نۇر-سۇلتاندا ماس كۇيىندە كولىك جۇرگىزگەنى ءۇشىن العاشقى ادامعا قاتاڭداتىلعان جازا كەسىلدى، دەپ حابارلايدى 24.kz.
ماس كۇيىندە كولىك جۇرگىزگەن ەلوردالىق باس بوستاندىعىنان ايىرىلدى. ىشىمدىك ءىشىپ كولىك تىزگىندەگەن ازامات وسىدان ءبىر اي بۇرىن ۇستالعان.
كولىگىن توقتاتقان پوليتسەيلەرگە قارسىلىق كورسەتىپ، قاشپاق بولعان كورىنەدى. مۇنىمەن قوسا بۇعان دەيىن دە وسىلاي ماس كۇيدە كولىك جۇرگىزىپ، كۋالىگىنەن ايىرىلعان. وسىنداي قۇقىقبۇزۋشىلىقتارىن ەسكەرە وتىرىپ، ەسىل اۋداندىق سوتى ول ازاماتتى 1 جىلعا سوتتادى. سونىمەن قاتار تەمىر تۇلپار تىزگىندەۋ قۇقىعىنان ءومىر بويىنا ايىردى.
ەستەرىڭىزگە سالايىق، جۋىردا پرەزيدەنتتىڭ پارمەنىمەن قولدانىستاعى زاڭعا وزگەرىستەر ەنىپ، جازا كۇشەيگەن. بۇل سودان بەرى نۇر-سۇلتان قالاسىندا تاعايىندالعان العاشقى سوت ۇكىمى.
بۇگىن ەسىل اۋداندىق سوتى ماس كۇيدە كولىك تىزگىنىن ۇستاعان جۇرگىزۋشىسى باس بوستاندىعىنان ايىرۋ جازاسىن تاعايىندادى. بۇل قالا بويىنشا قاتاڭداتىلعان زاڭ بويىنشا تاعايىندالعان العاشقى ۇكىم. ەلوردا تۇرعىنى بۇعان دەيىن بىرنەشە رەت اكىمشىلىك جاۋاپكەرشىلىككە تارتىلعان. سوڭعى رەت 2017 جىلى ماس كۇيىندە كولىك باسقارعانى ءۇشىن كۋالىگىنەن 6 جىل مەرزىمگە ايىرىلعان. بۇگىن سوتتىڭ ۇكىمىمەن ەلوردا تۇرعىنى سوتتالىپ، كولىك جۇرگىزۋ قۇقىعىن ءومىر بويىنا ايىرا وتىرىپ، ءبىر جىلعا باس بوستاندىعىنان ايىرۋ جازاسىن تاعايىندادى، - دەپ مالىمدەدى قالالىق سوتتىڭ ءباسپاسوز حاتشىسى بوتاگوز بايانوۆا.
دەگەنمەن، ءباسپاسوز حاتشىسىنىڭ حابارلاۋىنشا، سوت ۇكىمى ازىرگە زاڭدى كۇشىنە ەنگەن جوق.
