Talǵar aýdanyna qarasty TOO «Ekoservıs grýpp» qoqys polıgonynda órt shyqty. 1 maýsym kúni túski ýaqytta bastalǵan áli tolyqtaı sóndirilmegen. Talǵar aýdany baspasóz qyzmetiniń habarlaýynsha, órttiń neden paıda bolǵany belgisiz.
Qazirgi tańda órtti sóndirýge 12 adam, 4 tehnıka jumyldyrylǵan. Órt 4 gektar aýmaqty qamtyǵan. Eskeretin jaıt: Talǵar aýdanynyń aýmaǵyna Talǵar jáne Esik qalalary men Besqaınar jáne Birlik aýyldary kiredi. Qoqys polıgonyna jaqyn jatqan eldi-mekender 2 táýlikten beri tútinniń qursaýynda otyr. Turǵyndarǵa quzyrly organdar tarapynan kómek kórsetilmegen.
Apat jaıly ekolog maman Qaırat Nurhannyń pikirin bildik. Talǵar aýdanynyń ekologiniń aıtýynsha, qoqys jınaýǵa saýatty túrde kirispegen TOO «Ekoservıs grýpp» kompanııasynda eshqandaı qaýipsizdik sharalary saqtalmaǵan. Polıgon jerasty sýyna óte jaqyn jerde ornalasqan. Qoqys qaldyqtary jerasty sýyna aralasyp, jaqyn mańdaǵy eldi-mekenderdegi halyq paıdalanyp otyrǵan aýyzsýǵa zardabyn tıgizýde. Polıgon ken baılyqtaryn óndirý úshin qazylǵan karerdiń ústinen salynǵan. Jerasty sýyna jaqyn jer bolǵandyqtan qurylys jumystary da toqtatylǵan eken. Al qoqys kompanııasy bul faktordy eskermegen bolyp otyr.
Qaırat Nurhan, ekolog: «Polıgonǵa orta eseppen Almaty qalasynan 200-300 tonna qoqys ákelinedi. Órt qoqysty órtegennen paıda bolýy múmkin. Nemese rekýltıvaııa jasalmaǵan. Ol degenimiz búlingen jerlerdiń qunarlylyǵyn qaıta qalpyna keltirip, qorshaǵan ortany jaqsartý úshin júrgiziletin keshendi jumys. Bul boıynsha búlingen jerge 1-2 metr topyraq tastalý kerek.
Órt tútininiń quramynda 12 túrli hımııalyq element bolady. Bul elementter adamda obyr aýrýynyń týyndaýyna ákelip soǵýy múmkin»
Atalmysh kompanııanyń sybaılas jemqorlyqqa qatysy bar degen boljam bar. Sebebi, qaýipsizdik sharalaryn tekserýge mindetti ekologtar polıgondy áli kúnge deıin tolyqqandy tekserýge qol jetkize almaǵandyqtaryn aıtty. Kompanııa qyzmetkerleri kásipkerlik kodeksti jeleý etip, tekseriske tosqaýyl qoıatyn kórinedi. Ekolog mamandar bul másele boıynsha aýdandyq prokýratýradan da, aýdandyq ákimshilikten de ruqsat ala almaı keledi. Ekolog Qaırat Nurhan quzyrly organdarǵa hat jazýdan jalyqpaımyz dep tastúıin bekinip otyr.
Tútinniń qursaýynda qalǵan halyqtyń jaǵdaıy ne bolary belgisiz.
"Adyrna" ulttyq portaly
