كوروناۆيرۋسپەن اۋىرعان ايەل جاۋاپقا تارتىلدى

4183
Adyrna.kz Telegram

الماتىدا كورونوۆيرۋسپەن اۋىرعان ايەل وزىمەن بايلانىستا بولعان ادامدار تۋرالى مالىمەت بەرۋدەن باس تارتقانى ءۇشىن قىلمىستىق جاۋاپكەرشىلىككە تارتىلدى، دەپ حابارلايدى الماتى قالالىق پوليتسيا دەپارتامەنتىنىڭ ءباسپاسوز قىزمەتى.

حابارلامادا:

الماتى قالالىق پوليتسيا دەپارتامەنتى كوروناۆيرۋسپەن اۋىرعانداردىڭ ءبىرى - ازاماتشا ب-نىڭ سانيتارلىق قىزمەت جۇمىسىنا كەدەرگى كەلتىرىپ، ۆيرۋسقا شالدىققاننان كەيىن وزىمەن بايلانىستا بولعان ازاماتتاردىڭ مالىمەتتەرىن بەرۋدەن قاساقانا باس تارتقانىن حابارلايدى. ايەل قر قىلمىستىق كودەكسىنىڭ 304-بابىندا (سانيتارلىق ەرەجەنى نەمەسە گيگيەنالىق نورماتيۆتەردى بۇزۋ) كوزدەلگەن قىلمىستىڭ بەلگىلەرى بويىنشا قىلمىستىق جاۋاپكەرشىلىككە تارتىلدى، - دەلىنگەن. 

الماتى قالالىق پوليتسياسى ورىن العان كۇردەلى جاعدايعا بايلانىستى ازاماتتاردى قالالىق قىزمەتتەرگە كوروناۆيرۋس ينفەكتسياسىن انىقتاۋ جانە الدىن الۋ بويىنشا بارىنشا جاردەم كورسەتۋگە جانە جۇرگىزىلىپ جاتقان شارالارعا تۇسىنىستىكپەن قاراۋعا شاقىرادى.

ايتا كەتەرلىگى، بۇعان دەيىن قازاقستاندا تاعى 2 ادامنىڭ كوروناۆيرۋستىق ينفەكتسياسىن جۇقتىرعانى انىقتالدى. ولاردىڭ ءبىرى 1959 جىلى تۋعان ايەل الماتىدا ستاتسيوناردا جاتقان بولاتىن.

پىكىرلەر