ماقتاارال اۋدانىنداعى سۋ تاسقىنى بارشا جۇرتتى الاڭداتىپ وتىر. قازىرگى تاڭدا اتالعان ايماقتا 4 ەلدى مەكەننەن 5400 ادام ەۆاكۋاتسيالاندى.
تۇرعىنداردىڭ ءبىرازى تۋىس-تۋعانىنا كەتسە، ءۇش مىڭعا جۋىعى ماقتاارال اۋدانى، اتاكەنت كەنتىندەگى 10 مەكتەپكە ءبولىپ ورنالاستىرىلدى. ازىق-تۇلىك، ىستىق تاماقپەن تولىق قامتاماسىز ەتىلدى.
اتاپ وتەيىك، كورشىلەس جەتىساي اۋدانى COVID-19 ينفەكتسياسىنىڭ وبلىستاعى بىردەن ءبىر وشاعى بولىپ تابىلاتىندىقتان، كوپشىلىگىن قازىرگى تاڭدا وسى ساۋال الاڭداتۋدا. وبلىستىق دەنساۋلىق ساقتاۋ باسقارماسىنىڭ مالىمەتىنشە، جەتىساي اۋدانىنداعى ينفەكتسيالىق اۋرۋحانادا وبلىس بويىنشا 32 ناۋقاس ەم الىپ جاتسا، ماقتاارال اۋدانىنىڭ اۋرۋحانالارىندا بىردە-ءبىر ناۋقاس جوق.
دارىگەرلەر قازىرگى تاڭدا ەۆاكۋاتسيالانعان حالىقتى ىندەتتەن ساقتاۋ بويىنشا بارلىق شارانى قولعا الدى. حالىققا انتيسەپتيك، بەتپەردە، قولعاپ تەگىن تاراتىلىپ، ءار ازاماتتىڭ دەنە قىزۋى تەپلوۆيزورمەن تەكسەرىلۋدە.
تۇركىستان وبلىسى اكىمدىگىنىڭ
ءباسپاسوز قىزمەتى
