الماتىلىقتار تۋىستارىن جەرلەي الماي وتىر (ۆيدەو)

1911

الماتىدا قايتىس بولعان ادامداردى تۋىستارى جەرلەي الماي وتىر. كەي ازاماتتار ءتىپتى اقىمىنا دەيىن قازىپ قويعان. الايدا سوت ساراپتامالىق ينستيتۋتى وكىلدەرى ولگەن ادامداردىڭ دەنەسىن بەرمەگەن. بار گاپ "كورونوۆيرۋستان قايتىس بولماعان" دەگەن انىقتامادا ەكەن، دەپ حابارلايدى zakon.kz ەۋرازيا ءبىرىنشى ارناسىنا سىلتەمە جاساپ.

قالادا ساراپتاما ورتالىقتارى كارانتينگە جابىلىپ قالىپتى. اتىراۋ، شىمكەنت، الماتى وبلىستارىنا اپارىپ جەرلەۋدى كوزدەپ وتىرعان ازاماتتار ولگەن ادامداردىڭ دەنەسى بۇزىلىپ كەتەتىن بولدى دەپ دابىل قاعۋدا. ءيىسى شىعىپ كەتپەۋى ءۇشىن ەڭ بولماسا سالقىن جەرگە جاتقىزا تۇرايىق دەسە، ورتالىق ءمايىتحانا مارقۇمداردىڭ دەنەسىن قابىلداۋدان باس تارتىپتى.

تۋىستارى قايتىس بولعان ازاماتتار الماتى قالاسى بويىنشا سوت ساراپتامالىق ينستيتۋتىنا كەلىپ، شۋ شىعاردى. كەي ازاماتتاردىڭ تۋىستارى ۇيىندە قايتىس بولىپتى. كۇننىڭ ىستىڭىندا دەنەسى بۇزىلىپ بارادى، ءۇيىمىز ولىك ساسىپ كەتەتىن بولدى دەپ دابىل قاعۋدا.

ەكاتەرينا حوليۋچەنكو، قالا تۇرعىنى:

"كەشە ءبىزدىڭ 80 جاستاعى اپامىز قايتىس بولدى. ساراپشى كەلىپ COVID-19 سىناما الىپ مايىتكە ەشكىم جاقىنداماسىن دەپ ايتتى. اپامىزدىڭ دەنەسى ۇيدە. ەندى ەشقانداي سالتتىق قىزمەت وكىلدەرى دە جولاي الماۋدا".

تۇرعىنداردىڭ كەيبىرى قايتىس بولعان جاقىندارىنىڭ دەنەسىن بۇزىلىپ كەتپەۋ ءۇشىن سوت ساراپتامالار ينستيتۋتىنا وتكىزىپتى. الايدا تەست قورتىندىسى شىقپاعان سوڭ ءمايىتتى دە بەرمەي جاتىر ەكەن. كەي ازاماتتار تۋعان جەرلەرىنە دە اپارىپ جەرلەۋدى كوزدەيدى. ارالارىندا اتىراۋ، شىعىس قازاقستان وبلىسى، شىمكەنت، تالدىقورعان قالاسىنا اپارعىسى كەلەتىندەر بار. ەگەر ساراپتاما تەزدەتىپ جۇرگىزىلمەسە، ولگەن ادامنىڭ دەنەسى بۇزىلىپ كەتەتىن بولدى دەپ اشىنۋدا. ءتىپتى جەرىن الىپ، اقىمىن قازىپ تا قويعاندار دا بار.

مۇرات قۇسايىنوۆ، قالا تۇرعىنى:

"ەشقايدا بارا الماي جاتىرمىز جەرلەۋگە. ەشقانداي، ەشكىمنەن كومەك جوق. مىنا كەشە كەلىپ ارەڭ وتكىزدىك. ەكى كۇننەن كەيىن. ساسىپ كەتتى ۇيدە. ەندى سونى الا الماي جاتىرمىز. اناليز كەلمەي جاتىر. ەش جەر قابىلداماي جاتىر".

جانات يمانباەۆا، قالا تۇرعىنى:

"اۋىلدىڭ تۋىسقاندارى جەرىن قازىپ، اقىمىن قازىپ كۇتىپ جاتىر. جەرگە تاپسىراتىن كۇنى نەگىزى قازاقتاردىڭ نەسى بويىنشا. سول ءمايىتتىڭ ءوزىن جەتكىزۋ 4 ساعات الادى. وسى نەمەن وسىندا ءجۇرمىز. كەشە دە ادام كوپ بولدى. بۇگىن دە الا الماي ءجۇر سۇيەكتەرىن".

ەربول مولداباەۆ، قالا تۇرعىنى:

"دوسىمنىڭ كەلىنشەگى قايتىس بولىپ ەدى. بۇگىن ءۇشىنشى تاۋلىك ءالى الا الماي وتىرمىز ولىكتى. ءبىز شىمكەنتكە لەنگەرگە الىپ كەتۋىمىز كەرەك. ۋجە 3 سۋتكا بولدى اندا بار، اكيماتقا بار دەيدى. بارساڭ ءار جاققا جۇمساي بەرەدى. بىلمەيمىز نە ىستەرىمىزدى. سۇيەك ناعىپ، بۇزىلىپ بارا جاتىر".

مايىتتەردەن الىنعان بيو ماتەريالدارعا ساراپتاما جۇرگىزەتىن ۇلتتىق ساراپتاما ورتالىعىنىڭ ءوزى كارانتيگە جابىلىپ قالىپتى. ساراپتاما جۇرگىزىلمەيدى. ءارى قايعىرىپ، ءارى انىقتاما الا الماعاندار ورتالىققا بارىپ ماردىمدى جاۋاپ الا المادى. سوت ساراپتاما ينستيتۋتىنىڭ ماماندارىنان سۇحبات الۋ مۇمكىن بولمادى. تەلەون ارقىلى ارەڭ جاۋاپ بەرگەن وكىلدەرى ءمايىتحانادا وننان استام دەنە بار ەكەنىن جەتكىزدى. زەرتتەۋ قورتىندىلارى بولماعان سوڭ دەنەلەرىن بەرە الماي وتىرمىز دەپ اقتالدى.

جامبىل بەكجانوۆ، سوت ساراپتامالار ورتالىعىنىڭ وكىلى:

"قازىر ءبىزدىڭ ءمايىتحانادا 13 دەنە جاتىر. ونىڭ ىشىندە 10 دەنەدە كوۆيد ناتيجەلەرى جوق. زەرتتەۋ سپاراۆكالارى بولماسا دا ءبىز قابىلدايمىز. قازىرگى ۋاقىتتا ەڭ پروبلەماسى رەزۋلتاتى. كوۆيد بويىنشا زەرتتەۋ. ونى دەنساۋلىق ساقتاۋ مينيسترلىگىنە قارايتىن زەرتحانالار ىستەيدى".

ۇلتتىق ساراپتاما ورتالىعىنىڭ وكىلدەرى بۇگىن ەلىمىزدىڭ باس مەملەكەتتىك سانيتار دارىگەرى "اۋرۋحانادان تىس جەردە قايتىس بولعان ادامداردىڭ دەنەلەرى كوروناۆيرۋس انىقتاماسىنسىز جەرلەنەدى" دەگەن قاۋلىعا قول قويعانىن جەتكىزدى. الايدا سوت ساراپتامالار ورتالىقتارىنا ءالى نۇسقاۋ بەرىلمەگەن. سوندىقتان ءالى ەشكىمگە تۋىستارىنىڭ ءمايىتى بەرىلمەپتى.

 

 

 

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket