20 اقپانداعى تاڭعى جاعداي بويىنشا بۇكىل الەم بويىنشا كوروناۆيرۋستىڭ جاڭا ءتۇرىن جۇقتىرعانداردىڭ جالپى سانى 75 713 ادام بولدى، قۇربان بولعاندار سانى 2126 ادامعا جەتتى. تاعى 16 231 ناۋقاس اۋرۋحانادان شىعارىلدى. بۇل تۋرالى قىتايدىڭ دەنساۋلىق ساقتاۋ ورگاندارىنا سىلتەمە جاساپ South China Morning Post حابارلايدى.
كوروناۆيرۋستىڭ تارالۋ وشاعى ورنالاسقان حۋبەي پروۆينتسياسىندا 108 جاڭا ءولىم تىركەلدى، ال جالپى ەل بويىنشا - 114 جاعداي.
جاپوننىڭ NHK تەلەارناسىنىڭ اقپاراتى بويىنشا، جاپونياداعى Diamond Princess كرۋيز لاينەرىندە COVID-2019 العاشقى قۇرباندارى پايدا بولعان. ەكى ادام قايتىس بولعان.
ۋحان قالاسىندا 55 جاستاعى كينورەجيسسەر، Hubei Film Studio كينوكومپانياسىنىڭ وكىلى چان كاي قايتىس بولعان. بۇل تۋرالى The Guardian حابارلادى. ول جانە ونىڭ اپكەسى اتا-اناسىنان ۆيرۋس جۇقتىرعان. جەرگىلىكتى اۋرۋحانالاردا ورىن جەتىسپەگەندىكتەن رەجيسسەر اكەسى مەن اناسىن اۋرۋحاناعا جاتقىزا الماعان.
كينەماتوگرافيستىڭ اكەسى 25 قاڭتاردا قايتىس بولدى. ونىڭ ىستىعى كوتەرىلىپ، جوتەلىپ، تىنىس الۋى قيىنداپ كەتكەن. سودان كەيىن رەجيسسەردىڭ اناسى قايتىس بولدى. وسىدان كەيىن چان كاي مەن ونىڭ اپكەسى دە ۆيرۋس جۇقتىرعانى بەلگىلى بولعان.
رەجيسسەر ينفەكتسيانىڭ ەرتە دامۋ كەزەڭىندە ەمدەۋدەن باس تارتىپتى. ول 14 اقپاندا، الدىن الا دوستارىمەن ينتەرنەت جانە ۇلىبريتانيادا وقيتىن ۇلىمەن قوشتاسقان. چان كايدىڭ اپكەسى دە قايتىس بولعان. رەجيسسەردىڭ ايەلى قازىرگى ۋاقىتتا جانساقتاۋ بولىمىندە جاتىر. ونىڭ ءومىرى ءۇشىن دارىگەرلەر كۇرەسىپ جاتىر.
چان كاي ۋحانداعى جوو-دا جۋرناليستيكا ۋنيۆەرسيتەتىن بىتىرگەننەن كەيىن كينوستۋديادا 1989 جىلدان باستاپ جۇمىس ىستەپ كەلگەن.
tengrinews.kz
