋرىزبەككە امانداسۋدان باس تارتادى. “سەن نەگە مەنىمەن امانداسپايسىڭ” دەگەن سۇراعىنا ەركىن “مەن سەنىمەن امانداسپايمىن جانە سەنى “برات” دەپ ەسەپتەمەيمىن” دەپ قىرسىعا جاۋاپ بەرگەن. وسىدان بارىپ ەكى جىگىتتىڭ اراسىندا كەلىسپەۋشىلىك تۋىنداعان. كۋاگەرلەردىڭ ايتۋى بويىنشا, ناۋرىزبەك ەركىندى ۇرىپ, جەرگە قۇلاتىپ, باسىنا جانە بەت تۇستارىنا جۇدىرىعىمەن بىرنەشە سوققى جاساعان. سودان كەيىن جاعداي شيەلەنىسىپ, ەكەۋى اقتوبە-قوستاناي تاس جولى بويىندا ورنالاسقان ەسكى اۆتوبازا عيماراتىنىڭ قاسىندا جەكپە-جەككە شىعاتىن بولىپ كەلىسەدى. وقيعا ورنىندا بۇل ەكەۋىنەن باسقا ناۋرىزبەكتىڭ دە، ەركىننىڭ دە جولداستارى بولعان. توبەلەس كەزىندە ناۋرىزبەك ءارتۇرلى جاراقاتتار العان. ناتيجەسىندە ناۋرىزبەك وقيعا بولعان كۇننىڭ ەرتەسىنە 26 شىلدە كۇنى ساعات 10:00 شاماسىندا ءوز ۇيىندە جان ءتاسىلىم ەتتى. بۇل جاعداي بويىنشا انارباەۆ ەركىن قىلمىستىق جاۋاپكەرشىلىككە تارتىلىپ, 8 جىلعا باس بوستاندىعىنان ايىرىلدى.
ناۋرىزبەكتىڭ اتا-اناسى سوت شەشىمىمەن كەلىسپەيدى. مەديتسينالىق ساراپتامالار ناۋرىزبەكتىڭ دەنە جاراقاتتارى اۋىر زاتتاردان كەلگەنىن كورسەتتى. ال كۋاگەرلەردىڭ بەرگەن مالىمدەمەسى ساراپتامالاردىڭ ناتيجەسىنەن مۇلدە باسقاشا, ياعني ەركىن تەرگەۋ كەزىندە تەك جۇدىرىق جۇمساعانىن ايتقان. رابيعانىڭ ايتۋىنشا, بويى 1.90, سالماعى 90 كەلى دەنەلى جىگىت ناۋرىزبەكتىڭ جالعىز ەركىننەن سوققى جەۋى مۇمكءىن ەمەس. وعان توپتىق شابۋىل جاسالعان دەپ وتىر.
تەرگەۋ تاراپىنان جىبەرىلگەن قاتەلىكتەر بۇل عاناەمەس. ناۋرىزبەكتىڭ دوستارىنىڭ ايتۋىنشا, ولار وقيعا بولعانعا دەيىن دۇكەننەن ناۋرىزبەككە ەكى مارتە سىرا العىزىپ ىشكەن. بىراق مەديتسينالىق ساراپتامادا ناۋرىزبەكتىڭ سپيرتتىك ىشىمدىك ىشپەگەندىگى انىقتالدى جانە قان قۇرامىنان سپيرت تابىلماعان. ال بۇل نارسەنى تەرگەۋ بارىسىندا ەسكەرمەدى. اناسىنىڭ ايتۋى بويىنشا, ناۋرىزبەك ىشىمدىككە اۋەس جىگىت ەمەس-ءتىن.
دوستارى ناۋرىزبەكتى وقيعا بولعان ءتۇنى ۇيىنە سۇيرەپ اكەلىپ تۇرىپ اناسىنا بالاسىنىڭ اراق ءىشىپ, ماس بولعانىن ءارى سول جەردە توبەلەس ورىنالعانىن ايتقان. رابيعانىڭ كۇيىنەتىنى جابىرلەنۋشىنىڭ جاعدايى اۋىر بولا تۇرا, جولداستارى ارەكەتسىزدىك تانىتىپ, جىگىتتىڭ ءحالى تۋرالى جاسىرىپ قالعان. انا بايعۇس سولاردىڭ سوزىنە سەنىپ, اۋرۋدىڭ بەلگىلەرى بايقالماعاندىقتان, ءبىراز تىنىعىپ السىن دەپ, تاڭەرتەڭگە دەيىن بالاسىن مازالاماعان. ال الگى جىگىتتەر ناۋرىزبەكتىڭ جۇرۋگە مۇمكىندىگى جوق ەكەنىن كورە تۇرا, قاساقانا وعان مەديتسينالىق كومەك كورسەتپەگەن. مۇنداي سۇراقتار تەرگەۋ كەزىندە دە ءوز شەشىمىن تاپپادى. رابيعا وسى قاراما-قايشىلىقتار نەگىزىندە جولداستارىنىڭدا ىسكە تىكەلەي قاتىستى بولۋى مۇمكىن دەپ كۇدىكتەنەدى. №52 سوت مەديتسينالىق ساراپتاماسىنىڭ قورىتىندىسى بويىنشا جابىرلەنۋشى اۋىر دەنە جاراقاتتارىنان كەيىن دەر كەزىندە مەديتسينالىق كومەك العان بولسا, ونىڭ ءتىرى قالۋى ابدەن مۇمكىن ەدى.
