28 اقپاندا تۇستەن كەيىن نۇر-سۇلتان قالالىق پروكۋراتۋراسى تەرگەۋ يزولياتورىندا جۇمباق جاعدايدا كوز جۇمعان بەلسەندى دۋلات اعادىلدىڭ دەنەسىندەگى "ازاپتاۋ ىزدەرى" تۋرالى اقپاراتقا تۇسىنىكتەمە بەردى. 28 اقپانعا قاراعان ءتۇنى الەۋمەتتىك جەلىدە مارقۇمنىڭ دەنەسىندەگى "جاراقات" تۋرالى ۆيدەو تاراعان ەدى. كەيبىر بەلسەندىلەر مەن قۇقىق قورعاۋشىلار ونى "يزولياتوردا ۇرىپ-سوققان بولۋى مۇمكىن" دەپ مالىمدەپ، بيلىكتەن ءتۇسىندىرۋدى تالاپ ەتكەن.
نۇر-سۇلتان قالاسى پروكۋرورىنىڭ ورىنباسارى ەلدوس كەلىمجانوۆ "اعادىلدى تەرگەۋ يزولياتورىندا ازاپتاعان" دەگەن اقپاراتتى جوققا شىعارىپ، اعادىل دەنەسىندەگى "داقتاردى" بيولوگيالىق ءولىم بەلگىلەرى دەپ اتادى.
- [الەۋمەتتىك جەلىلەردە تاراعان] ۆيدەوماتەريالداردا مايىتتە داقتار بارى ايتىلادى. ونى دەنە جاراقاتى دەپ اتايدى. مۇندا ونىڭ پايدا بولۋ سەبەبىن تۇسىندىرە الاتىن ماماندار بار. مايىتتەگى داقتار - بۇل بيولوگيالىق ءولىمنىڭ بەلگىلەرى. مەديتسينالىق تىلمەن ايتقاندا، داقتار ادامنىڭ جۇرەگى توقتاعاننان كەيىن كەمىندە ءبىر ساعات وتكەننەن كەيىن پايدا بولادى، - دەدى ول.
تىكەلەي ەفيردى كورىڭىز:
ونىڭ ايتۋىنشا، باستاپقىدا اعادىلدىڭ دەنەسىن تالاپكەر اۋىلدىق اۋرۋحاناسى مەن تەرگەۋ يزولياتورىنىڭ دارىگەرلەرى قاراپ شىعىپ، "سوققى ىزدەرىن" تاپپاعان. وقيعاعا قاتىستى قوزعالعان قىلمىستىق ءىس اياسىندا سوت مەديتسينالىق ساراپتاما تاعايىندالعان. 26 اقپاندا مارقۇمنىڭ اعاسى مەن ادۆوكات باۋىرجان ازانوۆتىڭ قاتىسۋىمەن مايىتكە ساراپتاما جۇرگىزىلگەن.
"مارقۇمنىڭ اعاسى مەن ادۆوكات ازانوۆ ساراپتاما قورىتىندىسىنا شاعىمدانعان جوق. ءمايىتتى ساراپتاۋ مەن زەرتتەۋ بارىسى ۆيدەوعا ءتۇسىرىلدى. ەتيكا تالاپتارىنا بايلانىستى جانە تۋىستارى رۇقسات بەرمەگەندىكتەن ۆيدەونى جاريالاي المايمىز. بۇعان دەيىن ساراپتامانىڭ الدىن الا قورىتىندىسىن ايتقانبىز. اعادىل جۇرەك قانتامىرلارىنىڭ جەتىسپەۋشىلىگىنەن قايتىس بولعان" دەدى كەلىمجانوۆ.
ول ساراپتامانىڭ تۇپكىلىكتى قورىتىندىسى جاقىن ارادا شىعاتىنىن ايتىپ، ازاماتتاردى اسىعىس قورىتىندى جاساماۋعا جانە تەكسەرىلمەگەن اقپاراتتى تاراتپاۋعا شاقىردى.
