«شىعىس» وڭىرلىك قولباسشىلىعىنا قاراستى اسكەري بولىمدەردىڭ مەرزىمدى قىزمەتتەگى ساربازدارى زاپاسقا شىعارىلدى. 2019 جىلدىڭ كوكتەمىندە اسكەرگە شاقىرىلعان 1000-نان استام سارباز وتان الدىنداعى بورىشىن اتقارىپ، ۇيلەرىنە قايتتى.
«اسكەري قىزمەت ماعان كوپ نارسەنى ۇيرەتتى. بىزگە باسشىلىق ەتكەن كومانديرلەرىمىز اسكەري ءومىردىڭ قىر-سىرىن ۇيرەتە ءبىلدى. دالالىق وقۋ-جاتتىعۋعا قاتىسۋ، كۇندىزگى جانە تۇنگى ۋاقىتتا قارۋدان اتۋ جاتتىعۋلارىن ورىنداۋ مەن ءۇشىن ەستەن كەتپەس ەرەكشە ساتتەر»، - دەدى قاتارداعى جاۋىنگەر يساتاي سانات.
ساربازداردى شىعارىپ سالۋ ءراسىمى ەلىمىزدە ەنگىزىلگەن توتەنشە جاعدايلار تالاپتارىن ساقتاي وتىرىپ ۇيىمداستىرىلدى.
ءبىر جىل كولەمىندە ساربازدار جاۋىنگەرلىك دايىندىقتا شىڭدالىپ، اسكەري ماماندىقتارى بويىنشا جاقسى ناتيجەلەرگە قول جەتكىزدى. جاۋىنگەرلىك دايىندىق ساباقتارىن پراكتيكالىق تۇردە يگەرىپ، وقۋ-جاتتىعۋلاردا شەبەرلىكتەرىن كورسەتە الدى.
قىزمەتتىك مىندەتتەرىن ادال ورىنداپ، جاۋىنگەرلىك دايىندىقتا ۇزدىك ناتيجە كورسەتكەن جانە ۇلگىلى تارتىبىمەن ەرەكشەلەنگەن ساربازدارعا العىس حاتتار مەن ەستەلىك سىيلىقتار تابىستالدى.
«شىعىس» وڭىرلىك قولباسشىلىعىنىڭ ءباسپاسوز قىزمەتى
