تاعى دا ەكىباستۇز!
تاياۋدا عانا «ادىرنا» ۇلتتىق پورتالىندا ەكىباستۇز قالاسىنىڭ اتى ءبىر شىققان ەدى. وندا قالا اكىمىنىڭ ورىنباسارى گۇلجان قادىرباەۆانىڭ ەلىمىزدە اتى جامان اۋرۋ شىعىپ، جۇرت كوڭىلى ەلەڭ-الاڭ وتىرعان شاقتا مىسىر ەلىنە دەمالىسقا اتتانعانىن جازىپ ەدىك. سول كۇنى-اق ەكىباستۇز قالاسى اكىمىنىڭ ءباسپاسوز قىزمەتى اتالعان ماسەلەگە قاتىستى رەسمي جاۋاپ بەرگەن ەدى. حاتتا بىلاي جازىلعان:
«گۇلجان قادىرباەۆا ءوزىنىڭ كەزەكتى ەڭبەك دەمالىسى كەزىندە مىسىرعا بارعانى شىندىق. دەمالىسقا ءوتىنىش جازۋ، دەمالىس تۋرالى وكىم شىعارۋ جانە ونىڭ ۇشىپ شىعۋى- ەلدە توتەنشە جاعداي ەنگىزىلگەنگە دەيىنگى كەزەڭگە كەلدى. ياعني، سول كەزدە بارلىق اۋە قاتىناستارى اشىق بولدى جانە ەلدەن شىعۋعا تىيىم سالىنعان جوق.
قازاقستانعا كەلگەن بويدا، گۇلجان قادىرباەۆا ىندەتكە قارسى بارلىق شارالاردى قاتاڭ قاداعالاپ، كوروناۆيرۋس ينفەكتسياسى سىناعىنان ءوتتى. ناتيجەسى - تەرىس.
دەگەنمەن، ەكىباستۇز قالاسىنىڭ باسشىلىعى ءسىزدىڭ رەداكتسياڭىزدىڭ جانە ءسىزدىڭ وقىرماندارىڭىزدىڭ اتالعان ساپار جونىندە الاڭداۋشىلىعىن بولىسەدى، سونداي-اق، الداعى ۋاقىتتا ءوز ەڭبەك دەمالىستارىن جوسپارلاۋدا ساق بولۋعا جانە مۇنداي جاعدايلاردى ەسكەرۋگە ۋادە ەتەدى».
البەتتە، حاتتا اكىم ورىنباسارىنىڭ شەتەلگە قاي كۇنى ۇشىپ، قاي كۇنى كەلگەنى ناقتى كورسەتىلمەگەن (ودان كوپشىلىكتىڭ كوڭىلىندە كۇمان قالعانىنا داۋ جوق). بىراق ول قالاي بولعاندا دا ەلدە كوروناۆيرۋس جۇقتىرعان ادام تىركەلىپ، حالىق كوڭىلىنە الاڭ كىرگەن كەز ەدى. جۇرت «كۇنىمىز نە بولار؟» دەپ وتىرعاندا جانە اۋرۋ شەتەلدەن كەلىپ جاتقاندا لاۋازىمدى تۇلعانىڭ ءوز جانىنىڭ راحاتىن ويلاپ، شەتەلگە تۇرا شاپقانى ءبىرتۇرلى كورىنبەي قايتسىن؟!
ءبىزدى سول حاتتاعى «مۇنداي جاعدايلاردى ەسكەرۋگە ۋادە ەتەدى» دەگەن جولدار قۋانتىپ ەدى. اكىمدىك ۋادە ەتسە، قالاي سەنبەسسىڭ؟! بىراق كەشە كەشكىسىن قالا اكىمدىگىنىڭ فەيسبۋك جەلىسىندەگى رەسمي پاراقشاسى - «Ekibastuz Time» اككاۋنتىندا جاريالانعان اقپارات كوڭىلىمىزدى سۋداي باستى: «ۋۆاجاەمىە ەكيباستۋزتسى! دليا ۆاشەگو ۋدوبستۆا ۆ تسەنترە زانياتوستي ناسەلەنيا اكيماتا گورودا ي ۆ گورودسكوم تسەنترە كۋلتۋرى «ونەر» وتكرىتى پۋنكتى پريەما ي كونسۋلتاتسي پو پولۋچەنيۋ دوپولنيتەلنىح سوتسيالنىح ۆىپلات ۆ رازمەرە ودنوي مينيمالنوي زارابوتنوي پلاتى (42500 تگ). ۆرەميا رابوتى پۋنكتوۆ: س پونەدەلنيكا پو پياتنيتسۋ س 9.00 دو 17.00 چ. ۆ سۋببوتۋ ي ۆوسكرەسەنە س 10.00 دو 17.00 چ».
پاۆلودار وبلىسىندا بۇگىنگى تاڭدا ءتورت ادام كوروناۆيرۋس جۇقتىرىپ، ونىڭ بىرەۋى قايتىس بولعانى ايان. ال ەلىمىزدە ادامداردىڭ توپتاسىپ جيىلۋىن بولدىرماۋ ءۇشىن بارلىق مەملەكەتتىك جانە باسقا دا قىزمەتتەر ونلاين رەجىمگە كوشىپ كەتتى. سوعان قاراماستان ەكىباستۇز قالاسى اكىمدىگىنىڭ بۇلايشا پىسىقسىعانىنا جول بولسىن؟!
بۇل دەگەنىمىز – ادامداردىڭ توپتاسۋىن قولدان ۇيىمداستىرۋ، ادامداردى، ونىڭ ىشىندە اكىمدىك قىزمەتكەرلەرىن دە بيلىكتىڭ قولىمەن قاۋىپكە يتەرمەلەۋ. بۇكىل ەل «ءبىز ۇيدەمىز» ناۋقانىن جاريالاپ جاتقاندا، ەكىباستۇز اكىمدىگىنىڭ بۇل قاي ساسقانى؟! 42500 تەڭگە ادام جانىنان قىمبات بولعانى ما؟!
اسۋان تايجان،
پاۆلودار وبلىسى
