Bıyl – eriktiler jyly. El ishindegi otansúıgish jastardyń bir úıdiń balasyndaı uıysyp, jurt kóńilin toǵaıtar jumystar istep jatqanyn aqparattardan kórip qýanysyp jatyrmyz. Aspan astyn alańdatyp, álekke salǵan koronavırýstyń mashaqaty da ońaı bolyp jatqan joq. Osy kezde de eriktiler aqqalattylar men otanqorǵaýshylardan qalǵan abyroıly sharýalardy ózdiginen uıymdasyp, bereke-birlikpen tyndyrýda. El basyna kún týǵanda judyryqtaı jumylǵan jastardyń osyndaı qadamdarynan eldiń erteńin kórgeneı bolamyz. Sózdiń reti kelgen soń, sizderge mynadaı bir júrekjyltar jańalyqty jetkizýdi jón kórip otyrmyz.
Elimizde taralǵan indettiń jaǵdaıynan el ishindegi ǵana emes, alys-jýyq sheteldegi qandastarymyz da alańdap jatyr. Qazaqstan – osy topyraqta ónip jatqan siz ben bizdiń týǵan elimiz bolsa, alystaǵy qandastardyń arqasúıer rýhanı otany. Árıne, rýhanı otanyna oralýdy kún sanap ańsap, jabylǵan shekaranyń ashylýyn asyǵa kútip júrgen jandar qanshama. Tek taǵdyryn týǵan halqymen, atajurtymen birlestirgisi keletin arǵy-bergi aǵaıynnyń bir shańyraq astynda basy túgendeler kún týsyn dep tileıik!
Qytaıda turatyn qandastarymyz sol eldegi mılııard halyqpen birge vırýs kúresinde jeńiske jetip, alań kóńilden aryla bastaǵany belgili. Irgekórshimizde bul kúnde jabylǵan qalalar ashylyp, búkil el boıynsha óndiris pen jumys, qalypty turmys negizinen qalqyna kele bastady. Sol elde turatyn qandastarymyz endi atajurttaǵy siz ben bizdiń taǵdyrymyzǵa da alańdaýly. «Altaıdaǵy taýtekeniń tirsegine tas tıse, Arqadaǵy arqardyń múıizi syrqyraıdy» emes pe!
Qytaıda turatyn bir qandas baýyrymyz (aty-jónin jarııalamaýdy ótingen) Qazaqstanda aty jaman indet jaıyla bastaǵannan beri tún uıqysy tórt bólinip júrgenin estidik. Árıne, osy bir jıyrma bir jastaǵy jas jigit qana emes, elimizdegi qaterli aýrý jaǵdaıynan ol elde turatyn mılııondaǵan týystarymyz alańdap jatqany belgili.
Sonymen, tepse temir úzetin azamat óziniń bir aılyq eńbekaqysyn 5000 ıýan (shamamen 300 myń teńgege jýyq) aqshany Almaty obylysy Uzynaǵashta turatyn Qaısa esimdi jigitke jiberip, «osy aqshanyń jetisinshe, muqtaj jandarǵa kerek-jaraq alyp berseńiz» dep ótinish jasaıdy. Qaısa amanatty alǵannan keıin Jambyl oblysy, Qordaı aýdany, Otar aýylynda turatyn, januıasynda qıynshylyǵy bar 25 otbasyna azyq-túlikter alyp, jetkizip berip qaıtty. Árıne, 300 myń teńge bir qaraǵanda kóp aqsha bolmaǵanymen, onyń arjaǵynda janashyrlyq pen uly qasıet menmundalap tur.
Keshe, 4-sáýir kúni árqaısy otbasyna 10 myń teńgeden asyp jyǵylatyn azyq-túlik, kerek-jaraqty kólikke tıep alyp, el boıynsha karantın júrilip jatqanda, qatysty mekemelerden ruqsat qaǵaz alyp, Otar aýyldyq ákimshiliginen járdemge zárý aýyldastardyń tizimin surap, sol tizim boıynsha, birer kún ýaqyttaryn shyǵaryp, Qaısa Asylbekuly men Sáýle Taldybaeva alystaǵy aqjaısań baýyrymyzdyń júrek jylýyn jetkizp qaıtypty.
Arǵy betten aqjarma sálemin joldap, alań bolǵan aǵaıynǵa shamasynsha járdemdesýdi oılaı bilýdiń ózi esti kisini oılandyratyn, ǵıbrat alýǵa tatıtyn, jan tebirenter ıgi is qoı. Alystaǵy inimizdiń aty-jónin bilmesek te, atajurtym dep ishken asyn jerge qoıǵan erge tán qasıetine tánti bolyp, ishteı tileýlestik bildirdik. Iá, sózimizdiń basyna qaıta orala ketsek, bıyl – eriktiler jyly. Sol eriktiler uranyna qany qazaq, sheteldik qandasymyz ún qosyp jatqany adamǵa oı salady. Kemediniń tileýi bir. «Saýsaq bólek bolsa da, bilek bir, meken bólek bolsa da júrek bir» degen osy da. Estýge qaraǵanda izetti inimiz poıez beketinde júk tıeýshi bolyp isteıdi eken. Qazaqtyń márttigi qanynda qalǵan belgisiz azamat osylaısha bir tebirentip tastady.
El ishi jaman tymaýdan aıyǵyp, aǵaıynmen arqa-jarqa júzdesetin kún týsyn degen tilegimizdi aıttyp, jańalyǵymyzdyń núktesin qoıdyq.
Ádilet Ahmetuly
