قىتاي كومپارتياسى قارتايدى، كۇنى ءوتىپ بارادى. كەزىندە قىتايلىق كوممۋنيستەر ازاماتتىق سوعىستان ىعىر بولعان قىتاي ەلىنىڭ باسىن بىرىكتىرە الدى. بىراق، ماو زە دۋننىڭ قوعامدىق-ساياسي سىناقتار زەرتحاناسى قىتايدى ابدەن السىرەتتى. دەن سياو پين عانا جىعىلعان قىتايدى ورنىنان تۇرعىزدى.
ەندى، كوممۋنيستىك پارتيانىڭ كۇنى باتىپ بارادى. جەمقورلىق، پاراقورلىق، از ۇلتتارعا كورسەتىلىپ جاتقان زورلىق-زومبىلىقتارى ولاردىڭ سوڭعى تۇياق سەرپۋلەرى عانا بولسا كەرەك. الەم الدىندا ولار وزدەرىنىڭ بىلىق-شىلىعىن ابدەن ايپاراداي اشىپ ءبىتىردى. بۇل پارتيانىڭ ەندىگى جەردە الىپ قىتايدى ارى قاراي الىپ جۇرە المايتىنى بەلگىلى بولدى. شىڭجاڭدا جاساپ جاتقان جاۋىزدىقتارى ءۇشىن وركەنيەتتى باتىس الەمى قىتاي كومپارتياسىنا لايىقتى سىباعاسىن بەرەدى، ءالى دە ول الدا. از ۇلتتار ءۇشىن عانا ەمەس، جالپى كۇللى قىتاي حالقىنىڭ قولىندا داۋلەتى بار، ەكونوميكالىق بوستاندىقتى سەزىنگەن ورتا جانە جوعارعى توپتار ءۇشىن قىتاي كومپارتياسى دامۋدى تەجەگىش كەرىتارتپا كۇش.
تۇبىندە تۇتاس قىتايدى بولشەكتەپ ىدىراتاتىن تيبەت، شىڭجاڭ، ىشكى موڭعوليا ەمەس، كەرىسىنشە، گۋاندون، شانحاي، فۋجيان جانە سولارمەن سىچۋان، يۋنان، حۋنان، گۋانشي بولىپ شىعۋى بەك مۇمكىن.
مەيلى، قىتاي حالقى بولشەكتەنبەسە دە، ەندى، بۇل ەلدى قاندىقول كومپارتيا باسقارا الماسى انىق. تايۆانداعى گوميندان پارتياسى ارالدان شىعىپ، قۇرلىققا كەلۋ ىقتيمالدىلىعى باسىم. سەبەبى، گوميندان دەگەنىمىز ءوزىنىڭ زاڭدىق مارتەبەسىنەن قاپيادا ايىرىلىپ قالعان ساياسي پارتيا. 1988 جىلدان باستاپ دەموكراتيالىق ساياسي كۇشكە اينالعان.
1949 جىلى ارالعا قاشىپ بارىپ، باس ساۋعالاعان كارى-قۇرتاڭ باسقارۋشىلارى الدە قاشان و دۇنيەلىك بولىپ، قازىر ولاردىڭ ەكىنشى جانە ءۇشىنشى بۋىنى ساياسات تىزگىنىن ۇستاپ وتىر. ساياسي كۇش رەتىندە قىتاي كومپارتياسى قاۋساعان شالعا اينالىپ، الجي باستادى. ال، گوميندان وسى ارالىقتا مەيلىنشە جاسارىپ، دەموكراتيالىق اشىق قوعاممەن ۇيلەسىپ قىزمەت ەتۋگە قابىلەتتى بولىپ الدى...
قۋاندىق شاماحايۇلى
