رەسەي فەدەراتسياسى، التاي رەسپۋبليكاسىنان الماتىعا ارنايى كەلگەن ءداستۇرلى ورىنداۋشىلاردى الماتى قالاسى تىلدەردى دامىتۋ باسقارماسى باسشىسى ماماي احەت مىرزا قابىلداپ، باسقارما ۇجىمىمەن كەزدەسۋ ۇيىمداستىردى. الىستان ات ارىتىپ كەلگەن ىرىستۋ مەچەشەۆ پەن التىن-اي باراتوۆا ەسىمدى ونەرپازدار، تۇرىكتانۋشى بىلگە وزەل باۋىرلاس ەلدەردىڭ ىستىق ىقىلاسى مەن سالەمدەرىن الا كەلگەندىگىن جەتكىزدى.
الماتى قالاسى تىلدەردى دامىتۋ باسقارماسى باسشىسى ماماي احەت قازاق ەپوستارى بويىنشا تۇسىرىلگەن مۋلتفيلمدەرىن كورسەتىپ، قوناقتارعا ديسكىلەرىن تارتۋ ەتتى. التايلىق تۋىستارىمىز التاي ەپوستارىنىڭ وتە كوپتىگىن، بىراق، وزدەرىنىڭ حالىق تۋىندىلارىن جاس بالالارعا جەتكىزۋ ءۇشىن مۋلتفيلم تۇسىرۋگە مۇمكىندىكتەرى جوقتىعىن وكىنىشپەن ايتىپ، قازاقتاردىڭ يگى ىستەرىنە ءوز سۇيىنىشتەرىن جەتكىزدى. «ءبىز قازاقتى تاۋەلسىز ەل رەتىندە ارقا سۇيەپ، قۇرمەت تۇتامىز. بىزدە كوپ دۇنيەگە ەركىندىك جوق. بولاشاقتا التاي حالقىنىڭ ەپوستارىنان دا مۋلتفيلم ءتۇسىرىپ بەرسەڭىزدەر» دەگەن ءوتىنىش ايتتى التىن-اي باراتوۆا.
الماتى قالاسى تىلدەردى دامىتۋ باسقارماسىنىڭ باسشىسى قوناقتارعا تۇرىك حالىقتارىنىڭ بىرلىگى مەن دوستىعىن نىعايتۋ، ورتاق قۇندىلىقتارىن ناسيحاتتاۋ ىسىندەگى ەرەڭ ەڭبەكتەرى ءۇشىن العىس حاتپەن ماراپاتتاپ، ەرەكشە ىقىلاس ءبىلدىردى. تۇرىكتانۋشى بىلگە وزەل، تالانتتى انشىلەر ىرىستۋ مەچەشەۆ پەن التىن-اي باراتوۆا الماتى قالاسى اكىمشىلىگى تاراپىنان كورسەتىلگەن ىقىلاس-ىلتيپاتقا زور العىستارىن جەتكىزدى.
ارمان اۋباكىر،
«ادىرنا» ۇلتتىق-ەتنوگرافيالىق بىرلەستىگى» قوعامدىق قورىنىڭ جەتەكشىسى
