Aqtóbe oblysy, Áıteke bı aýdany, Qarabutaq aýylynyń turǵyny Baınııazov Naýryzbek 26.07.2018 kisi qolynan qaza tapty. Ata-anasynyń ádildik izdep barmaǵan jeri, baspaǵan taýy joq. Eki jyldan beri respýblıkalyq, oblystyq sottarǵa aryz jazyp, istiń aq-qarasy ashylýyn surasa da, áli kúnge deıin qanaǵattanarlyq jaýap ala almaǵan. Zertteýler tek birjaqty júrgizilip, jabýly qazan jabýly kúıinde qalyp keledi.
2018 jyly shilde aıynyń 25-inen 26-syna qaraǵan túni saǵat 01:00 shamasynda Qarabutaq selosy, Amangeldi kóshesi, №28 úı mańynda Naýryzbek Erkebulan Otarov jáne NurgeldiQalıevpen birge turǵan. Jandarynan avtokólikpen ótip bara jatqan aýyl jigitteri bularǵk kelip amandasady. Olardyń qatarynda Erkin Anarbaev, Jasqaırat Kalımov, Asylbekov Elaman bolǵan. Jasy kishi Erkin Naýryzbekke amandasýdan bas tartady. “Sen nege menimen amandaspaısyń” degen suraǵyna Erkin “Men senimen amandaspaımyn jáne seni “brat” dep eseptemeımin” dep qyrsyǵa jaýap bergen. Osydan baryp eki jigittiń arasynda kelispeýshilik týyndaǵan. Kýágerlerdiń aıtýy boıynsha, Naýryzbek Erkindi uryp, jerge qulatyp, basyna jáne bet tustaryna judyryǵymen birneshe soqqy jasaǵan. Sodan keıin jaǵdaı shıelenisip, ekeýi Aqtóbe-Qostanaı tas joly boıynda ornalasqan eski avtobaza ǵımaratynyń qasynda jekpe-jekke shyǵatyn bolyp kelisedi. Oqıǵa ornynda bul ekeýinen basqa Naýryzbektiń de, Erkinniń de joldastary bolǵan. Tóbeles kezinde Naýryzbek ártúrli jaraqattar alǵan. Nátıjesinde Naýryzbek oqıǵa bolǵan kúnniń ertesine 26 shilde kúni saǵat 10:00 shamasynda óz úıinde jan tásilim etti. Bul jaǵdaı boıynsha Anarbaev Erkin qylmystyq jaýapkershilikke tartylyp, 8 jylǵa bas bostandyǵynan aıyryldy.
Naýryzbektiń ata-anasy sot sheshimimen kelispeıdi. Medıınalyq saraptamalar Naýryzbektiń dene jaraqattary aýyr zattardan kelgenin kórsetti. Al kýágerlerdiń bergen málimdemesi saraptamalardyń nátıjesinen múlde basqasha, ıaǵnı Erkin tergeý kezinde tek judyryq jumsaǵanyn aıtqan. Rabıǵanyń aıtýynsha, boıy 1.90, salmaǵy 90 keli deneli jigit Naýryzbektiń jalǵyz Erkinnen soqqy jeýi múmkin emes. Oǵan toptyq shabýyl jasalǵan dep otyr.
Tergeý tarapynan jiberilgen qatelikter bul ǵanaemes. Naýryzbektiń dostarynyń aıtýynsha, olar oqıǵa bolǵanǵa deıin dúkennen Naýryzbekke eki márte syra alǵyzyp ishken. Biraq medıınalyq saraptamada Naýryzbektiń spırttik ishimdik ishpegendigi anyqtaldy jáne qan quramynan spırt tabylmaǵan. Al bul nárseni tergeý barysynda eskermedi. Anasynyń aıtýy boıynsha, Naýryzbek ishimdikke áýes jigit emes-tin.
