التىن وردانىڭ 750 جىلدىعىنا ارنالعان يسا بايزاقوۆ اتىنداعى پاۆلودار وبلىستىق فيلارمونياسىنىڭ
«التىن وردا» اتتى كونتسەرتى دۇركىرەپ ءوتتى.
ەرتىس - بايان ولكەسىنىڭ ونەرسۇيەر قاۋىمىنا ەرەكشە كوڭىل كۇي سىيلاعان كەش، تاۋەلسىزدىك جولىنداعى تاريحي وقيعالارعا، سونىڭ ىشىندە، قازاق مەملەكەتتىلىگىنىڭ باستاۋى سانالاتىن التىن وردانىڭ 750 جىلدىعىنا ارنالعان. يسا بايزاقوۆ اتىنداعى پاۆلودار وبلىستىق فيلارمونياسىنىڭ مەرەكەلىك كونتسەرتىنىڭ شىمىلدىعىن رۇستەمبەك وماروۆ اتىنداعى قازاق ۇلت اسپاپتار وركەسترى (باس ديريجەرى ءارى كوركەمدىك جەتەكشىسى قر ەڭبەك سىڭىرگەن قايراتكەرى تالعات كارىموۆ) اشتى. تاماشا شىعارمانى بيمەن سۇيەمەلدەگەن «شەرنياز»بي ءانسامبلى ( كوركەمدىك جەتەكشىسى – نۇرلان بەكوۆ).
ءاربىر ولكەنىڭ حالقىنا سۋىقتا پانا، ىستىقتا سايا بولعان، ەسىمدەرى ەل ەسىندە ساقتالعان ءبىرتۋار پەرزەنتتەرى بار. ءبىزدىڭ ولكەدە دە كىندىك قانى تامعان تانىمال ۇلى دالا تالانتتارى، قازاق مۋزىكا ونەرىنىڭ شوق جۇلدىزدارى، اسا دارىندى اقىن، ءانشى كومپوزيتور، جەرلەستەرىمىز، ەستاي، جاياۋ مۇسا، يسا، مايرا ەسىمى ەلىمىزگە كەڭىنەن تانىمال، ءدۇلدۇل اقىندار مەن ونەر تارلاندارى دۇنيەگە كەلگەن. سولاردىڭ ءىزىن جالعاعان ءداستۇرلى ءانشى، قازاقستان رەسپۋبليكاسىنىڭ ەڭبەك سىڭىرگەن قايراتكەرى ەربول ايتباەۆ، حالىقارالىق بايقاۋلاردىڭ لاۋرەاتتارى: اسەل بوتاەۆا، جانبولات بايسولتان، ساۋلە ءمۇسىپوۆالار كەشتىڭ شىرايىن كىرگىزدى.
سەرىك رىسبەك، رۋسلان جۇماباەۆ، جىبەك ايتباەۆا، ءامينا راحىمجانوۆا سىندى ونەرپازدار قاتىسقان كونتسەرت جوعارى دەڭگەيدە ءوتتى. بيىل 750 جىلدىعى تويلانىپ جاتقان التىن وردانىڭ مەرەيتويىن جۇرتتىڭ الدى بولىپ كەرەكۋ ءوڭىرى تويلاي باستادى.
ساۋلە مۇقاەۆا،
پاۆلودار قالاسى
