SOS!!! توتەنشە جاعداي – حالىقتى قورعاۋ!- پرەزيدەنتكە بەسەۋدىڭ اشىق حاتى!
قازاقستان رەسپۋبليكاسىنىڭ پرەزيدەنتى ق.ك.توقاەۆ مىرزاعا
قۇرمەتتى قاسىم-جومارت كەمەلۇلى!
ءبىز، ءبىر توپ زيالى قاۋىم وكىلدەرى ەلىمىزدە COVID-19 ىندەتىنىڭ، ونىڭ وزگەرىسكە ۇشىراعان پنەۆمونيالىق ءتۇرىنىڭ ورشۋىنە بايلانىستى ءسىزدىڭ اتىڭىزعا ۇندەۋ جاساۋعا ءماجبۇرمىز.
الەۋمەتتىك جەلىلەردەن ءتۇسىپ جاتقان دەرەكتەرگە قاراعاندا قازاقستان كوروناۆيرۋس دەرتىنىڭ تارالۋى جاعىنان الەمدە ءبىرىنشى ورىنعا شىققان. سوڭعى اپتادا جۇقپالى ىندەتتەن قازا بولعاندار سانى دا كۇرت ارتىپ بارا جاتقانىن كورىپ وتىرمىز. رەسمي دەرەك كوزدەرى ادام شىعىندارى تۋرالى دەرەكتەردى تسەنزۋرالاپ تاستادى. الايدا تەك جۋرناليستەر مەن جازۋشىلار، مادەنيەت قايراتكەرلەرى اراسىنان از ۋاقىتتا اتى بەلگىلى قىرىققا جۋىق ادامنىڭ كوز جۇمعانى احۋالدىڭ كۇردەلەنىپ كەتكەنىن كورسەتەدى. سوندا قاراپايىم حالىقتىڭ ىشىندە نە بولىپ جاتىر؟ ءبىر اۋىلدا ءبىر كۇندە ءۇش-ءتورت جانازا بولىپ جاتقانى جان شوشىتادى. ءبىر وتباسىنان ەكى-ءۇش ادام، ءتىپتى ءتورت ادامعا دەيىن قاۋىپتى تاجال تىرناعىنا ىلىنگەندەرى دە كەزدەسۋدە. اۋرۋحانالار بولسا لىق تولى، اۋرۋلاردى قابىلدامايدى. شاقىرتۋلاردىڭ كوپشىلىگىنەن «جەدەل جاردەم» ۇلگەرە الماۋدا. اپتەكالاردا – ءدارى تاپشىلىعى. بار ءدارى-دارمەكتىڭ باعاسى شارىقتاپ بارادى. ازىق-تۇلىك تاۋارلارىنا دا باعانىڭ ارتىپ كەتكەنىن بايقاپ وتىرمىز. حالىق كوروناۆيرۋسپەن كۇرەستە قاۋىپپەن بەتپە بەت قالىپ وتىر.
جاعداي باقىلاۋدان شىعىپ بارادى!
قالىپتاسقان قيىن احۋالعا بايلانىستى سىزدەن قازاقستان اۋماعىندا جەدەل تۇردە قايتادان توتەنشە جاعداي ەنگىزۋىڭىزدى، كارانتيندىك رەجيمدى كۇشەيتۋدى، فارماتسەۆتيكا سالاسىنا باقىلاۋدى ارتتىرىپ، ءدارى-دارمەك تاپشىلىعىن جويۋدى، ءدارى-دارمەك نارىعىندا باعانى قولدان كوتەرىپ وتىرعاندارعا قاتاڭ جازالاۋ شارالارىن قولدانۋدى تالاپ ەتەمىز. ۇيدە ەمدەلىپ جاتقاندارعا ون-لاين تۇردە ورتالىقتاندىرىلعان دارىگەرلىك كەڭەس ۇيىمداستىرىلعانى دا ءجون بولار ەدى.
سونداي-اق حالىققا الەۋمەتتىك كومەك جاساۋ ماسەلەسى قاراستىرىلعانى اسا وزەكتى. جۇمىسى توقتاپ قالعان شاعىن جانە ورتا كاسىپكەرلىك تە مەملەكەت قولداۋىنا مۇقتاج. قالايدا پاندەمياعا قارسى جەدەل شارالار قابىلدانۋى قاجەت!
قول قويۋ جالعاسۋدا.
قۇرمەتپەن،
سماعۇل ەلۋباي،
جازۋشى، كينودراماتۋرگ، قازاقستاننىڭ ەڭبەك سىڭىرگەن قايراتكەرى، پروفەسسور، (اۋرۋحانادان);
بەيبىت قويشىباي،
جازۋشى، قوعام قايراتكەرى;
قازىبەك يسا، اقىن، حالىقارالىق الاش سىيلىعىنىڭ يەگەرى، حالىقارالىق س.ەسەنين اتىنداعى سىيلىقتىڭ لاۋرەاتى، قر پرەزيدەنتى جانىنداعى ۇلتتىق كەڭەس مۇشەسى;
مارات توقاشباەۆ،
جازۋشى-پۋبليتسيست، قازاقستان پەداگوگيكالىق عىلىم اكادەمياسىنىڭ اكادەميگى، پروفەسسور;
جۇبانىش جەكسەنۇلى، ءانشى، قازاقستاننىڭ ەڭبەك سىڭىرگەن قايراتكەرى.
