Qytaı kompartııasy qartaıdy, kúni ótip barady. Kezinde qytaılyq kommýnıster azamattyq soǵystan yǵyr bolǵan Qytaı eliniń basyn biriktire aldy. Biraq, Mao Ze Dýnnyń qoǵamdyq-saıası synaqtar zerthanasy Qytaıdy ábden álsiretti. Den Sıao Pın ǵana jyǵylǵan Qytaıdy ornynan turǵyzdy.
Endi, kommýnıstik partııanyń kúni batyp barady. Jemqorlyq, paraqorlyq, az ulttarǵa kórsetilip jatqan zorlyq-zombylyqtary olardyń sońǵy tuıaq serpýleri ǵana bolsa kerek. Álem aldynda olar ózderiniń bylyq-shylyǵyn ábden aıparadaı ashyp bitirdi. Bul partııanyń endigi jerde alyp Qytaıdy ary qaraı alyp júre almaıtyny belgili boldy. Shyńjańda jasap jatqan jaýyzdyqtary úshin órkenıetti Batys álemi qytaı kompartııasyna laıyqty sybaǵasyn beredi, áli de ol alda. Az ulttar úshin ǵana emes, jalpy kúlli qytaı halqynyń qolynda dáýleti bar, ekonomıkalyq bostandyqty sezingen orta jáne joǵarǵy toptar úshin qytaı kompartııasy damýdy tejegish keritartpa kúsh.
Túbinde tutas Qytaıdy bólshektep ydyratatyn Tıbet, Shyńjań, Ishki Mońǵolııa emes, kerisinshe, Gýandon, Shanhaı, Fýjıan jáne solarmen Sychýan, Iýnan, Hýnan, Gýanshı bolyp shyǵýy bek múmkin.
Meıli, qytaı halqy bólshektenbese de, endi, bul eldi qandyqol kompartııa basqara almasy anyq. Taıvandaǵy Gomından partııasy araldan shyǵyp, qurlyqqa kelý yqtımaldylyǵy basym. Sebebi, Gomından degenimiz óziniń zańdyq mártebesinen qapııada aıyrylyp qalǵan saıası partııa. 1988 jyldan bastap demokratııalyq saıası kúshke aınalǵan.
1949 jyly aralǵa qashyp baryp, bas saýǵalaǵan kári-qurtań basqarýshylary álde qashan o dúnıelik bolyp, qazir olardyń ekinshi jáne úshinshi býyny saıasat tizginin ustap otyr. Saıası kúsh retinde qytaı kompartııasy qaýsaǵan shalǵa aınalyp, aljı bastady. Al, Gomından osy aralyqta meılinshe jasaryp, demokratııalyq ashyq qoǵammen úılesip qyzmet etýge qabiletti bolyp aldy...
Qýandyq Shamahaıuly
