ءبىز، الەمدىك جانە ءداستۇرلى دىندەردىڭ وكىلدەرى، ادامنىڭ تابيعي بولمىسىنا، ونىڭ اجىراماس قۇقىقتارى مەن قادىر-قاسيەتىنە نىق سەنىممەن بەيبىتشىلىك پەن كەلىسىمگە، ءوزارا قۇرمەت پەن ىنتىماقتاستىق جانە ادامزات باۋىرلاستىعىنىڭ يدەيالارىنا ادالدىعىمىزدى تاعى دا دالەلدەيمىز.
ءبىز ادامزاتتىڭ ورتاق يگىلىگى جولىندا ەكىنشى دۇنيەجۇزىلىك سوعىستا قازا بولعانداردى ەسكە الۋ جانە تاتۋلىق كۇنىنە وراي، فاشيزم مەن ءناتسيزمدى جويۋداعى جەڭىستىڭ 75 جىلدىعىن اتاپ ءوتۋ جونىندەگى يگى باستاما ءۇشىن مەملەكەتتەر مەن قوعامدارعا زور ريزاشىلىعىمىزدى بىلدىرەمىز.
ءبىز ءار حالىقتىڭ ءوزىنىڭ رۋحاني قۇندىلىقتارى مەن مۇراتتارىنا سايكەس، جەر بەتىندەگى بارلىق حالىقتارمەن امانشىلىقتا، بەيبىتشىلىكتە، ءوزارا قۇرمەت پەن ۇيلەسىمدە ءومىر سۇرەتىن ازاماتتىق قوعام قالىپتاستىرۋ جونىندەگى مەملەكەتتەردىڭ، سونداي-اق بىرىككەن ۇلتتار ۇيىمىنىڭ، باسقا دا مۇددەلى حالىقارالىق جانە ايماقتىق ۇيىمداردىڭ كەلەشەكتەگى الەمدىك ءتارتىپتى قۇرۋ جونىندەگى سىندارلى كۇش-جىگەرى مەن قىزمەتىن قولدايتىنىمىزدى جەتكىزەمىز.
2019 جىلدىڭ 4 اقپانىندا ابۋ-دابيدە ۇلى يمام ءال-ازحار احماد مۇحاممەد ال-تايب پەن ريم پاپاسى فرانتسيسك قول قويعان «بۇكىل الەمدەگى بەيبىتشىلىك پەن بەيبىت قاتار ءومىر ءسۇرۋ ءۇشىن ادامدار اراسىنداعى باۋىرلاستىق تۋرالى قۇجاتتىڭ» نەگىزگى قاعيدالارىن، سونىمەن قاتار 2019 جىلدىڭ 27-29 مامىرىندا مەككەدە وتكەن حالىقارالىق كونفەرەنتسيادا يسلام عالىمدارى قابىلداعان مەككە دەكلاراتسياسىن قولداي وتىرىپ، جالپى ادامزاتتىق قۇندىلىقتار – ىنتىماق پەن راقىمشىلىق توڭىرەگىندە ادامداردى بىرىكتىرۋگە باسا نازار اۋدارۋ جانە قارۋلى قاقتىعىستاردى توقتاتۋ ءۇشىن الەمنىڭ تۇكپىر-تۇكپىرىندەگى اتىستى تەز ارادا جاھاندىق تۇرعىدا توقتاتۋعا باعىتتالعان اقىلعا قونىمدى، دايەكتى، بولاشاققا باعىتتالعان ءىس-ارەكەتتەردىڭ ۋاقىتى كەلدى دەپ سانايمىز.
الەم قوعامداستىعىنىڭ COVID-19 پاندەمياسىمەن كۇرەستەگى ورتاق كۇش-جىگەرى مەن بارلىق دىندەردىڭ باستى قاعيدالارى اياسىندا ريم پاپاسى فرانتسيسكتىڭ كوروناۆيرۋس پاندەمياسى تۋرالى «گۋمانيتارلىق كومەك باعىتتارىن قالىپتاستىرۋعا، ديپلوماتيا ءۇشىن اشىق بولۋعا جانە اۋىر جاعدايدا جۇرگەندەرگە نازار اۋدارۋعا» شاقىرۋلارىنا نيەتتەستىگىمىزدى بىلدىرەمىز.
