ءبىلىم جانە عىلىم ءمينيسترى اسحات ايماعامبەتوۆ ءبىلىم بەرۋدىڭ مەكتەپتەگى قالىپتى فورماتىن قايتارۋدى سۇراعان اتا-انالاردىڭ پەتيتسياسىنا جاۋاپ بەردى، - دەپ حابارلايدى "ادىرنا". بۇل تۋرالى Facebook پاراقشاسىندا جاريالادى.
ءداستۇرلى ىشتەي وقيتىن مەكتەپ قايتارىلسىن» دەگەن پەتيتسيانى وقىدىم. قازاقستاندا كەلەشەكتەگى وقىتۋ فورماتىنا الاڭداپ وتىرعان اتا-انالاردىڭ بارىنە ايتاتىنىم، قاشىقتان وقىتۋ – الەمدىك Covid-19 پاندەمياسىنا بايلانىستى ءبارىمىزدىڭ قاۋىپسىزدىگىمىز ءۇشىن قولدانىلعان ءماجبۇرلى شارا.
ءبىزدىڭ الدىمىزدا ناقتى مىندەت تۇردى - وقۋشىلار مەن ءبىلىم قىزمەتكەرلەرىنىڭ دەنساۋلىعىن ساقتاۋ، سونىمەن بىرگە وقىتۋ پروتسەسىن ۇزبەۋ. يۋنەسكو-نىڭ مالىمەتىنە سايكەس، بۇكىل الەمدە 1,5 ملرد وقۋشى قاشىقتان وقىتۋعا مۇمكىندىك بەرەتىن تەحنولوگيالارمەن ءبىلىم الۋدا.
ءبىز وقۋ ءۇردىسىن جالعاستىرۋ ءۇشىن قولداعى بار مۇمكىندىكتى پايدالاندىق. كەيبىر جاعدايدىڭ كەزدەسكەنى بولماسا جالپى ءۇردىس ۇيىمداستىرىلدى دەپ ەسەپتەيمىن.
ەشكىم دە ءداستۇرلى ىشتەي ءبىلىم بەرۋ فورماسىن الىپ تاستاعان جوق. قاشىقتان وقىتۋ – ءماجبۇرلى شارا بولدى. البەتتە الدا دا مۇنداي جاعدايلارمەن بەتپە-بەت كەلگەن كەزدە بايقاۋ كەرەك. سول سەبەپتى مەملەكەت باسشىسىنىڭ تاپسىرماسىمەن ءبىز ءتيىستى جۇمىستاردى ۇيىمداستىرۋدامىز.
قاشىقتان وقىتۋدىڭ تەحنولوگيالارىن دامىتىپ، مەكتەپتەردى اقپاراتتاندىرۋ جۇمىسىن جۇرگىزۋ كەرەك. ماسەلەن، اۋا رايىنىڭ بۇزىلۋىنا بايلانىستى وقۋشىلاردىڭ وقۋدان قالۋعا ءماجبۇر بولاتىن جاعدايىن الىپ قاراستىرايىق نەمەسە كەيدە بالا ۇيىندە وقۋعا ءماجبۇر بولادى.
ءدال قازىر ەڭ ءتيىمدى شەشىم ىشتەي وقىتۋ فورماتى ەكەنىن ءبارىمىز ءتۇسىنىپ وتىرمىز. كەلەسى وقۋ جىلى مەكتەپ قابىرعاسىنان باستالار دەگەن ۇمىتتەمىز. قازاقستاندا مەكتەپكە بارىپ وقۋ فورماتى سول كۇيى قالادى.
