Pákistandaǵy ushaq apatynan 2 adam tiri qalǵan

1287

Sarapshylar Pákistanda juma kúni tańerteń bolǵan áýe apaty ornyndaǵy ushaq synyqtaryn muqııat zerttep jatyr. Bul týraly  CBS News agenttigine silteme jasap, QazAqparat habarlaıdy.

Bortynda 100-ge jýyq adam otyrǵan Airbus ushaǵy Karachı qalasyndaǵy úılerdiń ústine qulaǵan. Apat kezinde eki adam tiri qalǵan. Beınebaqylaý kamersasy ushaqtyń turǵyn úıler ústine qulap túsken sátin jazyp alǵan.

Qutqarýshylar úıindi astynan bank prezıdenti Zafar Masýdty arshyp aldy. Abyroı bolǵanda, Masýd tiri, tek birneshe jeri synǵan. Onyń qasyndaǵy jolaýshy Muhammed Zýbaır de aman qalǵan.

«Ushaq órtene bastady... Men qaýipsizdik beldigin sheshtim, jaryqty kórdim», dedi ol aýrýhana palatasynda jatyp.

Avıaııalyq qyzmet ókilderi bortynda 98 adam bolǵan A320 ushaǵy Lahordan ushyp shyǵyp, Karachıǵa qonbaq bolǵanyn málimdedi. Alaıda, jol ústinde eki qozǵaltqyshy da isten shyqqan.

Pákistan jaqynda koronavırýs pandemııasy kezinde birneshe aptaǵa sozylǵan karantınnen keıin ishki reısterdi qaıta qalpyna keltirgen.

Eldiń premer-mınıstri Imran Han ushaq apaty tolyq tergeletinin aıtyp ýáde berdi.

Pikirler