اقپارات جانە قوعامدىق دامۋ مينيسترلىگى وتباسىنداعى زورلىق-زومبىلىقتى جويۋ ماسەلەسىن تالقىلاۋ ماقساتىندا ونلاين-بريفينگ ۇيىمداستىردى. وعان ءماجىلىس دەپۋتاتتارى، قوعام بەلسەندىلەرى، ۇكىمەتتىك ەمەس ۇيىمداردىڭ وكىلدەرى قاتىستى. بۇل تۋرالى "تەنگرنەۋس" حابارلادى.
"الەمدەگى بۇل پروبلەما جىل سايىن ءبىزدىڭ قوعامدا دا وزەكتى بولىپ كەلە جاتقانى وكىنىشتى. قر باس پروكۋراتۋراسى قۇقىقتىق ستاتيستيكا جانە ارنايى ەسەپكە الۋ كوميتەتىنىڭ دەرەكتەرىنە سۇيەنسەك، 2017 جىلى 446, 2018 جىلى 919, 2019 جىلى مىڭنان استام وتباسىلىق زورلىق-زومبىلىق بولعان. ەپيدەميا باستاپ، كارانتين شارالارى قاتاڭداتىلعاننان كەيىن وتباسىلىق زورلىق 20 پايىز وسكەن. ارينە، بۇعان ۋايىمدايمىز. بۇل تاقىرىپ قوعام تاراپىنان نارازىلىق تۋعىزادى. كۇن سايىن باق پەن جەلىدە وتباسىلىق جانجالدىڭ قايعىلى اياقتالعانى تۋرالى كورەمىز، كوبىنە سونىڭ سالدارىنان بالالار جەتىم بولىپ قالادى.
وتباسىنداعى زورلىقتان جاپا شەككەندەرگە پاندەميا باسىنان بەرى 37 مىڭعا جۋىق قورعاۋ نۇسقاماسى شىعارىلدى. قۇقىقبۇزۋشىلاردىڭ تارتىبىنە قاتىستى 5 مىڭنان استام قاتاڭ تالاپ قويىلدى. بۇل جەردە قۇقىقتىق شارالار ازدىق ەتەتىنى تۇسىنىكتى. قوعامنىڭ جۇيەلى تۇردە جۇمىس ىستەۋى جانە ۇەۇ، ساراپشى قوعامداستىقتار، كاسىبي پسيحولوگتار، قولداۋ توپتارى جانە وزگەنىڭ وتباسىلىق باقىتىنا بەي-جاي قارامايتىن بارشا ادام كۇش سالۋ كەرەك. ەلىمىزدە مۇنداي ادامدار از ەمەس. كوبى زارداپ شەككەندەرگە كومەك كورسەتىپ، قولداپ قانا قويمايدى، سونىمەن بىرگە ولاردىڭ جاعدايىن جاقسارتۋ ءۇشىن جاقسى ۇسىنىستار دا ايتادى.
قازىر ماجىلىستە وتباسىلىق زورلىق-زومبىلىققا قارسى ءىس-ارەكەت ماسەلەلەرى جونىندەگى زاڭناما ۇسىنىسى تالقىلانىپ جاتىر. بۇگىن ءماجىلىس دەپۋتاتتارى وسى بريفينگكە قاتىسىپ وتىر. مەملەكەتتىك ورگاندار، ازاماتتىق قوعام ينستيتۋتى - ءبارى جۇمىلا كوتەرىپ، ۆەدومستۆوارالىق جۇمىس جاسالماسا، بۇل پروبلەمانى شەشە المايمىز. سوندىقتان وسى ماسەلەنى شەشۋ ءۇشىن ناقتى ۇسىنىستار ايتىلادى دەگەن ۇمىتتەمىن،" - دەدى بالاەۆا.
