قىزدى قىرىق ۇيدەن تىيىپ، كەلىندى بوساعا اتتاعاننان-اق تاربيەلەيتىن وتباسىنىڭ دىڭگەگى سوڭعى جىلدارى بوساپ بارادى. «بەتىنەن قاقپاي» وسىرەم دەپ بەتىمەن جىبەرىپ العاندار دا بار. اقتوبەدە وسى ولقىلىقتىق ورنىن تولتىرۋ ماقساتىندا «رۋحانيات» مۇراجايى جانىنان «سىرلاسۋ» كلۋبى اشىلدى. كلۋب بويجەتكەندەر مەن كەلىندەرگە ارنالعان، بولاشاق انا مەن ءبىر وتباسىنىڭ ۇيىتقىسى بولاتىن وتانانى تاربيەلەيدى.
قازاق قىزى مەن كەلىنىنىڭ بولاشاعىن ويلاعان اقتوبەلىك مامانداردىڭ جوسپارى ۇلكەن. «سىرلاسۋ» كلۋبىنىڭ ۇيىمداستىرۋشىسى زەينەش سالمەننىڭ ايتۋىنشا، جوعارى سىنىپ وقۋشىلارى مەن ستۋدەنت قىزداردان قۇرالعان كلۋبتا گينەكولوگ، كوسمەتولوگ، پسيحولوگ، ۇستازدار بولادى. ءبىرى — تازالىق، دەنساۋلىق كۇتىمى تۋرالى ءدارىس وقىسا، ەكىنشىسى — بەت-الپەتتىڭ بابىن ايتادى. «ىدىس-اياق سىلدىرلاماي تۇرمايدى» دەسەك تە، پسيحولوگ ماماندار شىدامدىلىققا، ۇستامدىلىققا، سابىرلى بولۋعا تاربيەلەيدى.
قازاق حالقىنىڭ ەتنومادەنيەتىن، تاريحي مۇراسىن، ءداستۇرى مەن ەرەكشەلىكتەرىن ساقتاي وتىرىپ، دىنمەن ساباقتاستىرا ۇيرەتۋدى ءجون كوردىك. جاستار ۇلتتىق پاتريوتتىق سەزىمىن جوعالتپاسا ەكەن دەيمىز. ولار انا ءتىلىن، ءدىلى مەن ءدىنىن ءبىلۋى شارت. ءبىز ىزەتتىلىكتى، ۇلكەنگە قۇرمەت، كىشىگە قامقور بولۋدى، مەيىرىمدىلىك پەن قاراپايىمدىلىقتى بويعا سىڭىرە ءبىلۋىمىز قاجەت، — دەيدى ز.سالمەن.
وتباسىنداعى تاربيە اقساپ تۇرعان كەزدە، انا مەن اجەنىڭ ءۇي ءىشىن تازا ۇستاۋ، تاماق ازىرلەۋ سەكىلدى اقىل-كەڭەسىن، ەندى بىلىكتى ماماندار الماستىرا الادى. ول ءۇشىن اقتوبەلىك بويجەتكەندەردىڭ ارنايى كلۋبقا كەلىپ جازىلۋى قاجەت. كەيىن ماماندار ولارعا تەگىن ءدارىس وقىپ، ومىرلىك ماڭىزدى ماسەلەلەردى تالقىعا سالادى، شەشىمىن تابۋعا سەپتىگىن تيگىزەدى. «مۇنداي كلۋب بويجەتكەندەر ءۇشىن وتە قولايلى. بىلىكتى ماماندارعا سۇراق قويىپ، جاۋاپ الۋعا مۇمكىندىك بار. ءارى سىر اقتارىپ، ويدا جۇرگەن بار ماسەلەنى ايتا الامىز دەپ ۇمىتتەنەمىن. كەڭەس بەرىلسە، ومىرلىك پروبلەمالاردىڭ شەشىمى تابىلارى ءسوزسىز» دەيدى جانار قوشتانبەكوۆا.
«ۇلتىڭدى ساقتايمىن دەسەڭ، قىزىڭدى تاربيەلە» دەگەن. يماندى قىز، يبالى كەلىن تاربيەلەۋدى قولعا العان كلۋب مۇشەلەرى ايىنا ءبىر مارتە باس قوسادى. كەيىن وقىپ، ۇيرەنگەندەرىن سىنعا سالىپ، ءوزارا سىنعا تۇسەدى. العاشقى تۇلەكتەر مامىر ايىندا قولدارىنا كۋالىك الادى دەگەن جوسپار بار. سول شاقتا كلۋب ماماندارىنىڭ تاربيەسىن كورگەن قازاقتىڭ بويجەتكەنى مەن كەلىنىنىڭ ۇلگىسىن كورۋگە مۇمكىندىك بار.
التىناي ساعىندىقوۆا
اقتوبە
