بۇگىن تىلەۋحان شىلدەبايۇلى باستاعان ماماندار الماتى قالاسى اكىمدىگىنىڭ ءباسپاسوز ورتالىعىندا كوروناۆيرۋس ينفەكتسياسىنىڭ تارالۋىنا قارسى ارەكەت ەتۋ بويىنشا اتقارىلىپ جاتقان جۇمىس تۋرالى شۇعىل ءباسپاسوز ءماسليحاتىن وتكىزدى. شۇعىل جيىنعا Nege.kz پورتالىنداعى ماقالا سەبەپ بولدى دەپ شامالايمىز.
«ددسۇ-نىڭ مالىمەتىنشە، الەمنىڭ 72 ەلىندە كوروناۆيرۋستىڭ تارالعانى بەلگىلى. الماتى قالاسى، مەكەمەلەرى قازىر اۋرۋدىڭ الدىن الۋعا جانە ەپيدەمياعا قارسى تۇرۋعا بايلانىستى تولىق دايار. بۇل جۇمىستار قالالىق شتابتىڭ باسقارۋىمەن جۇرگىزىلۋدە. بۇگىندە قالاعا ينفەكتسيانىڭ تارالۋ قاۋپى جوعارى مەملەكەتتەردەن كەلگەن ادامداردىڭ ءتىزىمى كۇن سايىن مونيتورينگ ورتالىعىنا بەرىلەدى. وسى ورتالىقتا ارقايسىسى جەكە زەرتتەلىپ، ءارتۇرلى كاتەگورياعا ءبولىنىپ، مەديتسينالىق باقىلاۋعا الىنادى. قالاداعى كوپسالالى مەديتسينالىق ورتالىقتا 14 كۇنگە كارانتينگە جاتقىزاتىن ادامداردى انىقتايمىز. قازىر اۋرۋحانادا «ا» ساناتىنداعى 131 ادام جاتىر. ءبىرىنشى «ب» ساناتىنداعى 119 ادام ۇيدە دارىگەر باقىلاۋىندا، ەكىنشى ساناتتاعى 955 ازامات تا ءجۇرىس-تۇرىسىن شەكتەيدى، ال مونيتورينگتىك باقىلاۋدا 1632 ادام بار. مەديتسينالىق مەكەمەلەر مەديكامەنت قورى، قۇرال-جابدىقتارمەن قامتاماسىز ەتىلگەن. ادام سانى كوبەيسە، قوسىمشا توسەك ورىنمەن قامتاماسىز ەتىلەدى», – دەدى باسقارما باسشىسى.
الماتى قالاسى تۋارلار مەن قىزمەتتەردىڭ قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى اسەل قالىقوۆانىڭ ايتۋىنشا، قازىر قىتايدان تىكەلەي ۇشىپ كەلەتىن رەيستەر توقتادى. «الماتىنىڭ قاقپاسى – اۋەجاي. قازىر وڭتۇستىك كورەيادان اپتاسىنا ەكى-اق رەيس ۇشىپ كەلەدى. بۇعان دەيىن كوپ ەدى. ارنايى 24 مامان كۇندىز-ءتۇنى جۇمىس ىستەپ، كەلىپ-كەتەتىن رەيستەردى انىقتاپ، ساۋالناماعا جاۋاپ الادى. الماتىعا قانشا ادام ۇشىپ كەلدى نەمەسە ترانزيتپەن ۇشىپ كەتكەنىن قاداعالايدى. قازىر ترانزيت زالى اشىلدى. ولاردىڭ قالاعا شىقپاۋىن قاداعالايدى»، – دەدى.
«كوروناۆيرۋس الەمدى الاڭداتىپ وتىر. دەنساۋلىق – ادامعا بەرىلگەن امانات. بىزدەن بۇل ومىردە دە، احيرەتتە دە سۇرالادى. قۇران كارىمدە: «وزدەرىڭدى وزدەرىڭ اپاتقا يتەرمەلەمەڭدەر» دەيدى. جۇما نامازداردا بارىنشا ايتىپ جاتىرمىز. قۇداي بەتىن ءارى قىلسىن، ساقتانساق – ساقتايدى. كوپ ادام شوعىرلاناتىن جەردەن اۋلاق ءجۇرىپ، مۇمكىندىك بولسا توي، استى كەيىنگە قالدىرساق دەيمىن. ال توعجانوۆ مىرزا مۇنى ءجاي عانا كەڭەس تۇرىندە ايتتى. بۇل تاپسىرما ەمەس. ەكىنشىدەن، بۇل كەڭەستى ىستىعى كوتەرىلىپ، اۋرۋدىڭ بەلگىلەرى بار ادامدارعا ايتتى» دەدى.
مەديتسينالىق ماسكانىڭ جەتىسپەۋشىلىگى، باعاسىنىڭ شارىقتاپ كەتۋى جايىندا دا ساۋال قويىلدى. الايدا، ماماندار: «بۇل جەكەمەنشىك وندىرۋشىلەردىڭ قولىمەن جاسالىپ وتىر. ولار قانداي باعا قويادى، وزدەرى بىلەدى. بىراق بىزدە ماسكا قورى جەتكىلىكتى» دەپ سەندىردى.
قىسقاسى، ماماندار ءار ادام ساقتىق شاراسىن وزىنەن باستاۋى كەرەك دەيدى. «حالىق كوپ جينالاتىن جەرلەرگە بارۋدى شەكتەگەن دۇرىس. قالانىڭ مەكەمەلەرىنە مادەني-قوعامدىق ءىس-شارالاردى ازايتقان ءجون دەپ كەڭەس بەرەر ەدىم» دەگەن ۇندەۋ جولدادى. ال كوروناۆيرۋس جايىندا كەڭەس العىڭىز كەلسە، نۇر-سۇلتان قالاسىنداعى 1406 سoll ورتالىعىنا تەلەفون شالۋعا بولادى.
nege.kz
