تۇركىستان وبلىسىندا پوليتسەيلەرگە شابۋىل جاساعان ماس جۇرگىزۋشى ۇستالدى، – دەپ حابارلايدى Polisia.kz.
پرەزيدەنت قاسىم-جومارت توقاەۆتىڭ جارلىعىمەن كوروناۆيرۋستىڭ تارالۋىنىڭ الدىن الۋعا بايلانىستى ەلدە توتەنشە جاعداي رەجيمى ەنگىزىلدى. تج كەزىندەگى قۇقىق بۇزۋشىلىقتاردىڭ الدىن الۋ جانە جولىن كەسۋ ماقساتىندا جەتىساي اۋداندىق پوليتسيا بولىمشەسىنىڭ جپق قىزمەتكەرلەرى رەيدتىك ءىس-شارالار جۇرگىزدى. وسىنداي رەيد بارىسىندا تارتىپ ساقشىلارى قالا كوشەلەرىنىڭ قيىلىسىندا سەبەپسىز جۇرگەن “Mercedes ” اۆتوكولىگىن توقتاتادى. قۇجاتتاردى تالاپ ەتۋ كەزىندە ماس جۇرگىزۋشى تارتىپكە باعىنباي، الدىندا تۇرعان ەكى پوليتسەيدى سوعىپ، تارتىپ بۇزۋشىنى توقتاتۋعا ارەكەت جاساپ، كولىكتىڭ ەسىگىنىڭ جانىندا تۇرعان ءۇشىنشى پوليتسەيدى اۆتوكولىگىمەن سۇيرەي ءوتىپ، وقيعا ورنىنان ءىزىن سۋىتقان. ءۇش پوليتسيا قىزمەتكەرى جاراقات الىپ، ولارعا مەديتسينالىق كومەك كورسەتىلدى.
ورىن العان وقيعا تۋرالى جەتىساي اپب كەزەكشى بولىمىنە كەلىپ، حابارلاما بەرىلدى. جاسىرىنعان جۇرگىزۋشىنىڭ جەكە باسىن انىقتاۋعا، ۇستاۋعا پوليتسيا ءبولىمىنىڭ بارلىق جەكە قۇرامى باعىتتالدى. جەدەل-ىزدەستىرۋ ءىس-شاراسى بارىسىندا جەتىساي اۋداندىق پوليتسيا بولىمشەسىنىڭ قىزمەتكەرلەرى ءىزىن سۋىتپاي، جارتى ساعات ىشىندە جەتىساي قالاسىنىڭ تۇرعىنىن قۇرىقتادى. مەديتسينالىق كۋالاندىرۋعا سايكەس ءتارتىپ بۇزۋشى “ورتاشا دارەجەدە” ماس حالدە بولعان. جانە ەسىرتكى قولدانعانى انىقتالدى. اتالعان جايت قر قىلمىستىق كودەكسىنىڭ 379-بابى (بيلىك وكىلىنە باعىنباۋ) جانە 380-بابى (بيلىك وكىلىنە قاتىستى كۇش قولدانۋ) بويىنشا تىركەلدى. كۇدىكتى قاماۋعا الىندى. ءتارتىپ بۇزۋشىنىڭ اۆتوكولىگى ايىپتۇراعىنا قويىلدى. قازىرگى ۋاقىتتا اتالعان جايت بويىنشا سوتقا دەيىنگى تەرگەۋ امالدارى جۇرگىزىلىپ جاتىر.
