قارالى حابار. بەيسەن قۇرانبەكتىڭ اناسى ومىردەن وزدى

9060
Adyrna.kz Telegram

جۋىردا عانا ومىردەن وزعان بەلگىلى جۋرناليست بەيسەن قۇرانبەكتىڭ اناسى دا بۇ دۇنيەمەن قوشتاستى. سۋىق حابار الەۋمەتتىك جەلىدە جەلدەي ەستى.

"بەيسەن قۇرانبەكتىڭ تۋعان شەشەسى دۇنيەدەن وزدى دەگەن سۋىق حابار كەلدى. قۇرانبەك اۋلەتىنە اللا سابىر بەرسىن! اعايدىڭ ارتىنان اناسى دا اتتانىپتى. اعايىن-تۋىستارى، جەك-جۇراعاتتارىنا قايعىرىپ كوڭىل ايتامىز! انا جۇرەك توقتاپتى! بارشا قۇرانبەك اۋلەتىنە اللا ۇلكەن سابىر بەرسىن", - دەپ جازدى فەيسبۋك پاراقشاسىندا جۋرناليست ءو.ابدىحالىق.

ەسبولات ايدابوسىن:

-ءاي، سەنىڭ "قاتەلىگىڭ" جاقسى بولدى-ەي، كەشە كۇنى بويى ءوز ومىرىمدەگى قاتەلىكتەردى جىپكە ءتىزدىم. سەن سۇراي قالسا نە دەپ جاۋاپ بەرەمىن سونى ويلاندىم.
-- سۇحبات بەرسەڭىزشى وندا؟!
-- ءتورت سۇراعىڭا بىلاي جاۋاپ بەردىم. ادامزاتتىڭ قاتەلىگى --ادام ءبىرىنىڭ ەتىن ءبىرى جەپ جاتىر. قاسقىر دا قاس قىلمايدى جولداسىنا. ال، ادام اڭنان بەتەر جىرتقىش بوپ كەتتى. ۇلت قاتەلىگى -- اۋىزبىرلىك كەتىپ قالدى. بىرلەسىپ ءبىر ءىس قىلا المايمىز. ءبىزدىڭ قاتەلىك -- جاۋاپكەرشىلىكتى سەزىنە المادىق. ءوز مىندەتىمىزدى تولىق اتقارا المادىق، سەندەرگە ۇلگى كورسەتىپ كەتۋىمىز كەرەك ەدى، باستارىڭدى قوسىپ جولعا سالىپ كەتۋىمىز كەرەك ەدى. وكىنىشكە قاراي سونى ىستەي المادىق. ال، مەنىڭ قاتەلىگىم -- باستان اسادى،-- دەپ قولىمەن توبەسىن كورسەتتى. -- ەڭ ءبىرىنشى قاتەلىگىم نە بىلەسىڭ بە؟
--جوق.
--ەڭ ءبىرىنشى قاتەلىگىم اكە-شەشەمدى مويىنداماعانىم ەكەن. شال مەن كەمپىردىڭ بالاسى بولدىم. مەكتەپتە جۇرگەندە اتام قايتتى. ول كىسى كەتكەن سوڭ "سەن ءبىزدىڭ ءۇيدىڭ بالاسى ەدىڭ" دەگەن اڭگىمە شىعا باستادى. سول كەزدە مەن قىرعىن سالدىم. كادىمگىدەي شايقاستىم. بارماي قويدىم. سونىم قاتە بولعان ەكەن. بارماسام دا "اكە-شەشە" دەپ ايتا سالۋىم كەرەك ەدى. ولارعا سول عانا كەرەك ەكەن. مەن سونى ايتپاي قويدىم عوي قىرسىعىپ، "كوكە، تاتە" دەپ كەتتىم. كەيىنننەن ەرجەتىپ، سۇيەك قاتايعان سوڭ قيىن بولادى ەكەن، ايتا الماي قالادى ەكەنسىڭ. ايتا الماعان سوڭ ارادا سۋىقتىق پايدا بولادى ەكەن. وسىلايشا ولار ءوز بالالارىن "بالام" دەي الماي، مەن ءوز انامدى "انا" دەي الماي قالدىم. بۇل مەنىڭ ومىرىمدەگى ءبىرىنشى قاتەلىگىم.

P.S. ءبىر كوڭىلىن سۇراي بارعاندا بەيسەن اعام وسىلاي دەپ ەدى. بۇگىن ومىرگە بەيسەندەي ۇلدى اكەلىپ، بىراق ەنەنىڭ قاس-قاباعىنا قاراپ، كوڭىلىنە كىربىڭ تۇسىرمەيىن دەگەن ويمەن "بالام" دەپ ەمىرەنە الماي كەتكەن ياماليعا (زياش) انامىز 73 جاسىندا باقيلىققا اتتانىپتى. ەرتەڭگى كۇن بەيساعاڭنىڭ قىرقىنا قامدانىپ وتىرعانبىز. ساعات 12.00 گە قۇدايى تاماق بەرىلەتىن دە ەدى. امال نە، قايعى ۇستىنە قايعى جامالدى. يمانى جولداس بولسىن!

"ادىرنا" ۇلتتىق پورتالى قۇرانبەك اۋلەتىنىڭ تۋىستارىنا، قالىڭ قازاققا قايعىرىپ كوڭىل ايتادى.

 

پىكىرلەر