UBT-nyń alǵashqy kúninde (21 maýsymda) respýblıka boıynsha 73 bala testke jiberilgen joq. Oǵan qosa 91 test tapsyrýshy UBT tártibin buzǵany úshin aýdıtorııadan shyǵaryldy. Bul týraly Ulttyq testileý ortalyǵy dırektorynyń orynbasary Naýjan Dıdarbekova habarlady.
Jalpy maýsym aıyndaǵy UBT-ǵa qatysýǵa 131 754 ótinish túsken. 21 maýsymda elimizdiń 15 óńirinde bastalyp, 161 pýnktiń 51-inde ótkizilgen. Onyń 44-i aýyldyq jerlerde ornalasqan.
Ulttyq biryńǵaı testileýge 6512 bala qatysý kerek bolǵan. Biraq olardyń 6186-sy ǵana test tapsyrǵan. Bul barlyq atalǵan qatysýshylardyń 95 paıyzy.
"2020 jylǵy jańashyldyqtardyń biri ǵımaratqa kirgizý kezinde tyıym salynǵan zattar tabylǵan jaǵdaıda testileýshiniń testileýge jibermeý edi. Osy qaǵıdany ustana otyryp, 21 maýsymda respýblıka boıynsha 73 bala UBT-ǵa jiberilmedi. Sonymen qatar, 91 testilenýshi UBT ótkizý erejelerin buzǵany úshin aýdıtorııadan shyǵaryldy. Iaǵnı, 164 testke qatysýshy tártip buzdy. Sáıkesinshe olardyń nátıjeleri joıylyp, osy jyly testileýge qatysý múmkindiginen aıyrylyp otyr. Ótken jyly bul kórsetkish barlyq testileý merziminde 24-ti quraǵan bolatyn", - dedi Naýjan Dıdarbekova Ortalyq kommýnıkaııalar qyzmetinde ótken brıfıngte.
Testtiń birinshi kúngi qorytyndysy boıynsha shekti baldy jınaǵandardyń sany – 4222. Bul alǵashqy kúngi qatysýshylardyń 68,3 paıyzy. Al 130 balldan joǵary jınaǵandar – 39 (qatysýshylardyń 0,6 paıyzy).
