Óziniń jeke kúzetin pák, manıkıýri ádemi 40 qyzdan jasaqtaǵan, shetelge issaparǵa shyqqanda sútin ishý úshin túıe alyp júrgen Mýammar Kaddafı Sırt qalasynyń mańynda kóshpendi bedýınder otbasynda dúnıege kelgen. Ál-Kaddaf taıpasynan. Úıdiń kenjesi ári jalǵyz ul. Áke-sheshesi kóship júrgende birneshe mektep aýystyryp, ınternatta oqıdy.
Bul týraly Mýammardyń ákesi: «Ulymdy oqytý úshin qaladan baspana taýyp bere almadym. Tapsyryp ketetin tanystarym da bolmady. Ol meshitte túnep, demalys kúnderi úıge 30 shaqyrym joldy jaıaý júrip keletin. Kanıkýlyn bizdiń qasymyzda, shól daladaǵy palatkalarda ótkizetin»-dep eske alady.
Oqýshy kezinen jasyryn saıası uıymdarǵa múshe bolyp, 27 jasynda monarhııany qantógissiz qulatyp, polkovnık shenin alǵan. Sodan on jyl boıy eldegi jalǵyz polkovnık sanalǵan. Resmı túrde eshqashan el prezıdenti bolmaǵan. Bar resmı laýazymy – Lıvııa revolıýııasynyń jetekshisi. Biraq 42 jyl boıy Lıvııany de-fakto bılegen adam❗️
‼️ Suhbattarynda kóp áıel alýdy quptamaı, bir áıelmen shektelýdi nasıhattasa da, oqqaǵar qyzdardyń qyzyǵyn uldarymen birge kórgen desedi... 40 qyzdan quralǵan jasaqqa tek adal ári ádemi qyzdar tańdap alynǵan. Olardan únemi biz ókshe kıip, sońǵy úlgimen sándenip, ádemi makııaj ben manıkıýr jasatyp júrýdi talap etken jáne bárine Kalashnıkov avtomatyn ustatqan.
Kózge erekshe túsetin ekstravagentti kıimderge áýes dıktator jas kóriný úshin álemge áıgili dárigerlerge birneshe ret plastıkalyq ota da jasatqan.
Altyndy jaqsy kórgeni sonshalyq saǵat, dıvan, qasyq syndy kúndelikti turmysta qoldanatyn zattarynan bastap avtomatyna deıin altynmen aptatypty. Tipti óziniń qaq mańdaıyna tıgen oq ta óziniń altyn tapanshasynan atylǵan deıdi❗️
Shetelge barǵan issaparlarynda túıeden bólek, bedýınderdiń shatyryn ala júretin bolǵan. Resmı kezdesýlerdi de sonda ótkizgen.
Zamandastary dıktatordyń jumys qabileti óte zor bolǵanyn, kúnine 16-18 saǵattan jumys istegenin aıtady. Kútimge kirpııaz bolmaǵan, askettik ómir saltyn ustanǵan. Ishimdik ataýlyny tatyp almaǵan, shylym shekpegen. Óte az tamaqtanǵan, shaı men kofe ishpegen, tipti bir kezderi vegetarıan bolyp ta kórgen. Atqa mingendi, ańǵa shyqqandy, kitap oqyǵandy jáne ınternetti jaqsy kóripti. Al bir kórgen adamyn jazbaı tanyp, onyń qolynan ne keletinin birden shamalaǵan desedi.
Jeke ómiri:
Álemdegi kóp balaly dıktator ákelerdiń biri. Birinshi áıeli Fatıma – Lıvııa monarhy Ydyrystyń úzeńgiles serikteriniń biri, bedeldi generaldyń qyzy. Bul nekeden Muhammed atty jalǵyz uly bar. Báıbishesimen uzaq otaspaǵan, aınalasy bir-eki jyldyń ishinde ajyrasqan. Ózinen on jas kishi ekinshi áıeli, medbıke Safııa Farkashpen soqyrishek bolyp, aýrýhanaǵa túskende tanysyp, bir jylǵa jetpeı úılenedi. Safııadan alty ul, bir qyz súıgen. Óziniń segiz balasynan bólek asyrap alǵan taǵy eki balasy bar. Aty shýly balalary da áke baılyǵynyń arqasynda asta tók ómir súrgen. Qyzy 2004 jyly Saddam Hýseındi qorǵaǵan advokattardyń biri. Eki uly, kúıeý balasy jáne úsh jasqa tolmaǵan úsh nemeresi 2011 jyly rejımi qulaǵan kezde shabýyldan qaza tabady. Kóterilisshiler bir ulynyń máıitin qazyp alyp, qorlap, órtep jibergen.
Qarýly qaqtyǵys júrip jatqan kezde janynda bolǵan serikteriniń biri keıin sol sátterin bylaı dep eske alady: «Ol qapaly, ashýly, yzaly edi. Keıde tipti bizge esinen aljasqandaı kórindi. El astanasy qulaǵannan keıin de Lıvııa halqynyń ózin áli de jaqsy kóretinine senimdi bolatyn. Eshqaıda baılanysqa shyǵa almady. As-sýymyz, dári-dármegimiz az edi. Bloknotyna áldenelerdi túrtip, ózine shaı qaınatyp alyp otyrdy. Qarýly kúreske aralaspady. Qorǵanys shebin uldary basqardy. Kaddafıdiń ózi eshteńe josparlamady. Esh jospary da joq edi. Kishkentaı bólmeniń ishinde ary-beri júrdi de qoıdy. Biz jetken jerimizdiń osy ekenin bildik. Kaddafı: «Meni Halyqaralyq qylmystyq sot izdestirýde. Meni eshbir memleket qabyldamaıdy. Lıvııalyqtardyń qolynan ólgenim jaqsy»-dedi.
Ólimi:
Kóp uzamaı ózi murageri sanaǵan Mýtazzım atty ulymen birge kóterilisshilerdiń qolyna túsedi. Ashýly top ony qorshap alyp, Kaddafıdiń: «Aram… Aram… Uıattaryń qaıda?! Kúná jasap turǵandaryńdy kórmeı tursyńdar ma?!»-degen sózderine qaramaı aýaǵa oq atyp, avtomattarymen uryp, ıt qorlyqpen óltiredi. Keıin uly ekeýiniń máıiti kókóniske arnalǵan tońazytqyshqa salynyp, Mısýrattaǵy saýda ortalyǵyna jurt nazaryna qoıylǵan. Birneshe kúnnen keıin qupııa túrde jerlenedi.
Bılikke kelgennen keıin eldiń zańyn túgeldeı sharıǵat erejelerine negizdep, ishimdik pen qumar oıyndaryna tyıym salyp, aı men jyl ataýyn ózgertip, jyl sanaýdy Muhammed Paıǵambardyń (s.ǵ.s) qaıtqan jylynan bastap júrgizgen, monarhııa kezeńinde kósh sońynda qalǵan Lıvııany aımaqtaǵy aldyńǵy qatarly memleketterdiń sapyna qosqan Kaddafıdiń óliminen keıin bul memleket is júzinde qaıtadan birneshe bólikke bólinip ketedi.
Aqbota Ábiltaı
