قازاقستان رەسپۋبليكاسى ۇلتتىق مۋزەيىندە ي.يمانوۆ پەن و.مازباەۆتىڭ «ۇلى شوقاننىڭ كەرۋەن جولى» كىتابىنىڭ تانىستىرىلىمى ءوتتى، دەپ حابارلايدى kazmuseum.kz ءتىلشىسى قازاقستان رەسپۋبليكاسى ۇلتتىق مۋزەيىنىڭ اقپاراتتىق-يميدجدىك قىزمەتىنە سىلتەمە جاساپ.
كىتاپ اۆتورى، پروفەسسور وردەنبەك مازباەۆ جاڭا تۋىندى جايلى ءوز پىكىرىن ءبىلدىردى.
«ۇلى شوقاننىڭ كەرۋەن جولى» دەگەن كىتاپ شوقان ءجۇرىپ وتكەن جولدارمەن ەكسپەديتسيا جاساپ قايتقان سوڭ جازىلدى. ەكسپەديتسيا شوقان ءۋاليحانوۆتىڭ 180 جىلدىعىنا جانە قاشقار ساياحاتىنا 150 جىل تولۋىنا وراي ۇيىمداستىرىلعان بولاتىن. بۇل جولعى ەكسپەديتسيا كولىكپەن دە جاياۋ دا ءجۇرىپ، شوقان جۇرگەن جەرلەردى ارالاپ شىقتى. ەكسپەديتسيا قۇرامىندا عالىمدار مەن قازاق ۇلتتىق گەوگرافيالىق قوعامدىق بىرلەستىگىنىڭ مۇشەلەرى بولدى» – دەدى و.مازباەۆ.
كىتاپ قازاق ۇلتتىق گەوگرافيالىق قوعامىنىڭ 2014 جىلعى 24 شىلدە جانە 5 تامىز ارالىعىندا قحر جانە قىرعىزستان تەرريتوريالارى ارقىلى وتكەن «شوقان ءۋاليحانوۆتىڭ كەرۋەن جولى بويىنشا» اتتى العاشقى حالىقارالىق ەكسپەديتسياسىنا ارنالعان. اتالمىش ەكسپەديتسيا سوڭعى سەگىز جىل ىشىندە جۇزەگە اسىرىلعان «شوقان جولدارىمەن» اتتى ەكسپەديتسيالار سەرياسىنىڭ سوڭعى ساپارى بولىپ سانالادى. ەكسپەديتسياعا قاتىسۋشىلار شوقان ءۋاليحانوۆ ءجۇرىپ وتكەن جەرلەرگە (قىرعىزستان، جەتىسۋ، قۇلجا) ساياحات جاسادى.
«شوقان ءبىز ءۇشىن قۇبىلىس. شوقان تۋرالى بۇعان دەيىن دە زەرتتەلدى. قازىر دە جازىلىپ جاتىر. بىراق ول ازدىق ەتەدى. ماسەلەن اباي مەن شوقان كەزدەسىپتى دەگەن ءسوز بار. بىراق ول تۋرالى ەشكىم زەرتتەگەن جوق. ەكىنشى ماسەلە، ورىستار پۋشكيننىڭ ءاربىر كۇنىنىڭ قالاي وتكىزگەنىن جازادى. بىزدە سول سياقتى شوقاننىڭ ءاربىر كۇنىن قالاي وتكىزگەنىن جايلى جازۋىمىز قاجەت»، – دەدى قر مادەنيەت قايراتكەرى، پرفەسسور، باقىتجان توباياقوۆ.
كىتاپ قازاقتىڭ ۇلى عالىمى جانە اعارتۋشىسى – ش.ءۋاليحانوۆتىڭ 180 جىلدىق مەرەيتويىنا ورايلاستىرىلىپ شىعارىلدى. ەكسپەديتسيا مۇشەلەرىنىڭ جەكە جانە تىكەلەي ساياحات بارىسىندا العان اسەرلەرى نەگىزىندە جازىلعان ەڭبەك جالپى كوپشىلىك وقىرمانعا ارنالعان.
KAZMUSEUM.KZ