الەۋمەتتىك جەلى مەن مەسسەنجەرلەردە تاراعان ۆيدەودا بىرنەشە ادام ەكى كۇندىك ساراپتامادان كەيىن ءمايىتحانادان مارقۇمنىڭ سۇيەگى جەتكىزىلگەنىن ايتىپ، دەنەسىن كورسەتىپ، "سوققى ىزدەرى بايقالادى" دەپ تۇجىرىم جاسايدى. ولار مارقۇمنىڭ دەنەسىن تەكسەرىپ، ساۋساعى قارايىپ كەتكەنىن، يىعى كوگەرىپ، تابانىندا، ارقاسىندا جاراقات ىزدەرى بارىن ايتادى.
بۇل ۆيدەو جاريالانعاننان كەيىن الەۋمەتتىك جەلىدە نارازى جازبالار كوبەيدى. ولاردىڭ كوبى "اعادىلدىڭ ولىمىنە كىنالىلەر جازالانسىن، جالعان اقپارات بەرگەندەر قىلمىستىق جاۋاپكەرشىلىككە تارتىلسىن" دەگەن تالاپ ايتتى.
ءدىني ءراسىم بويىنشا سۇيەككە تۇسكەن قايىرجان يمانعاليۇلى ەسىمدى قوستاناي وبلىسىنىڭ ازاماتى 27 اقپاندا ازاتتىققا بەرگەن سۇحباتىندا اعادىلدىڭ سۇيەگىن ءمايىتحانادان اكەلگەن كۇنى مارقۇمنىڭ دەنەسىنەن جاراقات ىزدەرىن بايقاعانىن مالىمدەگەن بولاتىن.
28 اقپاندا اعادىلدىڭ جاقىندارى ازاتتىق تىلشىسىنە تۇسىنىكتەمە بەرۋدەن باس تارتتى. اعادىلدىڭ وتباسىنا جاقىن ادامداردىڭ ءبىرى مارقۇمنىڭ وتباسىنا قىسىم جاسالعانىن ايتتى.
سەيسەنبى كۇنى ىشكى ىستەر ءمينيسترىنىڭ ورىنباسارى ارىستانعاني زاپپاروۆ "بەلسەندىنىڭ دەنەسىندە زورلىق-زومبىلىق ىزدەرى انىقتالماعانىن" حابارلاعان.
قوعام بەلسەندىلەرى بيلىكتىڭ مالىمدەمەسىنە كۇمان كەلتىرەدى. بەلسەندىلەر مەن قۇقىق قورعاۋشىلار تاۋەلسىز ساراپتاما جۇرگىزىلۋى ءتيىس دەيدى.
25 اقپاندا اعادىلدىڭ قازاسىنان كەيىن قازاقستاننىڭ ءتۇرلى قالالارىندا نارازىلىق اكتسيالارى ءوتىپ، جينالعاندار بۇرىنعى پرەزيدەنت، ىقپالدى قاۋىپسىزدىك كەڭەسىنىڭ توراعاسى نۇرسۇلتان نازارباەۆتىڭ وتستاۆكاعا كەتۋىن تالاپ ەتتى. بۇعا قوسا، ونىڭ اينالاسىنداعى ادامدار، ىشكى ىستەر ءمينيسترى ەرلان تۇرعىمباەۆ تا قىزمەتىنەن كەتسىن دەگەن تالاپ ايتتى.
25 اقپاندا نۇر-سۇلتاندا بەلسەندىنىڭ ولىمىنە بايلانىستى ىشكى ىستەر مينيسترلىگىنەن تۇسىنىكتەمە تالاپ ەتىپ، جولدى جابۋعا تىرىسقان ونداعان ادام ۇستالدى. كەيىنىرەك بوساتىلدى. 27 اقپاندا تالاپكەر اۋىلىنداعى جەرلەۋ راسىمىنەن كەيىن نۇر-سۇلتانعا بارىپ، بەلسەندىلەردى بوساتىپ، رەفورمانى تالاپ ەتۋگە تىرىسقان جيىرمادان استام ادام ۇستالدى.
"ازاتتىق" راديوسى
فوتو اۆتورى ءسانيا تويكەن
