كوروناۆيرۋس: ميلاننان كەلگەن 14 جولاۋشى باسقا قالاعا كەتىپ قالعان

5718
Adyrna.kz Telegram

نۇر-سۇلتاندا شەتەلدەن كەلگەن ەكى قازاقستاندىقتان كوروناۆيرۋس تابىلدى. ەلوردانىڭ قوعامدىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا ءبىرىنشى ناۋقاسپەن بىرگە ۇشاقتا بولعان ازاماتتار تۋرالى ايتىپ بەردى. بۇل تۋرالى Sputnik قازاقستان حابارلايدى.

ونىڭ ايتۋىنشا، ميلاننان ۇشىپ كەلگەن بورتتا ناۋقاستان بولەك 89 ادام بولعان. ولاردىڭ ىشىندە 42 ادام – قازاقستان ازاماتى، 42 ادام – رەسەي ازاماتى. نيدەرلاندى، اۆستراليا، اقش، ۋكراينا مەن مەكسيكادان ءبىر ادامنان بولعان. بارلىعىمەن بايلانىس ورناتىلدى.

"35 جولاۋشى نۇر-سۇلتان قالاسىنان تىس جەرگە شىعىپ ۇلگەرگەن. ولاردىڭ ىشىندە 21 ادام رەسەيگە كەتىپ قالعان. ال 14 جولاۋشى بىردەن ايماقتارعا تارالىپ كەتكەن. ولاردى جەرگىلىكتى جەردەگى دەنساۋلىق ساقتاۋ باسقارمالارى باقىلاۋعا الدى. سونىڭ ىشىندە الماتى، اتىراۋ، ستەپنوگورسك پەن قاراعاندى قالاسى بار. قازىرگى كەزدە ولاردى ستاتسيونارعا وقشاۋلاۋ شارالارى اتقارىلىپ جاتىر", - دەدى قيسىقوۆا استانادا وتكەن ءباسپاسوز ءماسليحاتىندا.

وسىلايشا، نۇر-سۇلتاندا 54 جولاۋشى قالعان. ولاردىڭ ىشىندە 53 ادام اۋرۋحاناعا كارانتينگە جاتقىزىلدى. ءبىر ادام ديپلومات بولىپ شىقتى.

"ول – رەسەي فەدەراتسياسىنىڭ ازاماتى. ديپلوماتيالىق رانگى بار. رەسەي فەدەراتسياسىنىڭ ەلشىلىگى نوتا جىبەردى. وسىعان بايلانىستى ول ازامات ەلشىلىك ايماعىندا قالدى", - دەپ اتاپ ءوتتى قيسىقوۆا.

ەستەرىڭىزگە سالا كەتەيىك، قازاقستاندا كوروناۆيرۋسقا شالدىققانداردىڭ سانى 6 ادامعا جەتتى.

بۇگىن دەنساۋلىق ساقتاۋ مينيسترلىگى ەكى ادامنان كوروناۆيرۋس تابىلعانىن مالىمدەدى. ال كەشە دەنساۋلىق ساقتاۋ ءمينيسترى ەلجان ءبىرتانوۆ ەكى قازاقستاندىقتان كوروناۆيرۋس تابىلعانىن جاريالاعان بولاتىن. ولاردىڭ بىرەۋى قازاقستانعا 9 ناۋرىزدا، ال ەكىنشىسى 12 ناۋرىزدا تۇندە ۇشىپ كەلگەن. ارتىنشا نۇر-سۇلتاندا كوروناۆيرۋستىڭ العاشقى دەرەگى تىركەلدى. ناۋقاس ميلان قالاسىنان نۇر-سۇلتانعا 12 ناۋرىزدا كەلگەن. كەشكە قاراي ءتورتىنشى ادامنان كوروناۆيرۋس تابىلدى. 76 جاستاعى ازامات گەرمانيادان الماتىعا ۇشىپ كەلگەن.

پىكىرلەر