Qyzdy qyryq úıden tyıyp, kelindi bosaǵa attaǵannan-aq tárbıeleıtin otbasynyń dińgegi sońǵy jyldary bosap barady. «Betinen qaqpaı» ósirem dep betimen jiberip alǵandar da bar. Aqtóbede osy olqylyqtyq ornyn toltyrý maqsatynda «Rýhanııat» murajaıy janynan «Syrlasý» klýby ashyldy. Klýb boıjetkender men kelinderge arnalǵan, bolashaq ana men bir otbasynyń uıytqysy bolatyn otanany tárbıeleıdi.
Qazaq qyzy men kelininiń bolashaǵyn oılaǵan aqtóbelik mamandardyń jospary úlken. «Syrlasý» klýbynyń uıymdastyrýshysy Zeınesh Sálmenniń aıtýynsha, joǵary synyp oqýshylary men stýdent qyzdardan quralǵan klýbta gınekolog, kosmetolog, psıholog, ustazdar bolady. Biri — tazalyq, densaýlyq kútimi týraly dáris oqysa, ekinshisi — bet-álpettiń babyn aıtady. «Ydys-aıaq syldyrlamaı turmaıdy» desek te, psıholog mamandar shydamdylyqqa, ustamdylyqqa, sabyrly bolýǵa tárbıeleıdi.
Qazaq halqynyń etnomádenıetin, tarıhı murasyn, dástúri men erekshelikterin saqtaı otyryp, dinmen sabaqtastyra úıretýdi jón kórdik. Jastar ulttyq patrıottyq sezimin joǵaltpasa eken deımiz. Olar ana tilin, dili men dinin bilýi shart. Biz izettilikti, úlkenge qurmet, kishige qamqor bolýdy, meıirimdilik pen qarapaıymdylyqty boıǵa sińire bilýimiz qajet, — deıdi Z.Sálmen.
Otbasyndaǵy tárbıe aqsap turǵan kezde, ana men ájeniń úı ishin taza ustaý, tamaq ázirleý sekildi aqyl-keńesin, endi bilikti mamandar almastyra alady. Ol úshin aqtóbelik boıjetkenderdiń arnaıy klýbqa kelip jazylýy qajet. Keıin mamandar olarǵa tegin dáris oqyp, ómirlik mańyzdy máselelerdi talqyǵa salady, sheshimin tabýǵa septigin tıgizedi. «Mundaı klýb boıjetkender úshin óte qolaıly. Bilikti mamandarǵa suraq qoıyp, jaýap alýǵa múmkindik bar. Ári syr aqtaryp, oıda júrgen bar máseleni aıta alamyz dep úmittenemin. Keńes berilse, ómirlik problemalardyń sheshimi tabylary sózsiz» deıdi Janar Qoshtanbekova.
«Ultyńdy saqtaımyn deseń, qyzyńdy tárbıele» degen. Imandy qyz, ıbaly kelin tárbıeleýdi qolǵa alǵan klýb músheleri aıyna bir márte bas qosady. Keıin oqyp, úırengenderin synǵa salyp, ózara synǵa túsedi. Alǵashqy túlekter mamyr aıynda qoldaryna kýálik alady degen jospar bar. Sol shaqta klýb mamandarynyń tárbıesin kórgen qazaqtyń boıjetkeni men kelininiń úlgisin kórýge múmkindik bar.
Altynaı SAǴYNDYQOVA
Aqtóbe
