Reseı Federaııasy, Altaı Respýblıkasynan Almatyǵa arnaıy kelgen dástúrli oryndaýshylardy Almaty qalasy Tilderdi damytý basqarmasy basshysy Mamaı Ahet myrza qabyldap, basqarma ujymymen kezdesý uıymdastyrdy. Alystan at arytyp kelgen Yrystý Mecheshev pen Altyn-Aı Baratova esimdi ónerpazdar, túriktanýshy Bilge Ózel baýyrlas elderdiń ystyq yqylasy men sálemderin ala kelgendigin jetkizdi.
Almaty qalasy Tilderdi damytý basqarmasy basshysy Mamaı Ahet qazaq epostary boıynsha túsirilgen mýltfılmderin kórsetip, qonaqtarǵa dıskilerin tartý etti. Altaılyq týystarymyz Altaı epostarynyń óte kóptigin, biraq, ózderiniń halyq týyndylaryn jas balalarǵa jetkizý úshin mýltfılm túsirýge múmkindikteri joqtyǵyn ókinishpen aıtyp, qazaqtardyń ıgi isterine óz súıinishterin jetkizdi. «Biz qazaqty Táýelsiz el retinde arqa súıep, qurmet tutamyz. Bizde kóp dúnıege erkindik joq. Bolashaqta Altaı halqynyń epostarynan da mýltfılm túsirip berseńizder» degen ótinish aıtty Altyn-Aı Baratova.
Almaty qalasy Tilderdi damytý basqarmasynyń basshysy qonaqtarǵa túrik halyqtarynyń birligi men dostyǵyn nyǵaıtý, ortaq qundylyqtaryn nasıhattaý isindegi ereń eńbekteri úshin alǵys hatpen marapattap, erekshe yqylas bildirdi. Túriktanýshy Bilge Ózel, talantty ánshiler Yrystý Mecheshev pen Altyn-Aı Baratova Almaty qalasy ákimshiligi tarapynan kórsetilgen yqylas-iltıpatqa zor alǵystaryn jetkizdi.
Arman ÁÝBÁKIR,
«Adyrna» ulttyq-etnografııalyq birlestigi» qoǵamdyq qorynyń jetekshisi
