باكالاۆردا وقىپ جۇرگەنى كەزىمىزدە ءبىر ساباقتان ماگيسترانتتار ساباق بەرسە، ولارعا قىزىعا قارايتىنبىز. قازىر – ءوزىمىز ماگيسترانتپىز.
ءبىرىنشى سەمەستردە جوعارعى مەكتەپ پەداگوگيكاسى ءپانى ءوتىلىپ، جوعارى وقۋ ورنىندا ساباق بەرۋ، ونداعى قولدانىلاتىن پەداگوگيكالىق امال-ادىستەر، پەداگوگتىڭ قۇزىرەتتىلىگى، ول قانداي بولۋ كەرەك دەگەن سىندى سۇراقتارعا جاۋاپ الدىق. ەكىنشى سەمەستردە باكالاۆر بولىمىندەگى ستۋدەنتتەرگە ءدارىس، سەمينار ساباقتارىن جۇرگىزە باستادىق.
پەدپراكتيكا قالاي ءوتتى؟ ستۋدەنتتەرمەن تانىسىپ، ولاردىڭ الدىندا ءوزىڭدى وقىتۋشى رەتىندە ۇستاۋ وسى كەزگە دەيىن العان بار ءبىلىمىڭدى قورىتىپ، ونى ورتاعا سالۋىڭدى تالاپ ەتەدى. سەبەبى، ءوزىڭ ءبىلۋ – ءبىر بولەك دۇنيە دە، ونى باسقالارعا ۇيرەتە، تۇسىندىرە ءبىلۋ ۇلكەن ەڭبەكتى، تاجىريبەنى، يكەمدىلىكتى قاجەت ەتەدى.
1-كۋرس ستۋدەنتتەرىنە «لەكسيكولوگيا» ءپانى بويىنشا ساباق بەرۋ بارىسىندا ساباقتى ۇيىمداستىرۋ، تەكسەرۋدەن باستاپ، قورىتىندى كەزەڭىنە دەيىن قالاي وتكىزۋ كەرەك دەگەن ماسەلەنى ەسكە تۇسىردىك. سەبەبى، ءبىر ەلۋ مينۋتتا ءدارىس وقىپ، ءبىر ەلۋ مينۋتتا بارلىق ستۋدەنتتى قامتىپ سەمينار ساباعىن جۇرگىزۋ وڭاي ەمەس. ءتىپتى ستۋدەنتتەردىڭ ءبىلىمىن تەكسەرىپ، ولاردى دۇرىس باعالاپ ۇيرەنۋ كەرەك.
ستۋدەنتتەرگە ساباق بەرۋ بارىسىندا پەداگوگيكادان العان بارلىق ءبىلىمدى ەسكە ءتۇسىرىپ، ونى ءىس جۇزىندە قولداندىق. ستۋدەنتتەرگە قىزىق ءارى تۇسىنىكتى بولۋ ءۇشىن ساباقتى ءتۇرلى ءادىس-تاسىلدەر ارقىلى وتتىك. بۇنداي امال – ۋاقىتتى دۇرىس باعامداپ، ساباقتى دۇرىس ۇيىمداستىرا بىلۋگە كومەكتەستى. ءسوج تاپسىرمالارىن تەكسەرىپ، ءار بالانىڭ جەكە قىزىعۋشىلىعىنا، شىعارماشىلىق مۇمكىندىگىنە بايلانىستى تاپسىرما بەرۋگە تىرىستىق. ساباق قانشالىقتى قىزىقتى، جۇيەلى بولسا، ستۋدەنتتەردىڭ ىنتا-نازارى سەندە بولىپ، تاپسىرمانى قۇشتارلىقپەن، قىزىعۋشىلىقپەن ورىندايتىندىقتارىنا كوزىمىز جەتتى. دەمەك، ناعىز پەداگوگ – ساباقتى ءتۇرلى فورماتتا، ءتۇرلى كورنەكىلىكتەردى قولدانا ارقىلى وتكىزە بىلەتىن ءوز ءىسىنىڭ مامانى.
قازىر ەلىمىزدەگى جاعدايعا بايلانىستى پەدپراكتيكا ونلاين فورماتتا ءجۇرىپ جاتىر. ءار نارسەگە وڭ كوزبەن قاراي ءبىلۋ كەرەك. سەبەبى، بۇل كۇنگە دەيىن قاشىقتان وقىتۋ جۇيەسى تۋرالى ەستىسەك تە، ونىڭ ءدال قالاي وتەتىنى تۋرالى بىلمەيتىنبىز. قازىر ءوزىمىز سولاي وقىپ، ارتىقشىلىقتارىن كورىپ جاتىرمىز. ەندى اشىق سەمينار ساباقتار ساباقتارىن ونلاين فورماتتا وتكىزۋدى جوسپارلاپ وتىرمىز.
پەداگوگ بولۋ وڭاي دۇنيە ەمەس. سونىڭ قىر-سىرلارىن ۇيرەتىپ، بىزگە وقىتۋشى بولىپ كورۋ مۇمكىندىگىن سىيلاعان وقۋ ورىنىمىز قازۇۋ-عا، ۇستازدارىمىزعا العىسىمىز شەكسىز!
وتەۋلينوۆا اڭساعان
ءال – فارابي اتىنداعى قازاق ۇلتتىق ۋنيۆەرسيتەتى
فيلولوگيا جانە الەم تىلدەرى فاكۋلتەتىنىڭ
1-كۋرس ماگيسترانتى
كۋراتور-ەدۆايزەرى فيلولوگيا عىلىمدارىنىڭ كانديداتى، دوتسەنت ل.ت.الىمتاەۆا
