جەكە كۇزەتىن قىرىق قىزدان جاساقتاعان كاددافي

4033

ءوزىنىڭ جەكە كۇزەتىن پاك، مانيكيۋرى ادەمى 40 قىزدان جاساقتاعان، شەتەلگە ىسساپارعا شىققاندا ءسۇتىن ءىشۋ ءۇشىن تۇيە الىپ جۇرگەن مۋاممار كاددافي سيرت قالاسىنىڭ ماڭىندا كوشپەندى بەدۋيندەر وتباسىندا دۇنيەگە كەلگەن. ءال-كادداف تايپاسىنان. ءۇيدىڭ كەنجەسى ءارى جالعىز ۇل. اكە-شەشەسى كوشىپ جۇرگەندە بىرنەشە مەكتەپ اۋىستىرىپ، ينتەرناتتا وقيدى.

بۇل تۋرالى مۋامماردىڭ اكەسى: «ۇلىمدى وقىتۋ ءۇشىن قالادان باسپانا تاۋىپ بەرە المادىم. تاپسىرىپ كەتەتىن تانىستارىم دا بولمادى. ول مەشىتتە تۇنەپ، دەمالىس كۇندەرى ۇيگە 30 شاقىرىم جولدى جاياۋ ءجۇرىپ كەلەتىن. كانيكۋلىن ءبىزدىڭ قاسىمىزدا، ءشول دالاداعى پالاتكالاردا وتكىزەتىن»-دەپ ەسكە الادى.

وقۋشى كەزىنەن جاسىرىن ساياسي ۇيىمدارعا مۇشە بولىپ، 27 جاسىندا مونارحيانى قانتوگىسسىز قۇلاتىپ، پولكوۆنيك شەنىن العان. سودان ون جىل بويى ەلدەگى جالعىز پولكوۆنيك سانالعان. رەسمي تۇردە ەشقاشان ەل پرەزيدەنتى بولماعان. بار رەسمي لاۋازىمى – ليۆيا رەۆوليۋتسياسىنىڭ جەتەكشىسى. بىراق 42 جىل بويى ليۆيانى دە-فاكتو بيلەگەن ادام❗️

‼️ سۇحباتتارىندا كوپ ايەل الۋدى قۇپتاماي، ءبىر ايەلمەن شەكتەلۋدى ناسيحاتتاسا دا، وققاعار قىزداردىڭ قىزىعىن ۇلدارىمەن بىرگە كورگەن دەسەدى... 40 قىزدان قۇرالعان جاساققا تەك ادال ءارى ادەمى قىزدار تاڭداپ الىنعان. ولاردان ۇنەمى ءبىز وكشە كيىپ، سوڭعى ۇلگىمەن ساندەنىپ، ادەمى ماكياج بەن مانيكيۋر جاساتىپ ءجۇرۋدى تالاپ ەتكەن جانە بارىنە كالاشنيكوۆ اۆتوماتىن ۇستاتقان.

كوزگە ەرەكشە تۇسەتىن ەكستراۆاگەنتتى كيىمدەرگە اۋەس ديكتاتور جاس كورىنۋ ءۇشىن الەمگە ايگىلى دارىگەرلەرگە بىرنەشە رەت پلاستيكالىق وتا دا جاساتقان.

التىندى جاقسى كورگەنى سونشالىق ساعات، ديۆان، قاسىق سىندى كۇندەلىكتى تۇرمىستا قولداناتىن زاتتارىنان باستاپ اۆتوماتىنا دەيىن التىنمەن اپتاتىپتى. ءتىپتى ءوزىنىڭ قاق ماڭدايىنا تيگەن وق تا ءوزىنىڭ التىن تاپانشاسىنان اتىلعان دەيدى❗️

شەتەلگە بارعان ءىسساپارلارىندا تۇيەدەن بولەك، بەدۋيندەردىڭ شاتىرىن الا جۇرەتىن بولعان. رەسمي كەزدەسۋلەردى دە سوندا وتكىزگەن.

زامانداستارى ديكتاتوردىڭ جۇمىس قابىلەتى وتە زور بولعانىن، كۇنىنە 16-18 ساعاتتان جۇمىس ىستەگەنىن ايتادى. كۇتىمگە كىرپياز بولماعان، اسكەتتىك ءومىر سالتىن ۇستانعان. ىشىمدىك اتاۋلىنى تاتىپ الماعان، شىلىم شەكپەگەن. وتە از تاماقتانعان، شاي مەن كوفە ىشپەگەن، ءتىپتى ءبىر كەزدەرى ۆەگەتاريان بولىپ تا كورگەن. اتقا مىنگەندى، اڭعا شىققاندى، كىتاپ وقىعاندى جانە ينتەرنەتتى جاقسى كورىپتى. ال ءبىر كورگەن ادامىن جازباي تانىپ، ونىڭ قولىنان نە كەلەتىنىن بىردەن شامالاعان دەسەدى.

