ۇبت-نىڭ العاشقى كۇنىندە (21 ماۋسىمدا) رەسپۋبليكا بويىنشا 73 بالا تەستكە جىبەرىلگەن جوق. وعان قوسا 91 تەست تاپسىرۋشى ۇبت ءتارتىبىن بۇزعانى ءۇشىن اۋديتوريادان شىعارىلدى. بۇل تۋرالى ۇلتتىق تەستىلەۋ ورتالىعى ديرەكتورىنىڭ ورىنباسارى ناۋجان ديداربەكوۆا حابارلادى.
جالپى ماۋسىم ايىنداعى ۇبت-عا قاتىسۋعا 131 754 ءوتىنىش تۇسكەن. 21 ماۋسىمدا ەلىمىزدىڭ 15 وڭىرىندە باستالىپ، 161 پۋنكتىڭ 51-ىندە وتكىزىلگەن. ونىڭ 44-ءى اۋىلدىق جەرلەردە ورنالاسقان.
ۇلتتىق بىرىڭعاي تەستىلەۋگە 6512 بالا قاتىسۋ كەرەك بولعان. بىراق ولاردىڭ 6186-سى عانا تەست تاپسىرعان. بۇل بارلىق اتالعان قاتىسۋشىلاردىڭ 95 پايىزى.
"2020 جىلعى جاڭاشىلدىقتاردىڭ ءبىرى عيماراتقا كىرگىزۋ كەزىندە تىيىم سالىنعان زاتتار تابىلعان جاعدايدا تەستىلەۋشىنىڭ تەستىلەۋگە جىبەرمەۋ ەدى. وسى قاعيدانى ۇستانا وتىرىپ، 21 ماۋسىمدا رەسپۋبليكا بويىنشا 73 بالا ۇبت-عا جىبەرىلمەدى. سونىمەن قاتار، 91 تەستىلەنۋشى ۇبت وتكىزۋ ەرەجەلەرىن بۇزعانى ءۇشىن اۋديتوريادان شىعارىلدى. ياعني، 164 تەستكە قاتىسۋشى ءتارتىپ بۇزدى. سايكەسىنشە ولاردىڭ ناتيجەلەرى جويىلىپ، وسى جىلى تەستىلەۋگە قاتىسۋ مۇمكىندىگىنەن ايىرىلىپ وتىر. وتكەن جىلى بۇل كورسەتكىش بارلىق تەستىلەۋ مەرزىمىندە 24-ءتى قۇراعان بولاتىن", - دەدى ناۋجان ديداربەكوۆا ورتالىق كوممۋنيكاتسيالار قىزمەتىندە وتكەن بريفينگتە.
تەستتىڭ ءبىرىنشى كۇنگى قورىتىندىسى بويىنشا شەكتى بالدى جيناعانداردىڭ سانى – 4222. بۇل العاشقى كۇنگى قاتىسۋشىلاردىڭ 68,3 پايىزى. ال 130 باللدان جوعارى جيناعاندار – 39 (قاتىسۋشىلاردىڭ 0,6 پايىزى).
