تولە بي اۋدانى ەكپىندى اۋىلىندا قاسقاسۋ وزەنىنىڭ سۋ دەڭگەيى كوتەرىلۋىنە بايلانىستى ءتورت جەكە ءۇي مەن 15 اۋلانى سۋ باسقان. جوعارعى اۋىلىندا ءتورت اۆتوموبيل كوپىرىن سۋ قيراتىپ كەتكەن.
شىمكەنتتىڭ ەڭبەكشىقازاق اۋدانى ەلتاي ىقشاماۋدانىندا تولە بي اۋدانىنان كەلەتىن ارىقتاردان سۋ تاسىپ، 60 اۋلانى سۋ باسىپ قالعان. قۇتقارۋشىلار، پوليتسەيلەر جانە جەرگىلىكتى اتقارۋشى ورگان قىزمەتكەرلەرى تۇرعىنداردى توعىس اۋىلىنداعى №120 جانە №119 ورتا مەكتەپتەرىنە ەۆاكۋاتسيالاعان.
سۋ سورۋ جانە ارىقتاردى مەحانيكالىق تازالاۋ جۇمىستارى ءجۇرىپ جاتىر. جەدەل شتاب قۇرىلعان.
Otyrar.kz باسىلىمىنىڭ مالىمەتىنشە، ەلتاي تۇرعىن ءۇي ماسسيۆىندە 150 تۇرعىن ەۆاكۋاتسيالانعان، شامامەن 150 تۇرعىن تۋىستارىنىڭ ءۇيىن پانالاعان. تجد موبيل توپتارى ەلدى مەكەن تۇرعىندارىن دىبىس زورايتقىشپەن ەۆاكۋاتسيا تۋرالى حاباردار ەتتى.
ء"ۇي اۋلالارىنداعى سۋ دەڭگەيى - 20-50 سانتيمەتر. قازىرگى ۋاقىتتا سۋ اعىنى سەكۋندىنا 3-5 تەكشە مەتر", - دەلىنگەن حابارلامادا.
باسىلىمنىڭ مالىمەتىنشە، تولە بي اۋدانىندا تج ورنىنا اۋدان اكىمى باۋىرجان وماربەكوۆتىڭ باستاماسىمەن قۇرىلعان جۇمىس توبى جەتكەن. كوپىرلەردى قالپىنا كەلتىرۋ جۇمىستارى ءجۇرىپ جاتىر.
شىمكەنت ماڭىنداعى سۇلتان رابات اۋىلىندا دا سۋ دەڭگەيى كوتەرىلگەن، جولداردى سۋ باسقان. بۇل تۋرالى كۋاگەرلەر حابارلاپ جاتىر. وسىنداي جاعداي لەڭگىردە دە بولىپ جاتقانى ايتىلادى. ال قازىعۇرت اۋدانى جىگەرگەن اۋىلدىق وكرۋگىندە ۇيلەردى سۋ باسقان.
