ءبىزدىڭ وكىمەت قىتايعا نارازىلىق نوتا بەردى. وتە دۇرىس! ەلىمىزدىڭ تۇتاستىعىنا، تاۋەلسىزدىگىنە قارسى ايتىلعان قىتاي باسىلىمدارىنىڭ ءاربىر ءسوزى رەسمي وكىمەتىنىڭ پوزيتسياسى رەتىندە تانىلۋى ءتيىس. سەبەبى، قحر-دا بارلىق مەديا قۇرالدارى كومپارتيانىڭ قاتال تسەنزۋراسى اياسىندا قىزمەت ەتەدى. قىتاي وكىمەتى رەسمي تۇردە رۇقسات بەرمەگەن ەشبىر ماقالا جارىققا شىقپايدى. ساياسي يدەولوگيالىق ءتارتىپ سولاي. قازاقستاننىڭ دەربەستىگىن ىدىراتۋعا باعىتتالعان، وتارلىقتى ناسيحاتتاعان "سوحۋ" سايتى - قىتاي وكىمەتى مەن ورتالىق پارتيا كوميتەتىنىڭ رەسمي ورگانى. سول سەبەپتەن ءبىزدىڭ ءسىم نارازىلىق نوتاسىن بەرۋى زاڭدى ارەكەت. قازىر بازبىرەۋلەر "قىتايعا بەكەر نوتا بەرىلدى، ەندى، قىتايدى ءبىز سىناساق، ولار بىزگە قارسى نوتا بەرەدى، اۋىزىمىز جابىلاتىن بولدى" دەگەندەي بوس بايبالام سالىپ جاتىر. مۇلدە ولاي ەمەس. ءبىزدىڭ كونستيتۋتسيا بويىنشا تسەنزۋراعا تيىم سالىنعان، ءسوز بوستاندىعىنا كەپىلدىك بەرىلگەن. سوندىقتان، قىتاي تۇرماق ءوز وكىمەتىمىزدى دە سىناي الامىز. تەك جالا جاپپاساق بولدى. مەيلى، "التاي، تارباعاتاي، شاۋەشەك، كۇيتىن - ءبىزدىڭ جەرىمىز، شىعىس تۇركىستان - قازاقستاننىڭ قۇرامداس بولىگى" دەپ تاريحشىلارىمىز ايتىپ جاتسا دا ءتۇبى شىندىققا جاناسادى. وعان قاي قىتايدىڭ تالاعى تارس ايىرىلسا دا تاريحي اقيقاتتى جوققا شىعارا المايدى. بۇل جەردەگى ايىرماشىلىق وراسان. ەگەر ءبىزدىڭ ەلدە قىتايعا قارسى شىندىقتى اشكەرە ەتىپ "ەگەمەن قازاقستان" مەن "كازپراۆدا" ماقالا جازسا، وكىمەتتىڭ رەسمي پوزيتسياسى دەپ قاراستىرىپ، ولاردىڭ نوتا جولداۋى ىقتيمال. ال، باسقالارعا ونداي تالاپ جۇرمەيدى. ءبىز اسىرەسە، مەملەكەتتىك ەمەس ءاربىر مەديا قۇرالدارى بۇل جەردە ءوز ەلىمىزدىڭ كونستيتۋتسياسىن نەگىزگە الا وتىرىپ قىتاي ء"ا" دەسە، ء"ما" دەي بەرۋىمىزگە تولىق قاقىلىمىز. سوندىقتان، بۇل جولى ءبىزدىڭ وكىمەت تاپسىرعان نوتانى بەتالدى تالقىلاپ وعان جاعىمسىز باعا بەرۋدىڭ ەش قاجەتى جوق. نارازىلىق نوتا رەسمي تۇردە دۇرىس تاپسىرىلدى.
باسقا ماتەريالدار
Adyrna.kz ұлттық порталының маңызды ақпараттарына жазылу
Соңғы жаңалықтар туралы хабардар болыңыз