Dostary Naýryzbekti oqıǵa bolǵan túni úıine súırep ákelip turyp anasyna balasynyń araq iship, mas bolǵanyn ári sol jerde tóbeles orynalǵanyn aıtqan. Rabıǵanyń kúıinetini jábirlenýshiniń jaǵdaıy aýyr bola tura, joldastary áreketsizdik tanytyp, jigittiń hali týraly jasyryp qalǵan. Ana baıǵus solardyń sózine senip, aýrýdyń belgileri baıqalmaǵandyqtan, biraz tynyǵyp alsyn dep, tańerteńge deıin balasyn mazalamaǵan. Al álgi jigitter Naýryzbektiń júrýge múmkindigi joq ekenin kóre tura, qasaqana oǵan medıınalyq kómek kórsetpegen. Mundaı suraqtar tergeý kezinde de óz sheshimin tappady. Rabıǵa osy qarama-qaıshylyqtar negizinde joldastarynyńda iske tikeleı qatysty bolýy múmkin dep kúdiktenedi. №52 sot medıınalyq saraptamasynyń qorytyndysy boıynsha jábirlenýshi aýyr dene jaraqattarynan keıin der kezinde medıınalyq kómek alǵan bolsa, onyń tiri qalýy ábden múmkin edi.
Budan baıqaıtynymyz, iske qadaǵalaý jasaýshy Áıteke bı aýdandyq soty da mundaı óreskel qatelikterge asa nazar aýdarmaı, mán-jaılardy jiti teksermegen. Tergeý Áıteke bı aýdandyq ishki ister bólimi basshysy, maıor Erbol Súleımenovtiń jetekshiligimen júrgizilgen. Joǵaryda atalǵan derekter eskerilmesten, is sotqa ótip ketti. Sol sebepti qylmysker retinde Erkin Anarbaev qana jaýapqa tartylǵan.
Kóptileýova Rabıǵa memleket basshysyna jáne joǵarǵy Sot tóraǵasyna óz janaıqaıyn jetkizip, aryz jazdy. Endigi bar úmiti Prezıdentke joldaǵan hatynda (18.06.2020 kúni joldaǵan):
“Qurmetti Prezıdent! Osy kórsetilgen tergeý tarapynan jiberilgen zańsyzdyqtar boıynsha tıisti quzyrly organdarǵa tapsyrma berip, ony ózińizdiń baqylaýyńyzǵa alyp, is boıynsha ádildikti anyqtaýǵa kómek kórsetýińizdi suraımyn.”
Aryz berýshi Kóptileýova Rabıǵa buǵan deıin 2019 jyldyń qazan aıynda jáne 2020 jyldyń aqpan aıynda QR Aqparat jáne qoǵamdyq damý mınıstri Aıda Balaevanyń qabyldaýynda 2 ret bolǵan. Prezıdent ákimshiligine de habarlasyp, qazirgi tańda jaýap kútýde. Atalǵan organdar eldegi karantın jaǵdaıyna baılanysty isti qaraýdy keıinge qaldyryp jatqanyn aıtty.
Baınııazov Naýryzbek oqýyn úzdik aıaqtap, ekonomıst menedjer mamandyǵyn alyp shyqqan. Jaqsy qyzmette bolǵan. Óz ortasyna syıly jigit. Ata-anasymen suhbattasa otyryp, olardyń qazirgi aýyr haline qanyq boldyq. Qaza bolǵan jyldyń kúz aıynda Naýryzbektiń úılený toıyna daıyndalyp otyrǵan eken. Biraq sol oqıǵadan keıin eki jyldan beri ishkeni iriń, jegeni jelim bolǵan áke-sheshe joǵarydan qashan habar keledi dep eleńdep otyr. “Ózderińizden kúter úmitimiz mol” dep Naýryzbektiń ákesi óz sózin aıaqtady. Júrekti eljireter áke sózi bizdi de beı-jaı qaldyrmady. Qaıǵy jutqan ata-anaǵa kóńil aıta otyryp, aryzdy Aqtóbe oblysynyń ádilet departamenti, Aqtóbe oblysynyń prokýratýrasy, Aqtóbe oblysynyń ákiminiń nazaryna usynamyz.
Aıaýlym ÁBILDA,
«Adyrna» ulttyq portaly
