حالىق بەلگىلى جۋرناليست بەيسەن قۇرانبەكتى سوڭعى ساپارعا شىعارىپ سالدى

156

حالىق بەلگىلى جۋرناليست بەيسەن قۇرانبەكتى سوڭعى ساپارعا شىعارىپ سالدى. قوشتاسۋ ءراسىمى تالدىقورعانداعى جۋرناليستەر ۇيىندە ءوتتى، دەپ حابارلايدى قازاقپارات

كورەرمەننىڭ سۇيىكتىسىنە اينالىپ، ءار قازاقتىڭ جۇرەگىنە مەيىرىم ۇيالاتا بىلگەن بەيسەن ابايۇلىن سوڭعى ساپارعا شىعارىپ سالۋعا حالىق كوپ جينالدى. بەيسەن قۇرانبەكتىڭ «ايتۋعا وڭاي»، «قارەكەت» سياقتى جوبالارىنا ميلليوندار رازى بولسا، جەتىسۋ جۋرناليستەر ءۇيى سياقتى ءوزى مۇرىندىق بولىپ سالىنعان كوپ دۇنيەسى كوپشىلىككە بەيمالىم. ال، ءومىرىنىڭ سوڭعى التى جىلىندا باسشى بولعان «جەتىسۋدا» بەيسەن قۇرانبەك ءبىر شوعىر ءىنى-قارىنداسىنا جول كورسەتىپ كەتتى. ەلدىڭ مۇڭىن ءوز مۇڭىنداي كورىپ، كوپكە قامقور بولا بىلگەن جۇرەكتى ازامات بەيسەن قۇرانبەكتى حالقى شىن جاقسى كوردى. ءىنى-باۋىرلارىن «باتىر» دەپ ەركەلەتەتىن اردا تۇلعامەن ەل-جۇرت قيماي قوشتاستى.

بەيسەن ابايۇلى جايلى جىلى ەستەلىكتەرىمەن بولىسكەن تانىمال جۋرناليست نۇرتىلەۋ يمانعالي ارىپتەستەرىنە بەيسەنتانۋ عىلىمىن قالىپتاستىرۋدى ۇسىندى. ول وسى ارقىلى قازاق جۋرناليستيكاسى جاڭا دەڭگەيگە كوتەرىلەدى دەپ سانايدى. ونىڭ ايتۋىنشا، بەيسەن قۇرانبەكتىڭ ومىرلىك ۇستانىمدارى دا - وسكەلەڭ ۇرپاق ءۇشىن ۇلكەن عيبراتتى دۇنيە. «بەيسەكەڭدى قايتارا المايتىنىمىزدى بىلەمىن. بەيسەكەڭدى ۇمىتتىرماۋدىڭ، ەستە قالدىرۋدىڭ ءبىر-اق جولى بار مەن بىلەتىن. ول - بەيسەنتانۋ عىلىمى. ال بەيسەنتانۋ عىلىمىنىڭ العاشقى باسپالداقتارىن جاسايتىن كىم دەگەن كەزدە، ول - قالىڭ كورەرمەن ەكەنىنە كۇمان جوق. بىراق سونىڭ نەگىزىن ۇستاپ وتىرعان - قالامگەرلەر، مەنىڭ ارىپتەستەرىم. جاڭا مەكتەپتىڭ قالىپتاساتىنىنا انىق كوزىم جەتەدى. بەيسەننىڭ مەكتەبى - بولەك مەكتەپ. قوش بول، باۋىرىم، جاتقان جەرىڭ جايلى، توپىراعىڭ تورقا بولسىن»، - دەدى قازاقستانعا ەڭبەگى سىڭگەن قايراتكەر، جۋرناليست نۇرتىلەۋ يمانعالي.

«2004 جىلى پرەزيدەنتتىڭ جانىندا بىرگە جۇمىس ىستەدىك. سول كەزدە مەن بەيسەننىڭ ەڭبەكقورلىعىنا ءتانتى بولاتىنمىن. ول اجەسىن استاناعا الىپ كەلدى. بىراق ۇلكەن كىسى ەلوردانى ۇناتپاعاننان كەيىن ول شىعارماشىلىعىن تاستاپ، ۇيىنە قايتتى. سول كەزدە «بەيسەكە، ءسىزدىڭ بولاشاعىڭىز كەرەمەت، ءسىزدى پرەزيدەنتتىڭ ءوزى جاقسى تانيدى، ەلوردادا قالساڭىزشى» دەگەنىمدە، كەلىسپەدى. «اپام ءومىر باقي جانىمدا بولمايدى. ال جۇمىس تابىلادى» دەدى. بەيسەننىڭ دانالىعىنا مەن اركەز تاڭقالاتىنمىن. جانىڭ ءجانناتتا بولسىن، دوسىم»، - دەدى جۋرناليست الەكساندر اكسيۋتيتس.

بەيسەن ابايۇلى 49 جاسقا قاراعان شاعىندا ومىردەن وزدى. مارقۇم تالدىقورعانعا قاراستى ەركىن اۋىلىندا جەرلەنەدى.

 

پىكىرلەر
رەداكتسيا تاڭداۋى