كوروناۆيرۋس تابىلعان لاينەردە قازاقستاننان بالالار دا بار

427

كوروناۆيرۋس تابىلىپ، جاپونيا جاعالاۋىندا كارانتينگە تۇرىپ قالعان كەمەدە قازاقستاننىڭ ءتورت ازاماتى: 8 جانە 12 جاستاعى نەمەرەلەرىمەن 2 ايەل وتىر. بۇل اقپاراتتى ازاتتىق تىلشىسىنە سىرتقى ىستەر مينيسترلىگىنىڭ ءباسپاسوز حاتشىسى ايبەك سمادياروۆ ايتتى.

ايبەك سمادياروۆتىڭ ايتۋىنشا، "ولارمەن قازاقستاننىڭ جاپونياداعى كونسۋلدىعى كۇن سايىن سويلەسىپ وتىر، دەنساۋلىقتارى جاقسى، شاعىمدارى جوق".

- كەشە كونسۋلمەن حابارلاستىم. قازاقستاننىڭ 4 ازاماتى اناليز تاپسىرعان. 19 اقپاندا كارانتين بىتەدى. كەمەدەگى 30 مىڭنان استام جولاۋشىنى كارانتيننەن بوساتۋ پروتسەسى بىرەر كۇنگە سوزىلۋى مۇمكىن. كەمەدەن تۇسكەن سوڭى تاعى ءبىر رەت تەكسەرىلەدى،- دەدى ول.

كەشە قازاقستان دەنساۋلىق ساقتاۋ مينيسترلىگىنىڭ باس ينفەكتسيونيسى ديناگۇل باەشەۆا جاپونيا جاعالاۋىندا تۇرعان Diamond Princess لاينەرىندە قازاقستانىڭ 4 ازاماتى بارىن، ولارمەن WhatsApp ارقىلى ۇدايى حابارلاسىپ وتىرعاندارىن، ارالارىندا بالالار جوق ەكەنىن" ايتقان.

ايبەك سمادياروۆ ديناگۇل باەشەۆا تاراتقان اقپاراتتى "ەسكىرگەن مالىمەت" دەپ سانايدى.

جاپونيا جاعالاۋىندا تۇرعان Diamond Princess لاينەرىندە 5 اقپاندا ءبىر ادامنان كوروناۆيرۋس تابىلىپ، كارانتينگە جابىلعان. كەمە ىشىندە 50 ەلدەن 3700 ادام بولعان. 17 اقپانداعى دەرەك بويىنشا، كرۋيزدە 454 ادامنىڭ كوروناۆيرۋس جۇقتىرعان.

16 اقپانداعى مالىمەتكە قاراعاندا، قازىر الەمدە كوروناۆيرۋس جۇقتىرعاندار 70 مىڭنان، قازا بولعاندار 1700-دەن اسقان. ولاردىڭ كوبى قىتايدا. ورتالىق ازيا ەلدەرىندە كوروناۆيرۋس جۇقتىرعاندار جوق.

"ازاتتىق" راديوسى

پىكىرلەر