تالعار ءتۇتىننىڭ استىندا قالدى

3608
Adyrna.kz Telegram

تالعار اۋدانىنا قاراستى توو «ەكوسەرۆيس گرۋپپ» قوقىس پوليگونىندا ءورت شىقتى.  1 ماۋسىم كۇنى تۇسكى ۋاقىتتا باستالعان ءالى تولىقتاي سوندىرىلمەگەن. تالعار اۋدانى ءباسپاسوز قىزمەتىنىڭ حابارلاۋىنشا، ءورتتىڭ نەدەن پايدا بولعانى بەلگىسىز.

قازىرگى تاڭدا ءورتتى سوندىرۋگە 12 ادام، 4 تەحنيكا جۇمىلدىرىلعان.  ءورت 4 گەكتار اۋماقتى قامتىعان. ەسكەرەتىن جايت: تالعار اۋدانىنىڭ اۋماعىنا تالعار جانە ەسىك قالالارى مەن بەسقاينار جانە بىرلىك اۋىلدارى كىرەدى. قوقىس پوليگونىنا جاقىن جاتقان ەلدى-مەكەندەر 2 تاۋلىكتەن بەرى ءتۇتىننىڭ قۇرساۋىندا وتىر. تۇرعىندارعا قۇزىرلى ورگاندار تاراپىنان كومەك كورسەتىلمەگەن.

اپات جايلى ەكولوگ مامان قايرات نۇرحاننىڭ پىكىرىن بىلدىك. تالعار اۋدانىنىڭ ەكولوگىنىڭ ايتۋىنشا، قوقىس جيناۋعا ساۋاتتى تۇردە كىرىسپەگەن توو «ەكوسەرۆيس گرۋپپ» كومپانياسىندا ەشقانداي قاۋىپسىزدىك شارالارى ساقتالماعان. پوليگون جەراستى سۋىنا وتە جاقىن جەردە ورنالاسقان. قوقىس قالدىقتارى جەراستى سۋىنا ارالاسىپ، جاقىن ماڭداعى ەلدى-مەكەندەردەگى حالىق پايدالانىپ وتىرعان اۋىزسۋعا زاردابىن تيگىزۋدە. پوليگون كەن بايلىقتارىن ءوندىرۋ ءۇشىن قازىلعان كارەردىڭ ۇستىنەن سالىنعان. جەراستى سۋىنا جاقىن جەر بولعاندىقتان  قۇرىلىس جۇمىستارى دا توقتاتىلعان ەكەن. ال قوقىس كومپانياسى بۇل فاكتوردى ەسكەرمەگەن بولىپ وتىر.

قايرات نۇرحان، ەكولوگ: «پوليگونعا ورتا ەسەپپەن الماتى قالاسىنان 200-300 توننا قوقىس اكەلىنەدى. ءورت قوقىستى ورتەگەننەن پايدا بولۋى مۇمكىن. نەمەسە رەكۋلتيۆاتسيا جاسالماعان. ول دەگەنىمىز بۇلىنگەن جەرلەردىڭ قۇنارلىلىعىن قايتا قالپىنا كەلتىرىپ، قورشاعان ورتانى جاقسارتۋ ءۇشىن جۇرگىزىلەتىن كەشەندى جۇمىس. بۇل بويىنشا بۇلىنگەن جەرگە 1-2 مەتر توپىراق تاستالۋ كەرەك.

ءورت ءتۇتىنىنىڭ قۇرامىندا 12 ءتۇرلى حيميالىق ەلەمەنت بولادى. بۇل ەلەمەنتتەر ادامدا وبىر اۋرۋىنىڭ تۋىنداۋىنا اكەلىپ سوعۋى مۇمكىن»

اتالمىش كومپانيانىڭ سىبايلاس جەمقورلىققا قاتىسى بار دەگەن بولجام بار. سەبەبى، قاۋىپسىزدىك شارالارىن تەكسەرۋگە مىندەتتى ەكولوگتار پوليگوندى ءالى كۇنگە دەيىن تولىققاندى تەكسەرۋگە قول جەتكىزە الماعاندىقتارىن ايتتى. كومپانيا قىزمەتكەرلەرى كاسىپكەرلىك كودەكستى جەلەۋ ەتىپ، تەكسەرىسكە توسقاۋىل قوياتىن كورىنەدى. ەكولوگ ماماندار بۇل ماسەلە بويىنشا اۋداندىق پروكۋراتۋرادان دا، اۋداندىق اكىمشىلىكتەن دە رۇقسات الا الماي كەلەدى. ەكولوگ قايرات نۇرحان قۇزىرلى ورگاندارعا حات جازۋدان جالىقپايمىز دەپ ءتاستۇيىن بەكىنىپ وتىر.

ءتۇتىننىڭ قۇرساۋىندا قالعان حالىقتىڭ جاعدايى نە بولارى بەلگىسىز.

"ادىرنا" ۇلتتىق پورتالى

پىكىرلەر