بۇدان بايقايتىنىمىز, ىسكە قاداعالاۋ جاساۋشى ايتەكە بي اۋداندىق سوتى دا مۇنداي ورەسكەل قاتەلىكتەرگە اسا نازار اۋدارماي, ءمان-جايلاردى ءجىتى تەكسەرمەگەن. تەرگەۋ ايتەكە بي اۋداندىق ىشكى ىستەر ءبولىمى باسشىسى, مايور ەربول سۇلەيمەنوءۆتىڭ جەتەكشىلىگىمەن جۇرگىزىلگەن. جوعارىدا اتالعان دەرەكتەر ەسكەرىلمەستەن, ءىس سوتقا ءوتىپ كەتتى. سول سەبەپتى قىلمىسكەر رەتىندە ەركىن انارباەۆ قانا جاۋاپقا تارتىلعان.
كوپتىلەۋوۆا رابيعا مەملەكەت باسشىسىنا جانە جوعارعى سوت توراعاسىنا ءوز جانايقايىن جەتكىزىپ, ارىز جازدى. ەندىگى بار ءۇمىتى پرەزيدەنتكە جولداعان حاتىندا (18.06.2020 كۇنى جولداعان):
“قۇرمەتتى پرەزيدەنت! وسى كورسەتىلگەن تەرگەۋ تاراپىنان جىبەرىلگەن زاڭسىزدىقتار بويىنشا ءتيىستى قۇزىرلى ورگاندارعا تاپسىرما بەرىپ, ونى ءوزىڭىزدىڭ باقىلاۋىڭىزعا الىپ, ءىس بويىنشا ادىلدىكتى انىقتاۋعا كومەك كورسەتۋىڭىزدى سۇرايمىن.”
ارىز بەرۋشى كوپتىلەۋوۆا رابيعا بۇعان دەيىن 2019 جىلدىڭ قازان ايىندا جانە 2020 جىلدىڭ اقپان ايىندا قر اقپارات جانە قوعامدىق دامۋ ءمينيسترى ايدا بالاەۆانىڭ قابىلداۋىندا 2 رەت بولعان. پرەزيدەنت اكىمشىلىگىنە دە حابارلاسىپ, قازىرگى تاڭدا جاۋاپ كۇتۋدە. اتالعان ورگاندار ەلدەگى كارانتين جاعدايىنا بايلانىستى ءىستى قاراۋدى كەيىنگە قالدىرىپ جاتقانىن ايتتى.
باينيازوۆ ناۋرىزبەك وقۋىن ۇزدىك اياقتاپ, ەكونوميست مەنەدجەر ماماندىعىن الىپ شىققان. جاقسى قىزمەتتە بولعان. ءوز ورتاسىنا سىيلى جىگىت. اتا-اناسىمەن سۇحباتتاسا وتىرىپ, ولاردىڭ قازىرگى اۋىر حالىنە قانىق بولدىق. قازا بولعان جىلدىڭ كۇز ايىندا ناۋرىزبەكتىڭ ۇيلەنۋ تويىنا دايىندالىپ وتىرعان ەكەن. بىراق سول وقيعادان كەيىن ەكى جىلدان بەرى ىشكەنى ءىرىڭ, جەگەنى جەلىم بولعان اكە-شەشە جوعارىدان قاشان حابار كەلەدى دەپ ەلەڭدەپ وتىر. “وزدەرىڭىزدەن كۇتەر ءۇمىتىمىز مول” دەپ ناۋرىزبەكتىڭ اكەسى ءوز ءسوزىن اياقتادى. جۇرەكتى ەلجىرەتەر اكە ءسوزى ءبىزدى دە بەي-جاي قالدىرمادى. قايعى جۇتقان اتا-اناعا كوڭىل ايتا وتىرىپ, ارىزدى اقتوبە وبلىسىنىڭ ادىلەت دەپارتامەنتى, اقتوبە وبلىسىنىڭ پروكۋراتۋراسى، اقتوبە وبلىسىنىڭ اكىمىنىڭ نازارىنا ۇسىنامىز.
اياۋلىم ءاءبىلدا،
«ادىرنا» ۇلتتىق پورتالى
