مەملەكەت باسشىسىنىڭ 2020 جىلعى 30 ساۋىردەگى №312 جارلىعىنىڭ نەگىزىندە ازاماتتاردى اسكەر قاتارىنا شاقىرۋ شارالارى جۇزەگە اسىرىلۋدا. كوكتەمگى اسكەرگە شاقىرۋ مەرزىمى باستالعان كەزەڭنەن باستاپ سەمەي قالاسىنان قر قورعانىس مينيسترلىگىنىڭ اسكەري بولىمدەرى مەن قۇرىلىمدارىنا، قر ءىىم ۇلتتىق ۇلانىنا، قر ۇقك شەكارا قىزمەتىنە، مەملەكەتتىك كۇزەت قىزمەتىنە 150-دەن اسا جاس جىبەرىلدى. وتان الدىنداعى بورىشىن وتەۋگە اتتانعاندار 18 - 27 جاس ارالىعىن قامتيدى. ەلىمىزدە ەنگىزىلگەن كارانتينگە بايلانىستى سانيتارلى-گيگيەنالىق شارالاردى قاتاڭ ساقتاۋ ماقساتىندا جيىن پۋنكتەرىندە مەديتسينالىق بەكەتتەر جاساقتالعان.
بيىل اسكەرگە شاقىرىلۋشىلاردى سالتاناتتى تۇردە شىعارىپ سالۋعا دا تيىم سالىندى. مەديتسينالىق بەكەتتەردە كوميسسيا قۇرامىنداعى دارىگەرلەر ازاماتتاردىڭ دەنساۋلىعىن ءجىتى تەكسەرەدى. كوروناۆيرۋس ينفەكتسياسىنىڭ تارالۋىنا جول بەرمەۋ ءۇشىن جيىن پۋنكتى مەن وعان ىرگەلەس اۋماقتا دەزينفەكتسيالىق جانە ىلعالدى تازالاۋ جۇمىستارى ءار ەكى ساعات سايىن جۇرگىزىلەدى.
«اسكەرگە شاقىرىلعاندارمەن پسيحولوگيالىق جۇمىستار، سۇحبات جۇرگىزىلەدى. باستى ماقساتىمىز - شىنىققان شىمىر عانا ەمەس، دەنساۋلىعى مىقتى، ءارى مورالدىق تۇرعىدان بورىشىن وتەۋگە ءازىر ازاماتتاردى ىرىكتەۋ. سەبەبى، قازىرگى جاعدايعا بايلىنىستى ءبىز بارلىق تەكسەرۋدى تياناقتى وتكىزىپ قانا قويماي، جۇقپالى ىندەتتىن اسكەريلەردىڭ اراسىندا تارالىپ كەتۋىنە جول بەرمەۋىمىز اسا قاجەت»،- دەيدى سەمەي قالاسى قورعانىس ىستەرى جونىندەگى باسقارمانىڭ شتاب باستىعى پودپولكوۆنيك باقىت راحىمباەۆ.
"ادىرنا" ۇلتتىق پورتالى
