قازاقستان رەسپۋليكاسىندا پرەزيدەنت ينستيتۋتىنىڭ قۇرىلعانىنا 30 جىل تولۋىنا وراي بەلگىلى اقىن، قوعام قايراتكەرى ولجاس سۇلەيمەنوۆ ينستيتۋتتىڭ قۇرىلۋى، قالىپتاسۋ كەزەڭدەرى، جەتىستىكتەرى جونىندە پىكىر ءبىلدىردى، – دەپ حابارلايدى baq.kz.
ول ەلدەن جىراقتا جۇرسە دە، پرەزيدەنت سايلاۋىنا ۇشىپ كەلىپ، قازاقستاندىقتاردى نۇرسۇلتان نازارباەۆقا داۋىس بەرۋگە شاقىرعان.
– ەل پرەزيدەنتى سايلانعان جىلدارى مەن ماسكەۋ قالاسىندا جۇمىس ىستەدىم. ارنايى قازاق كسر پرەزيدەنتتىك سايلاۋىنا ماسكەۋدەن ۇشىپ كەلدىم. مەنىڭ ەسىمدە بولسا، سايلاۋ قازان ايىندا جوعارعى كەڭەستە وتكەن سياقتى، – دەپ ەسكە الدى قوعام قايراتكەرى strategy2050.kz سايتىنا بەرگەن سۇحباتىندا.
ول سايلاۋدا نۇرسۇلتان نازارباەۆتىڭ كانديداتۋراسىن ۇسىنىپ، وعان مىنەزدەمە دە بەرگەنىن جاسىرمادى.
– نازارباەۆتىڭ جۇمىس تاجىريبەسى، ۇيىمداستىرۋشىلىق قاسيەتى بار، بۇدان بولەك 6 جىل ۇكىمەتتى باسقاردى. سونىمەن قاتار بىرنەشە جىل قازاقستان كومپارتياسى ورتالىق كوميتەتىنىڭ باسشىسى بولدى، ءارى ءتۇرلى حالىقارالىق ورتادا جۇمىس ىستەدى. مەن حالىقتى نازارباەۆقا داۋىس بەرۋگە شاقىردىم، – دەيدى ول.
ولجاس سۇلەيمەنوۆ ءدال سول جىلدارى انتيادرولىق وداق قۇرىلىپ، ەلدەردى يادرولىق قارۋدان باس تارتۋعا شاقىراتىن كلۋب قۇرۋ قولعا الىنىپ جاتقانىن ايتتى.
– «نەۆادا-سەمەي» قوزعالىسىنىڭ حالىقارالىق قوزعالىستارمەن تىعىز بايلانىسى ارتا ءتۇستى. ءبىز سول كەزدە جاھاندىق انتيادرولىق وداق قۇرىپ، كلۋبقا مۇشە مەملەكەتتەردى يادرولىق قارۋدان باس تارتۋعا شاقىراتىن كلۋب قۇرۋدى قولعا الدىق، – دەيدى اقىن.
ينستيتۋت پەن پرەزيدەنتتىڭ جەتكەن جەتىستىكتەرىنە توقتالعان ولجاس سۇلەيمەنوۆ كەڭەس وداعى قۇلاعاننان كەيىن جاس مەملەكەتكە تەز ارادا اياققا تۇرۋ ماڭىزدى بولعانىن تىلگە تيەك ەتتى.
– الدىمىزدا قۇردىمعا كەتكەن كەڭەس ەكونوميكاسىنىن ۇلتتىق ەكونوميكانى قالىپقا كەلتىرۋ، وزىندىك ينتەللەكتۋالدى رۋحاني ورتانى قالىپتاستىرۋ مىندەتى تۇردى. مۇنىڭ ءبارىن بارلىق دەڭگەيدەگى بىرتۇتاستىق ينستيتۋتتىڭ كومەگىمەن عانا جاساۋعا مۇمكىندىك بولدى. كەيبىر تمد ەلدەرى دە وسى جولدى تاڭدادى. قازاقستاندا سياقتى ولاردا دا ءساتتى جۇزەگە استى. الايدا، كەي مەملەكەتتەر تەز ارادا باسقارۋدىڭ دەموكراتيالىق فورمالارى مەن ادىستەرىن ەنگىزۋگە تىرىسقاندىقتان، ىدىراۋ جالعاسا ءتۇستى. قازاقستان ءبىزدىڭ باقىتىمىزعا وراي مۇنداي كەلەڭسىزدىكتەردەن امان ءوتتى، – دەدى ول.
ءسوزىن قازاقستان كوپۇلتتىلىعىن ساقتاۋى كەرەك، دەپ تۇيىندەگەن ول:
– ءبىز تەك رەسپۋبليكامىزدىڭ كوپۇلتتىلىعىن ساقتاعان جاعدايدا عانا جەتىستىككە جەتەمىز. ءبىز وتە تولەرانتتى مەملەكەتپىز. بۇل تۋرالى قازاقستاننىڭ ءار ازاماتىنا ايتىلۋى كەرەك، – دەدى.
Qazaq uni