جەكە ءومىرى:

الەمدەگى كوپ بالالى ديكتاتور اكەلەردىڭ ءبىرى. ءبىرىنشى ايەلى فاتيما – ليۆيا مونارحى ىدىرىستىڭ ۇزەڭگىلەس سەرىكتەرىنىڭ ءبىرى، بەدەلدى گەنەرالدىڭ قىزى. بۇل نەكەدەن مۇحاممەد اتتى جالعىز ۇلى بار. بايبىشەسىمەن ۇزاق وتاسپاعان، اينالاسى ءبىر-ەكى جىلدىڭ ىشىندە اجىراسقان. وزىنەن ون جاس كىشى ەكىنشى ايەلى، مەدبيكە سافيا فاركاشپەن سوقىرىشەك بولىپ، اۋرۋحاناعا تۇسكەندە تانىسىپ، ءبىر جىلعا جەتپەي ۇيلەنەدى. سافيادان التى ۇل، ءبىر قىز سۇيگەن. ءوزىنىڭ سەگىز بالاسىنان بولەك اسىراپ العان تاعى ەكى بالاسى بار. اتى شۋلى بالالارى دا اكە بايلىعىنىڭ ارقاسىندا استا توك ءومىر سۇرگەن. قىزى 2004 جىلى ساددام حۋسەيندى قورعاعان ادۆوكاتتاردىڭ ءبىرى. ەكى ۇلى، كۇيەۋ بالاسى جانە ءۇش جاسقا تولماعان ءۇش نەمەرەسى 2011 جىلى رەجيمى قۇلاعان كەزدە شابۋىلدان قازا تابادى. كوتەرىلىسشىلەر ءبىر ۇلىنىڭ ءمايىتىن قازىپ الىپ، قورلاپ، ورتەپ جىبەرگەن.

قارۋلى قاقتىعىس ءجۇرىپ جاتقان كەزدە جانىندا بولعان سەرىكتەرىنىڭ ءبىرى كەيىن سول ساتتەرىن بىلاي دەپ ەسكە الادى: «ول قاپالى، اشۋلى، ىزالى ەدى. كەيدە ءتىپتى بىزگە ەسىنەن الجاسقانداي كورىندى. ەل استاناسى قۇلاعاننان كەيىن دە ليۆيا حالقىنىڭ ءوزىن ءالى دە جاقسى كورەتىنىنە سەنىمدى بولاتىن. ەشقايدا بايلانىسقا شىعا المادى. اس-سۋىمىز، ءدارى-دارمەگىمىز از ەدى. بلوكنوتىنا الدەنەلەردى ءتۇرتىپ، وزىنە شاي قايناتىپ الىپ وتىردى. قارۋلى كۇرەسكە ارالاسپادى. قورعانىس شەبىن ۇلدارى باسقاردى. كاددافيدىڭ ءوزى ەشتەڭە جوسپارلامادى. ەش جوسپارى دا جوق ەدى. كىشكەنتاي بولمەنىڭ ىشىندە ارى-بەرى ءجۇردى دە قويدى. ءبىز جەتكەن جەرىمىزدىڭ وسى ەكەنىن بىلدىك. كاددافي: «مەنى حالىقارالىق قىلمىستىق سوت ىزدەستىرۋدە. مەنى ەشبىر مەملەكەت قابىلدامايدى. ليۆيالىقتاردىڭ قولىنان ولگەنىم جاقسى»-دەدى.

ءولىمى:

كوپ ۇزاماي ءوزى مۇراگەرى ساناعان مۋتاززيم اتتى ۇلىمەن بىرگە كوتەرىلىسشىلەردىڭ قولىنا تۇسەدى. اشۋلى توپ ونى قورشاپ الىپ، كاددافيدىڭ: «ارام… ارام… ۇياتتارىڭ قايدا؟! كۇنا جاساپ تۇرعاندارىڭدى كورمەي تۇرسىڭدار ما؟!»-دەگەن سوزدەرىنە قاراماي اۋاعا وق اتىپ، اۆتوماتتارىمەن ۇرىپ، يت قورلىقپەن ولتىرەدى. كەيىن ۇلى ەكەۋىنىڭ ءمايىتى كوكونىسكە ارنالعان توڭازىتقىشقا سالىنىپ، ميسۋراتتاعى ساۋدا ورتالىعىنا جۇرت نازارىنا قويىلعان. بىرنەشە كۇننەن كەيىن قۇپيا تۇردە جەرلەنەدى.

بيلىككە كەلگەننەن كەيىن ەلدىڭ زاڭىن تۇگەلدەي شاريعات ەرەجەلەرىنە نەگىزدەپ، ىشىمدىك پەن قۇمار ويىندارىنا تىيىم سالىپ، اي مەن جىل اتاۋىن وزگەرتىپ، جىل ساناۋدى مۇحاممەد پايعامباردىڭ (س.ع.س) قايتقان جىلىنان باستاپ جۇرگىزگەن، مونارحيا كەزەڭىندە كوش سوڭىندا قالعان ليۆيانى ايماقتاعى الدىڭعى قاتارلى مەملەكەتتەردىڭ ساپىنا قوسقان كاددافيدىڭ ولىمىنەن كەيىن بۇل مەملەكەت ءىس جۇزىندە قايتادان بىرنەشە بولىككە ءبولىنىپ كەتەدى.

اقبوتا ءابىلتاي

پىكىرلەر
رەداكتسيا تاڭداۋى