قازىرگى تاڭدا تۇرعىندار دارىلەر مەن مەديتسينالىق قۇرالداردىڭ جەتكىلىكسىز ەكەندىگىن ايتۋدا. اتاپ ايتساق، دەنە قىزۋىن ولشەيتىن قۇرال، پاراتسەتامول، اسپيرين، تسيترامون، انتيسەپتيكتەر قورى جەتكىلىكسىز. دارىحانالارداعى كەزەك ساعاتتاپ جىلجيدى. دارىلەر شىنىمەن دە جەتكىلىكسىز بە؟ الدە حالىقتىكى جاي عانا دۇرلىگۋ مە؟ وسى اقپاراتتى انىقتاپ ءبىلۋ ءۇشىن دارىحانالارعا حابارلاسىپ، ماسەلەنىڭ انىق-قانىعىن بايقاپ كوردىك.
قازاقستاندىق “ەيكوس فارم” جشس جىلىنا انتيگريپپين، تسيترامون، فۋراتسيللين سەكىلدى تۇماۋعا قارسى دارىلەردىڭ 25 ملن قاپتاماسىن شىعارادى ەكەن. پرەپاراتتاردى دارىحانالارعا جەتكىزۋمەن اينالىساتىن “ابدي يبراحيم گلوبال فارم” كومپانياسى جىلىنا ۆيتاميندەر مەن انتيبيوتيكتەردىڭ 1,5 ملرد داناسىن تاراتادى. مۇنداي كولەمدەگى ءدارى قازاقستاندىق ءدارىحانالاردى تولىعىمەن قامتاماسىز ەتە الادى.
دارىگەرلەر جەتكىلىكسىز دەپ جۇرگەن مەديتسينالىق ەرىتىندىلەردى وندىرۋمەن اينالىساتىن “Birunifarm” («بيرۋنيفارم») كومپانياسى جىلىنا 300 مىڭ ەرىتىندى جيىنتىعىن شىعارادى. كومپانيا باسشىلىعى مۇنداي كولەم الماتى كلينيكالارىن تولىعىمەن قامتاماسىز ەتۋگە جەتكىلىكتى دەپ وتىر. سەبەبى اتالمىش ءوندىرىس ورنى ەرىتىندىلەردى شەتەلدەرگە ەكسپورتتاۋمەن دە اينالىسادى. گەمودياليز ءادىسى قاندى زياندى ونىمدەردەن تازارتۋ ءۇشىن قولدانىلادى.
ءبىر رەت قولدانىلاتىن كيىم-كەشەك شىعارۋمەن اينالىساتىن “مەرۋسار ي ك” جشس جىلىنا 543 840 كيىم، 8 ملن. ورام سپيرتتىك سالفەتكالار شىعارادى. بۇل كومپانياداعى ونىمدەردىڭ باعاسى تومەندەگىدەي: بەتپەردەلەر - 85 تگ، باحيلا - 12 تگ، سپيرتتىك سالفەتكالار - 7-9 تگ.
ال ورگانيزمدەگى ءتۇرلى ينفەكتسيالاردى، قاننىڭ قۇرامىن انىقتايتىن تەستىلەردەن ءوتۋ حالىقتىڭ قالتاسىن كوتەرمەي جاتقانى دا ايان. وسى ورايدا، ءبىز زەرتحانالىق تەستىلەۋلەر وتكىزۋمەن اينالىساتىن الماتى قالاسىنداعى «كاز-ديا-تەست» جشس-مەن حابارلاستىق. كومپانيا تۇرعىنداردى ارنايى جازبامەن قابىلدايتىنىن ايتتى. تەستىلەۋ ناتيجەلەرى 1 تاۋلىكتىڭ ىشىندە دايىن بولادى. تەستىلەۋ قۇنى 16 500 تەڭگە. وزىڭىزبەن بىرگە جەكە كۋالىگىڭىز بولسا جەتكىلىكتى. 1998 جىلى نەگىزى قالانعان ءوندىرىس ورنى وسىعان دەيىن 4 ميلليون دياگنوستيكالىق تەستىلەۋ وتكىزگەن.
قانداي دارىلەر قولجەتىمدى؟
قازىرگى تاڭدا اتسيكلوۆير دارىلىك زاتىنىڭ ۆيرۋسقا قارسى ۇقساس تۇرلەرى – ينگوۆەرين، تاميفليۋ، كاگوتسەل جەتكىلىكتى كولەمدە. ينگوۆەرين ءدارىسىنىڭ 68 480 قورابى سەرتيفيكاتتان ءوتىپ جاتىر جانە ول وسى ايدا (شىلدە) ساتىلىمعا تۇسپەك.
قانداي جۇمىستار اتقارىلىپ جاتىر؟
قازاقستان رەسپۋبليكاسى كوتەرمە ساۋدامەن اينالىساتىن فارماتسەۆتيكالىق كومپانيالارمەن كەلىسسوزدەر جۇرگىزۋدە. اتاپ ايتقاندا، دەنە قىزۋىن ولشەيتىن قۇرال سەكىلدى باسقا دا مەديتسينالىق بۇيىمداردىڭ قورى ءالى دە تولىقتىرىلاتىن بولادى. وندىرىلەتىن ونىمدەرگە دايىنداۋشى ەلدەردە ۇلكەن سۇرانىس بولعاندىقتان (رەسەي، قىتاي حالىق رەسپۋبليكاسى) جانە باسقا دا ەلدەرگە شىعارىلاتىندىقتان، قاجەتتى مولشەردە جەتكىزۋ قيىندىق تۋعىزۋدا.
فارماتسەۆت مامانداردىڭ ايتۋىنشا، داۋرىعىپ، دۇربەلەڭگە بوي الدىرعان ادامدار ءار نارسەنىڭ بايىبىنا بارماي ۆيرۋسقا قارسى دارىلەردى شامادان تىس الىپ جاتىر. جەتكىلىكسىز دەپ وتىرعان پرەپاراتتاردىڭ جاڭا ۆيرۋستارعا قاتىستى ەشبىر تيىمدىلىگى دالەلدەنبەگەن.
سوندىقتان ونى الدىن الۋ ءۇشىن ءدارى ءىشۋ ۇسىنىلمايدى. سەبەبى ولار ادام اعزاسىنا كەرى اسەرىن تيگىزۋى مۇمكىن. ال اۋرۋدىڭ بەلگىلەرى پايدا بولعان كەزدە ءوزىن-ءوزى ەمدەۋدىڭ قاجەتى جوق. بىردەن دارىگەردىڭ كومەگىنە جۇگىنگەن ءجون.
قازىرگى كەزدە ءدارىحانالاردىڭ الدىندا ساعاتتاپ كەزەك كۇتىپ تۇرۋدىڭ قاجەتى جوق. "In Drug" ءموبيلدى قوسىمشاسىن جۇكتەپ، قاي ءدارىحانادا، قانداي ءدارى-دارمەكتىڭ جانە اپتەكالىق پرەپاراتتاردىڭ بار ەكەنىن وڭاي بىلۋگە بولادى.
اياۋلىم ءابىلدا،
"ادىرنا" ۇلتتىق پورتالى
