الماتى وبلىسىنا قاراستى قاراساي اۋداندىق اۋرۋحاناسىنىڭ جۇقپالى اۋرۋلار بولىمىندە كورنوۆيرۋس جۇقتىرعان 7 ناۋقاس جاتىر. بۇل تۋرالى قازاقپارات حابارلايدى.
ولاردىڭ ساۋىعىپ امان-ەسەن ۇيلەرىنە شىعۋىنا دارىگەرلەر بارىن سالۋدا. سولاردىڭ ءبىرى ءبولىم مەڭگەرۋشىسى ساۋلە باراقباەۆا. ونىڭ ۇيىنە بارماعانىنا 20 كۇننەن اسىپ كەتكەن.
ساۋلە باراقباەۆا 30 جىلدىق تاجىربيەسى بار ينفەكتسيونيست دارىگەر. ونىڭ ايتۋىنشا، الەمدى ابىگەرگە سالعان كوروناۆيرۋس دەرتى ادامازاتقا جىبەرىلگەن سىناق. بۇل ىندەتتى ءۇمىت پەن سەنىم جانە جاۋاپكەرشىلىكتىڭ ارقاسىندا جەڭىپ شىعۋعا بولادى. «ادامزات وسى ۋاقىتقا دەيىن قانشاما پاندەميانى باستان وتكەردى. سوندىقتان بۇل پاندەميانى دا جەڭىپ شىعامىز. وعان ءۇمىت بار. ەڭ باستىسى تۇرىعىندار ءوز دەنساۋلىقتارىنا نەمقۇرايلىق تانىتپاۋى قاجەت. بارلىق كارانتيندىك رەجيمدى ساقتاسا، كوپ ۇزاماي بۇل قيىنشىلىقتار ارتتا قالادى»،– دەيدى بىلىكتى دارىگەر. ونىڭ ايتۋىنشا، بۇگىنگى كۇنى جۇقپالى اۋرۋلار بولىمىندە كوروناۆيرۋس جۇقتىرعان 7 ناۋقاس جاتىر. ءبارىنىڭ جاعدايى قاناعاتانارلىق. بۇعان دەيىن ءبىر پاتسيەنت ساۋىعىپ ۇيىنە شىعارىلعان. «جالپى بولىمدە 9 دارىگەر، 45 مەدبيكە جانە 40 سانيتاركا جۇمىس ىستەيدى. 30 مەديتسينا قىزمەتكەرى وسى ىندەتتى ەمدەۋگە جۇمىلدىرىلعان. بۇگىندە 19 ادام كارانتيندە، 11-ءى جۇمىستا. مامانداردىڭ ۇيلەرىنە بارماعانىنا ءبىر ايعا جۋىقتادى»،– دەيدى ءبولىم مەڭگەرۋشىسى.
ساۋلە باراقباەۆادا وتباسىن قاتتى ساعىنعان. ءۇي ىشىمەن تەلەفون ارقىلى قولى بوساعاندا عانا سويلەسەدى. «مەنىڭ ۇيگە بارماعانىما 20 كۇننەن اسىپ كەتتى. ۇيدە انام، جولداسىم جانە 12 جاستاعى قىزىم بار. ءبارىن قاتتى ساعىندىم. ولارمەن قولىم بوساعاندا بەينەقوڭىراۋ شالىپ، سويلەسەمىن. مەن ولاردى، ولار مەنى ساعىنىپ ءجۇر. بۇيىرسا امان-ەسەن وتباسىمەن قاۋىشارمىن. ازىرگە باستى ماقساتىم ناۋقاستارعا كومەكتەسۋ»،– دەيدى ساۋلە باراقباەۆا. ەلىمىزدە قاۋىپتىلىگى اسا جوعارى، جوعارى جانە ورتاشا دەگەن ءۇش دارەجەگە ساي ۇستەماقى تولەنە باستادى. اتالمىش ءبولىم دارىگەرلەرى قاۋىپتىلىگى جوعارى ساناتقا جاتاتىندىقتان، سوعان ساي ۇستەماقىلارىن الدى. «وسى جولى جالاقىعا قوسىمشا ۇكىمەتتەن ۇستەماقى تولەندى. ءبارىمىزدىڭ كارتوچكامىزعا ءتۇستى. ۇكىمەتكە ارىپتەسەرىمىنىڭ اتىنان العىسىمىزدى ايتامىن. ءبىزدىڭ بولىمشەگە كوروناۆيرۋسپەن قارىم-قاتىناستا بولعان كىسىلەردى اكەلەدى. سولارعا ءبىزدىڭ دارىگەرلەر ءبىرىنشى كومەك كورسەتەدى. ءبىزدىڭ ماقساتىمىز ۇستەماقى الۋ ەمەس ناۋقاستاردى ەمدەپ شىعارۋ»،- دەيدى ول. سونداي-اق، ول ادامداردى كارانتين رەجيمىن ساقتاپ، ۇيدەن شىقپاۋعا شاقىردى.
قازاقپارات اگەنتتىگى
