28 aqpanda tústen keıin Nur-Sultan qalalyq prokýratýrasy tergeý ızolıatorynda jumbaq jaǵdaıda kóz jumǵan belsendi Dýlat Aǵadildiń denesindegi "azaptaý izderi" týraly aqparatqa túsinikteme berdi. 28 aqpanǵa qaraǵan túni áleýmettik jelide marqumnyń denesindegi "jaraqat" týraly vıdeo taraǵan edi. Keıbir belsendiler men quqyq qorǵaýshylar ony "ızolıatorda uryp-soqqan bolýy múmkin" dep málimdep, bılikten túsindirýdi talap etken.
Nur-Sultan qalasy prokýrorynyń orynbasary Eldos Kelimjanov "Aǵadildi tergeý ızolıatorynda azaptaǵan" degen aqparatty joqqa shyǵaryp, Aǵadil denesindegi "daqtardy" bıologııalyq ólim belgileri dep atady.
- [Áleýmettik jelilerde taraǵan] Vıdeomaterıaldarda máıitte daqtar bary aıtylady. Ony dene jaraqaty dep ataıdy. Munda onyń paıda bolý sebebin túsindire alatyn mamandar bar. Máıittegi daqtar - bul bıologııalyq ólimniń belgileri. Medıınalyq tilmen aıtqanda, daqtar adamnyń júregi toqtaǵannan keıin keminde bir saǵat ótkennen keıin paıda bolady, - dedi ol.
Tikeleı efırdi kórińiz:
Onyń aıtýynsha, bastapqyda Aǵadildiń denesin Talapker aýyldyq aýrýhanasy men tergeý ızolıatorynyń dárigerleri qarap shyǵyp, "soqqy izderin" tappaǵan. Oqıǵaǵa qatysty qozǵalǵan qylmystyq is aıasynda sot medıınalyq saraptama taǵaıyndalǵan. 26 aqpanda marqumnyń aǵasy men advokat Baýyrjan Azanovtyń qatysýymen máıitke saraptama júrgizilgen.
"Marqumnyń aǵasy men advokat Azanov saraptama qorytyndysyna shaǵymdanǵan joq. Máıitti saraptaý men zertteý barysy vıdeoǵa túsirildi. Etıka talaptaryna baılanysty jáne týystary ruqsat bermegendikten vıdeony jarııalaı almaımyz. Buǵan deıin saraptamanyń aldyn ala qorytyndysyn aıtqanbyz. Aǵadil júrek qantamyrlarynyń jetispeýshiliginen qaıtys bolǵan" dedi Kelimjanov.
Ol saraptamanyń túpkilikti qorytyndysy jaqyn arada shyǵatynyn aıtyp, azamattardy asyǵys qorytyndy jasamaýǵa jáne tekserilmegen aqparatty taratpaýǵa shaqyrdy.
Áleýmettik jeli men messenjerlerde taraǵan vıdeoda birneshe adam eki kúndik saraptamadan keıin máıithanadan marqumnyń súıegi jetkizilgenin aıtyp, denesin kórsetip, "soqqy izderi baıqalady" dep tujyrym jasaıdy. Olar marqumnyń denesin tekserip, saýsaǵy qaraıyp ketkenin, ıyǵy kógerip, tabanynda, arqasynda jaraqat izderi baryn aıtady.
Bul vıdeo jarııalanǵannan keıin áleýmettik jelide narazy jazbalar kóbeıdi. Olardyń kóbi "Aǵadildiń ólimine kináliler jazalansyn, jalǵan aqparat bergender qylmystyq jaýapkershilikke tartylsyn" degen talap aıtty.
Dinı rásim boıynsha súıekke túsken Qaıyrjan Imanǵalıuly esimdi Qostanaı oblysynyń azamaty 27 aqpanda Azattyqqa bergen suhbatynda Aǵadildiń súıegin máıithanadan ákelgen kúni marqumnyń denesinen jaraqat izderin baıqaǵanyn málimdegen bolatyn.
28 aqpanda Aǵadildiń jaqyndary Azattyq tilshisine túsinikteme berýden bas tartty. Aǵadildiń otbasyna jaqyn adamdardyń biri marqumnyń otbasyna qysym jasalǵanyn aıtty.
Seısenbi kúni ishki ister mınıstriniń orynbasary Arystanǵanı Zapparov "belsendiniń denesinde zorlyq-zombylyq izderi anyqtalmaǵanyn" habarlaǵan.
Qoǵam belsendileri bıliktiń málimdemesine kúmán keltiredi. Belsendiler men quqyq qorǵaýshylar táýelsiz saraptama júrgizilýi tıis deıdi.
25 aqpanda Aǵadildiń qazasynan keıin Qazaqstannyń túrli qalalarynda narazylyq akııalary ótip, jınalǵandar burynǵy prezıdent, yqpaldy Qaýipsizdik keńesiniń tóraǵasy Nursultan Nazarbaevtyń otstavkaǵa ketýin talap etti. Buǵa qosa, onyń aınalasyndaǵy adamdar, ishki ister mınıstri Erlan Turǵymbaev ta qyzmetinen ketsin degen talap aıtty.
25 aqpanda Nur-Sultanda belsendiniń ólimine baılanysty ishki ister mınıstrliginen túsinikteme talap etip, joldy jabýǵa tyrysqan ondaǵan adam ustaldy. Keıinirek bosatyldy. 27 aqpanda Talapker aýylyndaǵy jerleý rásiminen keıin Nur-Sultanǵa baryp, belsendilerdi bosatyp, reformany talap etýge tyrysqan jıyrmadan astam adam ustaldy.
"Azattyq" radıosy
foto avtory Sánııa Toıken