ءبىز جاراتقانعا شىنايى سەنىم بىلدىرە وتىرىپ، ءححى ع. ەكىنشى ونجىلدىعىنىڭ سوڭىندا بارلىق حالىقتار مەن مەملەكەتتەردىڭ باسىنا تۇسكەن جامانشىلىقتار مەن قايعىلار كەيىنگى ۇرپاققا ساباق بولۋىنا، سەنىم، ءتارتىپ، ىنتىماق، ادامگەرشىلىك ەرەجەلەرى مەن ادەپتىلىكتى ۇستانۋعا، مادەني، ۇلتتىق، ءدىني جانە تىلدىك ايىرماشىلىقتارعا قاتىستى شىدامدىلىق، ءتۇرلى مادەنيەتتەر مەن ەلدەردىڭ ادامدارى اراسىنداعى ءوزارا تۇسىنىستىك پەن دوستىق حالىقارالىق بەيبىتشىلىك پەن قاۋىپسىزدىككە تونەتىن قاۋىپ-قاتەرلەردى جەڭۋگە كومەكتەسە الاتىنىنا دۇعا ەتەمىز.
ەكىنشى دۇنيەجۇزىلىك سوعىستىڭ قۇرباندارىنا تاعزىم ەتە وتىرىپ، بۇكىل ادامزاتقا ورنى تولماس قايعى اكەلگەن بۇل سوعىستىڭ زاردابى بارلىق مەملەكەت قايراتكەرلەرىنە جانە ساياسي كوشباسشىلارعا، بولاشاق ۇرپاققا ساباق بولۋى ءتيىس ەكەنىن مالىمدەيمىز.
ءبىزدىڭ الەمدىك جانە ءداستۇرلى دىندەر ليدەرلەرى سەزىنىڭ الاڭىندا نۇر-سۇلتان قالاسىندا ون جەتى جىل بويى كەزدەسۋىمىز ءدىني كوشباسشىلار اراسىنداعى ديالوگ بارشا ادامزاتقا ورتاق قۇندىلىقتاردى تەرەڭ ۇعىنۋعا ءارى تۇسىنۋگە ۇلەس قوسا الاتىنىن دالەلدەدى.
ءبىز ءارتۇرلى وركەنيەتتەر، مادەنيەتتەر، دىندەر مەن سەنىمدەر اراسىنداعى سىندارلى ۇنقاتىسۋ مەن ءوزارا تۇسىنىستىكتى دايەكتى تۇردە قولداۋعا جانە ماداقتاۋعا ءازىرمىز.
ءبىز بارلىق مۇددەلى تاراپتاردى بەيبىت جانە ۇيلەسىمدى قاتار ءومىر سۇرۋگە ارەكەت ەتۋدى جالعاستىرۋعا جانە ونى نىعايتۋعا، جالپى ادامي مىندەتتەر نەگىزىندە ءدىني جانە مادەني الۋاندىق پەن قاسيەتتى تابىنۋ ورىندارىن قۇرمەتتەۋگە، قوعامدار مەن حالىقتاردىڭ جەرگىلىكتى جانە حالىقارالىق دەڭگەيلەردە ۇيلەسىمدى قاتار ءومىر ءسۇرۋى ءۇشىن ۇلتتىق، ناسىلدىك جانە ءدىني وشپەندىلىكتى قوزدىرۋدى، كەمسىتۋشىلىككە ارانداتۋدى، دۇشپاندىق جانە زورلىق-زومبىلىقتى بولدىرماۋعا، الەمدە، اسىرەسە دىندەر اراسىندا تۇراقتىلىقتى قولداۋ جانە نىعايتۋ جونىندەگى كۇش-جىگەردى بىرىكتىرۋگە شاقىرامىز.
سوعىس پەن قاقتىعىستار ماڭگىلىك ارتتا قالسىن!
جاراتقان يەمىز بارلىق ەلدەردە بەيبىتشىلىك، اماندىقتى ءناسىپ ەتىپ، ءبىزدىڭ رۋحاني ىنتىماعىمىزعا بەرەكە بەرسىن!
