بەلگىلى كاسىپكەر باۋىرجان وسپانوۆ تۋعان جەرى – الماتى وبلىسى، الاكول اۋدانى، جىلاندى اۋىلىنىڭ تۇرعىندارىنا تەگىن قىمىز تاراتىپ، سپيرتتىك ىشىمدىك ساۋداسىن توقتاتتى.
كاسىپكەر اۋەلدە ورتالىقتاعى مەشىتتەردىڭ بىرىندە كەز-كەلگەن ادام كىرىپ، تەگىن قىمىز ىشۋگە مۇمكىندىك جاساپ قويعان. وسىنىڭ ارقاسىندا جەرگىلىكتى دۇكەندەر سپيرتتىك ىشىمدىكتى ساۋدالاۋدى توقتاتقان. ونىڭ مۇنداي قايىرىمدىلىق ىسپەن اينالىسۋىنا سالاۋاتتى ءومىر سالتىن ناسيحاتتاۋ مەن جاستاردى سپورتقا باۋلۋعا دەگەن قۇلشىنىسى سەبەپ بولعان. سونىمەن قاتار ول قازاقتىڭ ۇلتتىق سۋسىنىن تانىمال برەنتكە اينالدىرۋعا نيەتتى. وسى ماقساتتا جىلاندى اۋىلىندا قاتارىنىنان 20 قۇلىندى بيە ساۋىلىپ جاتىر. بۇل جەردە قىمىزدان باسقا دا ءسۇت ونىمدەرى دايىندالىپ، ولار دا تەگىن تاراتىلۋدا. ول جەردە جۇمىس ىستەپ جاتقان ساۋىنشىلار مەن جۇمىسشىلارعا كاسىپكەر ءوز قالتاسىنان ەڭبەكاقى تولەپ وتىر.
باۋىرجان كەڭەسبەكۇلى وسپانوۆتىڭ جىلاندى اۋىلدىق وكرۋگىنە كورسەتىلگەن دەمەۋشىلىگى.
2002 جىل. جىلاندى اۋىلىندا 130 ورىندى مەشىت سالىندى، 2010 جىلى جىلاندى اۋىلدىق مادەنيەت ءۇيى كۇردەلى جوندەۋدەن وتكىزىلىپ، سپورت كەشەنى سالىندى، 2011 جىلى جىلاندى ورتا مەكتەبى كۇردەلى جوندەۋدەن وتكىزىلدى.
2012 جىل. حالىققا تۇرمىستىق قىزمەت كورسەتۋ ورتالىعى جانە 15 ادامدىق جۇمىس ورنى اشىلدى (تىگىن تسەحى، شاشتاراز، اياق كيىم جوندەۋ). جاس ماماندارعا 3 تۇرعىن ءۇي سالىندى. 2013 جىلى جىلاندى مەكتەپ-ليتسەي ماماندارىنا 11 تۇرعىن ءۇي سالىنىپ، (تۇرمىستىق تەحنيكاسىمەن، جيھازدارىمەن) بەرىلدى. 3 تۇرعىن ءۇي كۇردەلى جوندەۋدەن وتكىزىلدى. اۋىلدىق مادەنيەت ۇيىنە كينوتەاتر قويىلدى. اۋىلدىڭ جاستارىنا دەمالىس ساياباعى سالىنىپ، كوشەلەرگە جارىق باعانالارى ورناتىلدى. «مەكتەپكە جول» اكتسياسىمەن مەكتەپ وقۋشىلارى مەن ۇستازدارى جانە كىشى تەحنيكالىق قىزمەتكەرلەرى تولىقتاي كيىممەن قامتىلدى. مەكتەپ كىتاپحاناسى وقۋ قۇرالدارىمەن ەلەكتروندى وقۋ كىتاپتارىمەن، جيھازدارىمەن تولىق جابدىقتالدى. مەكتەپكە 15 كومپيۋتەر مەن 40 پارتا بەرىلدى. مەكتەپ ينتەرناتىندا 40 ورىندىق جاتار جەر تولىقتاي جابدىقتالدى. مەكتەپتىڭ فيزيكا، بيولوگيا، حيميا زەرتحانالارى تولىقتاي جابدىقتالدى. جەتىسۋ الاتاۋى ۇلتتىق تابيعي پاركىنە عيمارات سالىنىپ بەرىلدى. جىل سايىن جاعدايى تومەن وتباسىلارعا، كوپ بالالىلارعا، جەتىم-جەسىرلەرگە اقشالاي، زاتتاي، مالداي كومەك كورسەتىلەدى. جىلاندى اۋىلدىق وكرۋگى اكىمدىگىنىڭ عيماراتى تولىق كۇردەلى جوندەۋدەن وتكىزىلدى. مادەنيەت ءۇيى اعىمدى جوندەۋدەن وتكىزىلدى. 2002 جىلدان بەرى جىلاندى اۋىلدىق مەشىتى (قىسقى جىلىتۋ كەزەڭى، اعىمدى جوندەۋ، يمامنىڭ ەڭبەكاقىسى، بارلىق ءدىني مەرەكەلەر) تولىق قارجىلاندىرىلدى. 1998 جىلدان باستاپ اۋىلداعى مادەني ءىس-شارالاردى تولىعىمەن قارجىلاندىرادى. دەنساۋلىعى ناشار ازاماتتاردىڭ ەم الۋىنا تولىق كومەك كورسەتىلەدى. 2014 جىلى 2 تۇرعىن ءۇي سالىندى. ورتالىق مونشا سالىپ، قولدانىسقا بەرىلدى. 2015 جىلى ورتالىق ساياباققا سپورت جابدىقتارى، سوعىس قۇرباندارىنا ارنالعان ەسكەرتكىش ورناتتى.
لەپسى اۋىلدىق وكرۋگىندە 2014 جىلى «اۋىلىم» كافەسى كۇردەلى جوندەۋدەن ءوتىپ، بارلىق جيھازىمەن حالىق يگىلىگىنە بەرىلدى. 2014 جىلى اۋىلدىق مادەنيەت ۇيىنە كۇردەلى جوندەۋ جۇمىستارى جۇرگىزىلىپ، كينوتەاتر اشىلدى. 2014 جىلى بال قوراپتاۋ تسەحى اشىلدى; 2014 جىلى اۋىلدىڭ ىشكى كوشەلەرىنە كۇردەلى جوندەۋ جۇمىستارى جۇرگىزىلدى. بۇل جۇمىستارعا بارلىعى 280 ملن. تەڭگە قاراجات بولىنگەن.
جاسۇلان ءناۋرىزالى
