Aqparat jáne qoǵamdyq damý mınıstrligi otbasyndaǵy zorlyq-zombylyqty joıý máselesin talqylaý maqsatynda onlaın-brıfıng uıymdastyrdy. Oǵan Májilis depýtattary, qoǵam belsendileri, úkimettik emes uıymdardyń ókilderi qatysty. Bul týraly "Tengrneýs" habarlady.
"Álemdegi bul problema jyl saıyn bizdiń qoǵamda da ózekti bolyp kele jatqany ókinishti. QR Bas prokýratýrasy Quqyqtyq statıstıka jáne arnaıy esepke alý komıtetiniń derekterine súıensek, 2017 jyly 446, 2018 jyly 919, 2019 jyly myńnan astam otbasylyq zorlyq-zombylyq bolǵan. Epıdemııa bastap, karantın sharalary qatańdatylǵannan keıin otbasylyq zorlyq 20 paıyz ósken. Árıne, buǵan ýaıymdaımyz. Bul taqyryp qoǵam tarapynan narazylyq týǵyzady. Kún saıyn BAQ pen jelide otbasylyq janjaldyń qaıǵyly aıaqtalǵany týraly kóremiz, kóbine sonyń saldarynan balalar jetim bolyp qalady.
Otbasyndaǵy zorlyqtan japa shekkenderge pandemııa basynan beri 37 myńǵa jýyq qorǵaý nusqamasy shyǵaryldy. Quqyqbuzýshylardyń tártibine qatysty 5 myńnan astam qatań talap qoıyldy. Bul jerde quqyqtyq sharalar azdyq etetini túsinikti. Qoǵamnyń júıeli túrde jumys isteýi jáne ÚEU, sarapshy qoǵamdastyqtar, kásibı psıhologtar, qoldaý toptary jáne ózgeniń otbasylyq baqytyna beı-jaı qaramaıtyn barsha adam kúsh salý kerek. Elimizde mundaı adamdar az emes. Kóbi zardap shekkenderge kómek kórsetip, qoldap qana qoımaıdy, sonymen birge olardyń jaǵdaıyn jaqsartý úshin jaqsy usynystar da aıtady.
Qazir Májiliste otbasylyq zorlyq-zombylyqqa qarsy is-áreket máseleleri jónindegi zańnama usynysy talqylanyp jatyr. Búgin Májilis depýtattary osy brıfıngke qatysyp otyr. Memlekettik organdar, azamattyq qoǵam ınstıtýty - bári jumyla kóterip, vedomstvoaralyq jumys jasalmasa, bul problemany sheshe almaımyz. Sondyqtan osy máseleni sheshý úshin naqty usynystar aıtylady degen úmittemin," - dedi Balaeva.
