بۇگىن - قازاقستان رەسپۋبليكاسىنىڭ مەملەكەتتىك رامىزدەرى كۇنى!

228

قر اقپارات جانە قوعامدىق دامۋ ءمينيسترى ايدا بالاەۆا قازاقستاندىقتاردى مەملەكەتتىك رامىزدەر كۇنىمەن قۇتتىقتادى.

1992 جىلعى ءدال وسى كۇنى تاۋەلسىز قازاقستاننىڭ جاڭا مەملەكەتتىك رامىزدەرى العاش رەت بەكىتىلدى. مەملەكەتتىك رامىزدەر - مەملەكەتتىڭ مىزعىماس نەگىزدەرىنىڭ ءبىرى. مەملەكەتتىك رامىزدەر بارلىق ۋاقىتتار مەن زامانداردا قوعامداعى ءار ادام ءۇشىن قاستەرلى دە، قاسيەتتى بولدى. رامىزدەر حالىقتىڭ بوستاندىعى مەن تاۋەلسىزدىگىن بەينەلەيدى، ونىڭ قۇندىلىقتارى مەن قاسيەتتى جەرلەرىن، اتا-بابالار جادىن جانە جاڭا ۇرپاقتىڭ بولاشاق جەتىستىكتەرىن بىلدىرەدى.
قازاقستاندىق تۋ اسقارالى بيىك تاۋ شىڭدارىنا ورناتىلدى، عارىشتان جەر شارىن اينالىپ ۇشتى، الەمدىك دەڭگەيدەگى سپورتتىق جەڭىستەردە جەلبىرەدى، ادامداردى ازاماتتىق جانە كاسىبي ەرلىكتەرگە شابىتتاندىردى. مەملەكەتتىك رامىزدەر حالىقتى بىرىكتىرىپ، ۇلتتى بىرەگەي ەتەدى.
قاي قايسىمىز دا تۋىمىز، ءانۇرانىمىز جانە ەلتاڭبامىزدىڭ اسقاق رۋح، ازاتتىق، قاھارماندىق پەن دانالىقتىڭ قاستەرلى نىشانى ەكەنىن جاقسى بىلەمىز. ءبىز اركەز قاسيەتتى تۋىمىزدىڭ استىندا وتانىمىزدىڭ تاۋەلسىزدىگى مەن حالقىمىزدىڭ باقىتتى دا بەيبىت ءومىرىن قورعايمىز.
بەيبىت ۋاقىتتا مەملەكەتتىلىك ءاربىر قازاقستاندىقتىڭ جەتىستىكتەرىن نىعايتادى - ءبىزدىڭ ارقايسىمىز نەعۇرلىم تابىستى بولساق، تاۋەلسىز قازاقستان سوعۇرلىم قۋاتتى بولادى.
ەلىمىزدىڭ بارلىق ازاماتتارىن وسى قاسيەتتى دە ماڭىزدى كۇنمەن شىن جۇرەكتەن قۇتتىقتايمىن! بارشاڭىزعا ءوسىپ-وركەندەۋ، ۋاقىتشا قيىن كەزەڭدى لايىقتى ەڭسەرۋ، ومىرلىك كۇش-جىگەر مەن جاسامپازدىق تىلەيمىن!

پىكىرلەر
رەداكتسيا تاڭداۋى