Qaraly habar. Beısen Quranbektiń anasy ómirden ozdy

9061
Adyrna.kz Telegram

Jýyrda ǵana ómirden ozǵan belgili jýrnalıst Beısen Quranbektiń anasy da bu dúnıemen qoshtasty. Sýyq habar áleýmettik jelide jeldeı esti.

"Beısen Quranbektiń týǵan sheshesi dúnıeden ozdy degen sýyq habar keldi. Quranbek áýletine Alla sabyr bersin! Aǵaıdyń artynan anasy da attanypty. Aǵaıyn-týystary, jek-juraǵattaryna qaıǵyryp kóńil aıtamyz! Ana júrek toqtapty! Barsha Quranbek áýletine Alla úlken sabyr bersin", - dep jazdy feısbýk paraqshasynda jýrnalıst Ó.Ábdihalyq.

Esbolat Aıdabosyn:

-Áı, seniń "Qateligiń" jaqsy boldy-eı, keshe kúni boıy óz ómirimdegi qatelikterdi jipke tizdim. Sen suraı qalsa ne dep jaýap beremin sony oılandym.
-- Suhbat berseńizshi onda?!
-- Tórt suraǵyńa bylaı jaýap berdim. Adamzattyń qateligi --adam biriniń etin biri jep jatyr. Qasqyr da qas qylmaıdy joldasyna. Al, adam ańnan beter jyrtqysh bop ketti. Ult qateligi -- aýyzbirlik ketip qaldy. Birlesip bir is qyla almaımyz. Bizdiń qatelik -- jaýapkershilikti sezine almadyq. Óz mindetimizdi tolyq atqara almadyq, senderge úlgi kórsetip ketýimiz kerek edi, bastaryńdy qosyp jolǵa salyp ketýimiz kerek edi. Ókinishke qaraı sony isteı almadyq. Al, meniń qateligim -- bastan asady,-- dep qolymen tóbesin kórsetti. -- Eń birinshi qateligim ne bilesiń be?
--Joq.
--Eń birinshi qateligim áke-sheshemdi moıyndamaǵanym eken. Shal men kempirdiń balasy boldym. Mektepte júrgende atam qaıtty. Ol kisi ketken soń "sen bizdiń úıdiń balasy ediń" degen áńgime shyǵa bastady. Sol kezde men qyrǵyn saldym. Kádimgideı shaıqastym. Barmaı qoıdym. Sonym qate bolǵan eken. Barmasam da "áke-sheshe" dep aıta salýym kerek edi. Olarǵa sol ǵana kerek eken. Men sony aıtpaı qoıdym ǵoı qyrsyǵyp, "kóke, táte" dep kettim. Keıinnnen erjetip, súıek qataıǵan soń qıyn bolady eken, aıta almaı qalady ekensiń. Aıta almaǵan soń arada sýyqtyq paıda bolady eken. Osylaısha olar óz balalaryn "balam" deı almaı, men óz anamdy "ana" deı almaı qaldym. Bul meniń ómirimdegi birinshi qateligim.

P.S. Bir kóńilin suraı barǵanda Beısen aǵam osylaı dep edi. Búgin ómirge Beısendeı uldy ákelip, biraq eneniń qas-qabaǵyna qarap, kóńiline kirbiń túsirmeıin degen oımen "balam" dep emirene almaı ketken Iamalıǵa (Zııash) anamyz 73 jasynda baqılyqqa attanypty. Erteńgi kún Beısaǵańnyń qyrqyna qamdanyp otyrǵanbyz. Saǵat 12.00 ge qudaıy tamaq beriletin de edi. Amal ne, qaıǵy ústine qaıǵy jamaldy. Imany joldas bolsyn!

"Adyrna" ulttyq portaly Quranbek áýletiniń týystaryna, qalyń qazaqqa qaıǵyryp kóńil aıtady.

 

Pikirler